भांगरभूंय | प्रतिनिधी
पालक : परिणामांचो विचार करूंक नाशिल्ल्याचें म्हणणें
भांगरभूंय । प्रतिनिधी
पणजीः एप्रीलांत शाळा सुरू केल्यार तांचो परिणाम विद्यार्थी, शिक्षक आनी पालकांचेर कितें जातलो, हाचो विचार करपाचें सोडून राष्ट्रीय शिक्षण धोरणाची अंमलबजावणी करपी गोंय हें पयलें राज्य करपाचेर मुख्यमंत्री चड भर दितात. शाळा एप्रीलांत सुरू करपा संबंदांत आपल्यो हरकती मांडपाक उणो वेळ दिला, अशी खंत मुख्याध्यापक संघटणेन उक्तायल्या. तशेंच एप्रीलांत कंत्राटी शिक्षकांचें प्रशिशण थारयिल्यान एप्रीलांत शाळा कशी सुरू जातली, असो प्रस्न पालकांनी उपस्थीत केला.
एप्रील सावन शिक्षणीक वर्ग सुरू करपाक पणजे आनी ताळगांवच्या पालकांनी पणजे आझाद मैदानाचेर पत्रकार परिशद आपयल्ली. ह्या वेळार उलयतना पालक सेसील रॉड्रिग्स हांणी सांगलें, शिक्षक संघटणा आनी मुख्याध्यापक संघटणेन एप्रीलांत वर्ग सुरू करपा संबंदांतल्यो आपल्यो हरकती मांडून शिक्षण संचालनालयाक निवेदन भेटयलां.
एप्रीलात उबाळ खुबूच जाता आनी ताचो परिणाम विद्यार्थी तशेंच शिक्षण कर्मचाऱ्यांचेर जावपाक शकता. खूबश्या शाळांनी सुविधा सुदारपा खातीर सरकारा कडेन निधी मागिल्लो, पूण तांकां कसलोच निधी मेळूंक ना. तशेंच कंत्राटी शिक्षकांक कायम सेवेंत आस्पावन घेवचे. तशेंच शाळेचे सुरक्षा कर्मचारी आनी ग्रंथालयांतले कर्मचाऱ्यांची नेमणूक जून ते मार्च मजगती जाता. एप्रीलांत भुरग्यांची जतनाय कोण घेतलो, अशी खंत मुख्याध्यापक संघटणेन लेखी उक्तायल्या, अशें सेसील हांणी सांगलें.
यत्ता 6 वी मेरेनच्या शिक्षकांक 24 ते 28 मार्च मजगती अभ्यासक्रम प्रशिक्षणा खातीर धाडचे, अशें परिपत्रक राज्य शिक्षण संसोधन आनी प्रशिक्षण परिशद (एससीआरटी) हांणी काडलां. चडश्यो वरिश्ठ शिक्षिका धावीचे पेपर तपासपा खातीर व्यस्त आसात. ते भायर गणीत आनी विज्ञान विशयाच्या शिक्षकांचें प्रशिक्षण एप्रीलांत सुरू जाता. देखून प्रशिक्षण पुराय जावचे पयलीं शिक्षणीक वर्स कशें सुरू जावं येता, असो प्रस्न सेसील हांणी उपस्थीत केलो.
अंदूंचें शिक्षणीक वर्स पुराय जायत आयलां तरी लेगीत नव्या शिक्षणीक वर्साचे अंमलबजावणे खातीर शिक्षक, पालक आनी विद्यार्थ्यां कडल्यान कसल्योच सुचोवण्यो घेवंक नात, अशें पालक जोव्हलीन दाल्गाद हांणी सांगलें. शिक्षकांची संख्या उणी आशिल्ल्यान वेवसायीक विशय सुरू करपाक आदींच कळाव जावप ही गंभीर गजाल. नियोजन नाशिल्ल्यान हाचो परिणाम यत्ता सवीचेर दिसून येतलो. सवी यत्तेंत 11 वर्सांची भुरगीं शिकतात. हे खातीर वेवसायीक शिक्षण घेवपाक तांकां संरचीत प्रक्रिया लागतली आनी पालकाचे मजती बगर शक्य ना, अशें दाल्गाद हांणी सांगलें.
हरकती दिवपाचे मुजतींत वाड
एप्रीलांत शिक्षणीक वर्स सुरू करपाक सुचोवण्यो आनी हरकती दिवपाचे मुजतींत सरकारान वाड केल्या. पयली सरकारान पांच दिसांची मुजत दिल्ली, पूण शेनवारा सरकारान सुदारीत अधिसुचोवणी उजवाडाक हाडून ही मुजत पांच दिसां वयल्यान 15 दीस मेरेन वाडयल्या. आतां शिक्षक, पालकांक आपलें म्हणणें 26 मार्च मेरेन मांडपाक मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
