एप्रिलांत शिक्षणीक वर्स सुरू करपाक घेतलो आक्षेप

भांगरभूंय | प्रतिनिधी

म्हापशें ः गोंयांत एप्रील म्हयन्या सावन शिक्षणीक वर्स सुरू करपाक कांय समाजीक कार्यकर्त्यांनी खर आक्षेप घेतला. हे संबंदी शिक्षण संचालक शैलेश झिंगडे हांकां निवेदन सादर केलां. समाज कार्यकर्ते संजय बर्डे, शंकर पोळजी, दीपेश नायक आनी सितेश मोरे हांणी हें निवेदन शिक्षण संचालकांची भेट घेवन तांकां पर्वरे भेटयलें.
गोंयच्या वातावरणाची म्हायती शिक्षण खात्याक आसा. पावस, शीं आनी गिमाचेर आमचें वातावरण निंबून आसता. गिमाचो हंगाम सामको उश्ण आसता आनी जायत्या पिळग्यां पसून शाळो आनी महाविद्यालयां ह्या काळांत बंद आसतात. कारण सरकार उष्ण हवामानाक लागून सर्वशिक्षण आनी विद्यार्थ्यांक सुटी दिता. मात येवपी एप्रीला सावन फुडलें शिक्षणीक वर्स सुरू करपाची गोंय सरकार तयारी करता, अशी म्हायती थळाव्या दिसाळ्यां वरवीं आमकां मेळ्ळीं. सरकाराक शाळा हो वेवसाय दिसता काय? खर वताचे उश्णतायेन आमची भुरगीं वर्गांत योग्य शिक्षण घेवपाक शकतलीं? सरकार शासकी वा खाजगी शाळांक एसी दितलें? अशे प्रस्न ह्या निवेदनांत ह्या समाज कार्यकर्त्यांनी विचारल्यात.
हेर राज्यांनी थंयच्या हवामाना प्रमाण शाळांक सुटी दितात. मात, गोंय सरकार विद्यार्थ्यांच्या जिवा कडेन खेळपाचो यत्न करता आनी हांगाच्या पालकांक उलोवपाक जमना. हाका लागून आमची एप्रिल सावन शिक्षणीक वर्स सुरू करचें न्हय अशी मागणी आशिल्ल्याचें ह्या निवेदनांत नमूद केलां.