भांगरभूंय | प्रतिनिधी
प्रभाग फेररचणुके खातीर अधिकाऱ्यांची नेमणूक
भांगरभूंय । प्रतिनिधी
पणजी : गोंयांतल्या 11 नगरपालिकांची वेंचणूक एप्रीलांत जातली. 11 नगरपालिकांचे प्रभाग फेररचणुके खातीर अधिकाऱ्यांची नेमणूक जाल्यान वेंचणुकेची प्रक्रिया सुरू जाल्या. पेडणें, दिवचल, म्हापशें, वाळपय, मुरगांव, मडगांव, कुंकळ्ळी, केपें, कुडचडें- काकोडें, काणकोण आनी सांगें ह्या 11 नगरपालिकांची वेंचणूक वांगडा जातली, अशी म्हायती राज्य वेंचणूक आयोगाच्या गोपां कडल्यान मेळ्ळ्या.
पणजी म्हापालिकेची वेंचणूक 11 मार्चाक जातली.
एप्रीलांत 11 नगरपालिकांचो कार्यकाळ सोंपता. हाका लागून एप्रील मेरेन वेंचणूक जातली. सांखळी आनी फोंडें ह्या दोन नगरपालिकांचो कार्यकाळ अंदूं सोंपना. हाका लागून सांखळी आनी फोंडें नगरपालिका सोडून हेर 11 नगरपालिकांची वेंचणूक एप्रीलांत जातली. प्रभाग फेररचणुकेचो आदेश जारी जाल्या.
ज्या म्हालांत नगरपालिका येता, त्या म्हालाचो उपजिल्होधिकारी हो वेंचणूक नोंदणी अधिकारी (ईआरओ) जाल्यार मामलेदार हो सहाय्यक वेंचणूक नोंदणी अधिकारी (एईआरओ) आसतलो. तांचे नियुक्तीचो आदेश जारी जाला. प्रभागांतले मतदार तशेंच शिमो निश्चीत जाले उपरांत ते विशींची अधिसुचोवणी जारी जातली. हाचे उपरांत दरेके पालिके खातीर आरक्षणाची अधिसुचोवणी जारी जातली. उपरांत वेंचणुकेची तारीख निश्चीत जातली. मार्चांतूच 11 पालिकांच्या वेंचणुकेची तारीख जाहीर जातली.
म्हापशें, मुरगांव, मडगांव, केपें आनी सांगें या नगरपालिकांची वेंचणूक 23 एप्रील 2021 ह्या दिसा जाल्ली. हाका लागून ह्या पांच नगरपालिकांचो कार्यकाळ एप्रीलांत सोंपता. पेडणें, दिवचल, वाळपय, कुंकळ्ळी, काणकोण, कुडचडें- काकोडें ह्या नगरपालिकांची वेंचणूक 20 मार्चाक जाल्ली. ह्या नगरपालिकांचो कार्यकाळ बेगीन सोंपता म्हूण ह्या पालिकांचेर कांय काळा खातीर प्रशासक नेमपाचो प्रस्ताव आसा. फोंडें मतदारसंघाची पोटवेंचणूक लेगीत एप्रीलांतूच जावपाची आसा. मात ही घोशणा केंद्रीय वेंचणूक आयोगा वतीन जातली. नगरपालिका वेंचणुकेची घोशणा राज्य वेंचणूक आयोग करतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
