भांगरभूंय | प्रतिनिधी
अधिकारी भरती विशीं सर्वोच्च न्यायालयान मागलो अहवाल
भांगरभूंय । प्रतिनिधी
पणजी : कनिश्ठ नागरी सेवा अधिकारी भरतींत एफआयआर दाखल जावन 10 वर्सां जावन गेली. दक्षता संचालनालयान एफआयआर दाखल केले उपरांत तपास खंय मेरेन पावला, ते संबंदीचो अहवाल सर्वोच्च न्यायालयान गोंय सरकाराकडेन मागला. अहवाल सादर करपा खातीर सरकारान दोन सप्तकांची मुजत मागल्या. हाका लागून सरकारी अधिकारी भरती आव्हान याचिकेचेर 18 डिसेंबराक फुडली सुनावणी जातली.
सर्वोच्च न्यायालयाचे न्यायमूर्ती विक्रम नाथ आनी संदीप मेहता हांचे मुखार सुनावणी जाली. एफआयआर नोंद जाले उपरांत तपास किदें जाला, हाची म्हायती आमका जाय, अशें न्यायाधिशांनी म्हणलें.
कनिश्ठ सेवा अधिकाऱ्यांचे भरतींत जाल्ल्या कथीत गैरवेव्हारा विशींचो एफआयआर रद्द करपाच्या उच्च न्यायालयाच्या आदेशाक सर्वोच्च न्यायालयान स्थगिती दिले उपरांत सरकारान फाटले सप्तकांत 4 अधिकाऱ्यांक बडतर्फ केल्यात.
नेमणूक जाले उपरांत न्यायालयाच्या आदेशाक लागून अधिकाऱ्यांक बडतर्फ करपाची पयलीच घडणूक राज्यांत घडली. हाका लागून गोंय लोकसेवा आयोगाचो भरती प्रक्रियेंतलो घाळ कारभार आनी गैरवेव्हार लेगीत उक्तडार आयलां.
मुंबय उच्च न्यायालयान 12 फेब्रुवारी 2025 दिसा एके आव्हान याचिकेचेर दिल्ल्या आदेशा प्रमाण ह्या चार अधिकाऱ्यांची नेमणूक जाल्ली. ह्या चारूय अधिकाऱ्यांची निवड गोंय लोकसेवा आयोगान (जीपीएससी) केल्ली. उच्च न्यायालयाच्या आदेशाक पदां खातीर अर्ज करपी एकल्यान सर्वोच्च न्यायालयांत आव्हान दिलें. सर्वोच्च न्यायालयान उच्च न्यायालयाच्या आदेशाक स्थगिती दिली. हाका लागून सरकाराक 4 अधिकाऱ्यांक बडतर्फ करचे पडले.
गोंय लोकसेवा आयोगान कनिश्ठ नागरी सेवा अधिकारी पदां खातीर जायरात दिवन 2011 वर्सा भरती प्रक्रिया सुरू केल्ली. आयोगा कडल्यान निवड जाले उपरांत तोंडी परिक्षेंतल्या गुणांत फेरफार केल्ल्याचे आरोप जाले. तशेंच ओबीसींतल्या एका उमेदवाराक सामान्य गटांत घालो. हाका लागून ओबीसींतल्या संजय नायक ह्या उमेदवारान उच्च न्यायालयांत निवडीक आव्हान दिलें. सुनावणी सुरू आसताना राज्य सरकारान एसीबीक चवकशेचे आदेश दिले. एसीबीच्या चवकशी अहवाला उपरांत सरकारान 2014 वर्सा भ्रश्टाचार प्रतिबंधक कायद्या खाला गोंय लोकसेवा आयोगाचे अधिकारी आनी निवड जाल्ल्या उमेदवारां आड एफआयआर दाखल केल्लो. हाचे उपरांत तपासाचो अहवाल सर्वोच्च न्यायालयान सुनावणी वेळार मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
