भांगरभूंय | प्रतिनिधी
पालकांनी भेटयलें शिक्षण संचालकाक निवेदन
भांगरभूंय । प्रतिनिधी
पणजी : राष्ट्रीय शिक्षण धोरणाचे कार्यवाही खातीर एप्रीलांत वर्ग सुरू करपाची कसलीच गरज ना. एनईपी प्रमाण गरजेचीं शिकोवपाचीं वरां पुराय जावचे खातीर एप्रीलांत वर्ग घेवपाची कसलीच गरज ना. असो दावो करून पालकांनी एप्रील सावन वर्ग सुरू करपाक विरोध केला. शिक्षण नेम दुरूस्ती मसुद्याक विरोध करपी निवेदन पालकांनी शिक्षण संचालक शैलेश झिंगडे हांकां सादर केलें.
सेसील रॉड्रिग्ज, सेबी मास्करान्हास, टोनी कार्दोज, पालक शिक्षक संघाच्या वांगड्यांनी शिक्षण संचालकांक निवेदन सादर केलें.
विद्यार्थ्यांचो विचार करिनासतना आनी पालकांक विस्वासांत घेनासतना एनईपीचे कार्यवाहीची प्रक्रिया सुरू आसा. एप्रील सावन वर्ग सुरू करपा खातीर नेम दुरूस्तीचो मसुदो गडबडींत जारी केलो. हाका लागून ह्या मसुद्यांतूय चूक उरल्या. तशेंच सुचवण्यां खातीर फकत पांच दिसांचो वेळ दिलो. पांच दिसां मदले तीन दीस सुटी आशिल्ली. तरी मसुद्याक विरोध करतना पालकां वतीन हरकती सादर केल्यात, अशें रॉड्रिग्ज हांणी सांगलें.
विवीध यत्तांनी ज्या पालकांचीं भुरगीं शिकतात, त्या पालकांची बरीच गैरसोय जावपाची आसा. 2024 – 2025 वर्सा णववेचे वर्ग जूनांतूच सुरू जाले. तरी शिक्षणाचीं वरां पुराय जालीं. तशेंच हे आदीं वाडपी तापमानाक लागून धावी आनी बारावेची निमाणी परिक्षा शालान्त मंडळान फुडें धुकलपाचो निर्णय घेतिल्लो. एप्रीलांतल्यान वर्ग सुरू करपाक शिक्षक तशेंच मुख्याध्यापकांचोय विरोध आसा. एनईपीच्या निर्णयांचेर ताकतीक जाता, अशें सेबी मास्करान्हास हांणी सांगलें. सध्या गरमेचें प्रमाण पळयल्यार एप्रीलांत कितें परिस्थिती आसतली, हाचो अदमास करूं येता. जायत्या विद्यालयांनी उदक नासता. फॅनूय नासतात. जरी फॅन आसल्यार ते जायते फावट चलनात, अशी स्थिती आसता. विद्यार्थ्यांचे भलायकेचेर परिणाम जावपाचो भंय सांगेंच्या टोनी कार्दोज हांणी उक्तायलो.
जूनांत वर्ग सुरू केल्यार 1265 वरां जातात
राष्ट्रीय शिक्षण धोरणा प्रमाण वर्साक शिकोवपाचीं 1200 वरां पुराय जावप गरजेचें. जूनांत जरी वर्ग सुरू जाले तरी 220 दीस मेळटात. दिसाक पावणेस वरां (5 वरां, 45 मिणटां) विद्यालयां चल्लीं तरी 1265 वरां शिकोवपाक मेळटात, असो दावो पालकांनी निवेदनांत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
