भांगरभूंय | प्रतिनिधी
कुशळटाय उदरगत संचालक एस. एस. गांवकार हांची म्हायती
पणजीः गोंय एप्रेन्टीसशीप येवजणे खाला फाटल्या एका वर्सांत १३ हजार परस चड भुरगें एप्रेन्टीसशीप प्रशिक्षण घेतात. हे येवजणेंत एप्रेन्टीसशीप करपी भुरग्यांक सरकारी नोकरेंत ५००० हजार पदां राखीव दवरल्यांत. सरकारी वा खाजगी एप्रेन्टींसशीप आसूं, ह्या दोगांकय हे सरकारी नोकरी राखीव पदांचो लाव मेळटलो, अशें गोंय कुशळटाय उदरगत संचालक एस. एस. गांवकार हांणी सांगलें.
राज्यांत तरणाट्यांचें मनीस बळ आनी कुशळटाय उदरगत करून तांकां नोकरी दिवपाच्या हेतान केंद्रान एप्रेन्टीसशीप ही येवजण चालीक लायिल्ली. वांगडा राज्य सरकारान गोंयांतय एप्रेन्टीसशीप प्रशिक्षण येवजण चालीक लावन हे येवजणे खाला नोंद जावपी तरणाट्यांक खाजगी आनी सरकारी संस्थेंत प्रशिक्षण दिवन तांकां फुडाराक नोकरी मेळपा खातीर गरजेचो अणभव दिवपाची मोख दवरल्या. हे येवजणे खाला राज्यांत कुशळ उदरगती खातीर नवीन साधन सुविधा उबारपा खातीर खर्च करचे सोडून ज्यो सद्याच्यो सुविधायो खाजगी आस्थापनांनी आसात तांचो वापर प्रशिक्षणा खातीर करून कुशळ मनीसबळ उद्देग मळार दिवप हो एक हेत जावन आसा. एप्रेन्टींशीप करपी तरणाट्यांक प्रशिक्षणा वांगडा म्हयन्याक मानधन लेगीत मेळटा.
कुशळटाय उदरगत संचालक एस. एस. गांवकार हांणी दिल्ले म्हायती प्रमाण वर्स २०२३-२४ हे वर्सात १३,३०० जाणांनी सद्या एप्रन्टींसशीप घेतल्या. तातुंतले सरकारी संस्थेंत ५३०० जाण, जाल्यार खाजगी मळार ८००० जाण एप्रेन्टीसशीप घेतात.
ह्या वर्सा २०२४-२५ सात ४१६२ जाणांनी आपलें एप्रेन्टीसशीप प्रशिक्षण पुराय केलां. हांची एप्रेन्टीसशीप पदां रिती जाली काय रोखडींच त्या जाग्यार नवे प्रशिणार्थींची वेचणूक करतात. एप्रेन्टींसशीप येवजणेंत प्रशिक्षण पुराय करपी सरकारी नोकरेंत ५ हजार पदां राखीव आसात. फक्त सरकारीच न्हय तर खाजगी मळारूय एप्रेन्टींसशीप करपी सरकारी नोकरेचो लाव मेळटलो. हीं ५ हजार पदां भरले उपरांत फुडाराक जे एप्रेन्टींसशीप करतात तांकांय फुडले वर्सा सरकारी नोकरेंत पदां आरक्षीत करतले, अशें गांवकार हांणी सांगलें.
सद्या एप्रेन्टींसशीप करपी भुरग्यांक बरें मानधन मेळटा. खाजगी मळार एप्रेन्टींसशीप करपी भुरग्यांक सरकारी मळा परस चड मानधन मेळटा. सरकारी मळार प्रशिक्षणार्थींक ८ हजार ते १३ हजार रुपया इतले मानधन दर म्हयन्याक मेळटा. जाल्यार खाजगी मळार प्रशिक्षणार्थींक १५ हजार रुपया परस चड मानधन दर म्हयन्यांक मेळटा, अशें गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
