भांगरभूंय | प्रतिनिधी
आयज 1 एप्रील, आयच्या दिसा पुराय संवसारभर ‘एप्रील फूल दीस’ म्हूण मनयतात. फूल (fool) म्हणजे मूर्ख. ह्या दिसा लोक एकामेकांक फटयतात. तुमी लेगीत ह्या दिसा कोणाक तरी फटयला आसतलो. दुसऱ्यांक फटोवन एप्रील फूल करपाचो आनंद सगळ्यांनी घेतला आसतलो.
एप्रील फूल हे प्रथेची सुरवात केन्ना जाली हें खात्रीन सांगूंक शकना. हाचे विशीं जायत्यो कथा आसात. तातूंतले एके फ्रेंन्च कथे नुसार पंदराव्या शेंकड्यांत फ्रांसात ज्युलियन कॅलेंडर वापरताले. त्या कॅलेंडरा प्रमाण नव्या वर्साची सुरवात 25 मार्च ते 1 एप्रील ह्या सप्तकांत जाताली. ह्या सप्तकांत सगळे लोक वसंत ऋतूचो येवकार आनी 1 एप्रीलाक नवें वर्स मनयताले. पूण 1582 वर्सां सावन फ्रेंच लोकांनी ग्रेगरियन कॅलेंडर मान्य केलें. ह्या कॅलेंडरा प्रमाण नवें वर्स 1 जानेवारी सावन सुरू जाता. हाच्या बदल गांवगिऱ्या वाठारांतल्या अशिक्षीत लोकांक हें खबर नाशिल्लें, तांणी फकत 1 एप्रीलाक नवे वर्स मनयलें, देखून ह्या लोकांक अभिजात वर्ग आनी सुशिक्षित लोक मूर्ख म्हणटाले. जे लोक 1 एप्रीलाक नवें वर्स मनयतात तांकां एप्रील फूल करपाची प्रथा संवासरभर पातळ्ळी. फ्रेंच लोक भारतात आयल्या उपरांत भारतांत लेगीत ही प्रथा सुरू जाली.
1 एप्रीलाक आमचे इश्ट, सोयरे हांकां एप्रील फूल करपाची प्रथा आतां बरीच रुजल्या. काळाच्या बदलाक लागून आतां लोक फेसबूक, व्हॉट्सअॅप, ट्विटर अशा सोशल मिडिया वरवीं एकामेकांक एप्रील फूल करपाक लागल्यात. आपल्या इश्ट आनी सोयऱ्यांक एप्रील फूल करपाची खोस जरी क्षणीक आसली तरी आयचे व्यस्त जिणेंत मोलादीक आसा. दुसऱ्यांक एप्रील फूल करतना दरेकल्यान आपल्या वायट प्रवृत्तींचोय एप्रील फूल करचो. दर दिसा उसरां उठपा परस बेगीन उठून व्यायाम करून एप्रील फूल करात. दर दिसा मोबायल फोन वापरपाचे संवयेक एप्रील फूल करून एक बरें पुस्तक वाचात. सगळ्यां वांगडा एकठांय रावन आपल्या अहंकाराक एप्रील फूल करचो. गरजेवंतांक मजत करून सुवार्थाक एप्रील फूल करचो. व्हडपणाक एप्रील फूल करून ल्हान भुरग्यां वांगडा खेळचें. स्वताच्या मी पणाक एप्रील फूल करून आमी जावन समाजात वावरल्यार एकामेकां विशीं आशिल्ली कोडूपणां कमी जातलीं आनी सगळ्यांक जिणेचो आस्वाद घेवंक मेळटलो.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
