भांगरभूंय | प्रतिनिधी
चिंचणीचे बालग्रामसभेंत भुरग्यांनी उक्तायलीं मतां
भांगरभूंय । प्रतिनिधी
मडगांव : चिंचणी देवसू पंचायतीन बालग्रामसभेचें आयोजन केल्लें. हे ग्रामसभेंत भुरग्यांनी गांवांतल्या विवीध प्रस्नांचेर चर्रचा करतना 50 परस अदीक सुचोवण्यो केल्यो. तातूंत नितळसाण आनी खेळां संबंदांत सुविधांची मागणी केली. एप्रीलांत शाळा सुरू करपाच्या निर्णयाचेर लेगीत भुरग्यांनी नाराजी उक्तायली. उश्ण वातावरणांत अभ्यास करप कठीण आशिल्ल्याचें मत तांणी उक्तायलें.
चिंचणी मावंट मेरी हायर सेकंडरी स्कूल आनी एंजल्स कॉन्व्हेंट हायस्कुलाच्या विद्यार्थ्यांनी पंचायतीन आयोजीत केल्ले बाल ग्रामसभेंत वांटो गेतलो. तांकां सतावपी साबार समस्या तांणी मांडल्यो. विद्यार्थ्यांनी सुमार 50 सुचोवण्यो सादर केल्यो, तातूंत नितळसाण आनी नितळसाणी संबंदीच्यो समस्या सोडोवपाची मागणी आशिल्ली. ते भायर खेळां सुविधांचो विस्तार करपाची आनी गरजेची साधनां दिवपाची तशेंच मुळावी नागरी गरज म्हूण सुरळीत वीज पुरवण गरजेचें आशिल्ल्याचें सांगलें.
एप्रीलांत शाळा सुरू करपाचो निर्णय चुकीचो आसा. ह्या म्हयन्यांत गरमेचो त्रास सोंसचो पडटा. अश्या वातावरणांत अभ्यासाचेर लक्ष केंद्रीत करप कठीण जाता, अशेंय विद्यार्थ्यांनी स्पश्ट सांगलें.
ग्रामसभे वेळार डॉ. गुणाजी देसाय हांणी हे प्रक्रियेंत भुरग्यांक मार्गदर्शन केलें. तांणी सांगलें, बालग्रामसभा हो पंचायतीचो बरो उपक्रम आसा, आयच्या काळाची गरज आसा. तातूंत पंचायतीचें काम समजपाक तांकां मजत जाली. गांवांतल्यो समस्या मांडपाची योग्य माची मेळ्ळी. पंचायतीक लगीत ल्हान भुरग्यांच्यो समस्या आनी तांच्या मनांतली गांवाची संकल्पना कळ्ळी. सरपंच फ्रँक व्हिएगश हांणी सांगलें, पोरूं लेगीत बालग्रामसभा आयोजीत केल्ली. भुरग्यांनी वांटेकार जावचे आनी तांच्या मनांतलें उलोवपा खातीर हो एक उपक्रम आसा. तांणी उपस्थीत केल्ले मुद्दे पंचायतीच्या पांवड्यार, तांच्या वेवस्थापन पांवड्यार तशेंच संबंदीत विभागा कडेन उपस्थीत कररतले. शाळा एप्रीलांत सुरू करपाचो निर्णय भुरग्यांक योग्य दिसना, हे संबंदांत संबंदीत विभागा कडेन संपर्क करतले, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
