भांगरभूंय | प्रतिनिधी
नेम दुरूस्ती मसुद्यां आड शिक्षण संचालकांक निवेदन सादर
पणजी : राष्ट्रीय शिक्षण धोरणाच्या कार्यवाही खातीर एप्रिलांत वर्ग सुरू करपाची कसलीच गरज ना. एनईपी प्रमाण गरजेचीं शिकोवपाचीं वरां पुराय जावचे खातीर एप्रिलांत वर्ग घेवपाची कसलीच गरज ना. असो दावो करीत पालकांनी एप्रिल सावन वर्ग सुरू करपाक विरोध केला. शिक्षण नेम दुरूस्ती मसुद्याक विरोध करपी निवेदन पालकांनी शिक्षण संचालक शैलेश झिंगडे हांकां सादर केलें.
सेसील रॉड्रिग्ज, सेबी मास्करान्हास, टोनी कार्दोज, पालक शिक्षक संघाच्या वांगड्यांनी शिक्षण संचालकांक निवेदन सादर केलें.
विद्यार्थ्यांचो विचार करिनासतना आनी पालकांक विस्वासांत घेनासतना एनईपीच्या कार्यवाहीची प्रक्रीया सुरू आसा. एप्रिल सावन वर्ग सुरू करपा खातीर नेम दुरूस्तीचो मसुदो गडबडीत जारी केलो. हाका लागून ह्या मसुद्यांतूय चूक उरल्या. तशेंच सुचवण्यां खातीर फकत पांच दिसांचो वेळ दिलो. पांच दिसां मदले तीन दीस सुटी आशिल्ली. तरी मसुद्याक विरोध करतना पालकां वतीन हरकती सादर केल्यात, अशें रॉड्रिग्ज हांणी सांगलें.
विवीध यत्तांनी ज्या पालकांचीं भुरगीं शिकतात, त्या पालकांची बरीच गैरसोय जावपाची आसा. २०२४-२५ वर्सा णववेचे वर्ग जूनांतूच सुरू जाले. तरी शिक्षणाचीं वरां पुराय जालीं. तशेंच ह्यान पयलीं वाडपी तापमानाक लागून धावी आनी बारावेची निमाणी परीक्षा शालान्त मंडळान फुडें धुकलिल्ल्याचो निर्णय घेतिल्लो. एप्रिलांतल्यान वर्ग सुरू करपाक शिक्षक तशेंच मुख्याध्यापकांचोय विरोध आसा. एनईपीच्या निर्णयांचेर ताकतीक जाता, अशें सेबी मास्करान्हास हांणी सांगलें.
सध्या गरमेचें प्रमाण पळयल्यार एप्रिलांत कितें परिस्थिती आसतली, हाचो अदमास करूं येता. जायत्या विद्यालयांनी उदक नासता. फॅनूय नासतात. जरी फॅन आसल्यार ते जायते फावट चलनात, अशी स्थिती आसता. विद्यार्थ्यांचे भलायकेचेर परिणाम जावपाचो भंय सांगेंच्या टोनी कार्दोज हांणी उक्तायलो.
जूनांत वर्ग सुरू केल्यार १२६५ वरां जातात
राष्ट्रीय शिक्षण धोरणा प्रमाण वर्साक शिकोवपाचीं १२०० वरां पुराय जावप गरजेचें. जूनांत जरी वर्ग सुरू जाले तरी २२० दीस मेळटात. दिसाक पावणेस वरां (५ वरां, ४५ मिनटां) विद्यालयां चल्लीं तरी १२६५ वरां शिकोवपाक मेळटात, असो दावो पालकांनी निवेदनांत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
