भांगरभूंय | प्रतिनिधी
पणजी : गोंयांत एप्रेन्टीसशीप पुराय करपी सगल्यांत चड बारावी पास भुरग्यांचो आस्पाव आसा. बारावी उपरांत पदवीधर भुरग्यांनी आपली एप्रेन्टीसशीप पुराय केल्या. पूण एप्रेन्टीसशीप पुराय केल्ल्या कितल्या भुरग्यांक नोकऱ्यो मेळ्ळ्यांत हाची म्हायती सरकारा कडेन ना, अशी म्हायती कुशळटाय उदरगत संचालनालयान दिल्या.
राज्य सरकारान मुख्यमंत्री एप्रेन्टीसशीप येवजण चालीक लावन बेरोजगार भुरग्यांक रोजगाराची संद उपलब्ध करून दिवपा खातीर तांकां खाजगी वा सरकारी क्षेत्रांत कांय काळा खातीर प्रशिक्षण दिवन तांची कुशळटाय उदरगत करता आनी प्रशिक्षणाच्या काळांत तांकां मानधन फावो जाता. फाटल्या तीन वर्सांत 25 हजार परस चड भुरग्यांनी एप्रेन्टीसशीप येवजणे खाला आपलें प्रशिक्षण पुराय केलां. वर्साक सरासरी 8 हजार भुरगे एप्रेन्टीसशीप पुराय करतात. 25 हजारां मदले सगल्यांत चड 7114 भुरगे हे बारावी पास आसात, जाल्यार दुसरे सुवातेर 6638 पदवीधर भुरगे आसात आनी तिसरे सुवातेर 4500 धावी पास भुरगे आसात. आयआयटी पास 3974 भुरगे, पदव्युत्तर 1336 भुरगे, डिप्लोमा 1289 भुरगे, 8 वी पास 153 भुरगे आनी णववी पास 121 भुरग्यांनी आपली एप्रेन्टीसशीप पुराय केल्या आनी उरिल्ले भुरगे हेर वेवसायीक अभ्यासक्रम क्षेत्रांतले तशेंच सद्या शिकपी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
