भांगरभूंय | प्रतिनिधी
नव्यान उजवाडाक आयिल्ल्या फायलींनी उंचेल्या पांवड्यावेल्या वा प्रभावी लोकांचें नांव सांगपी ईमेलय आसात — तातूंत राजकारणी, वेवसायीक
सध्या देशभरांत एपस्टीन फायल हो विशय गाजता. हो जेफ्री एपस्टीन ह्या एका गिरेस्त आनी प्रभावी अमेरिकी व्यक्तीच्या जिवित आनी वेव्हारा कडेन संबंदीत हजारांनी दस्तावेज, ईमेल, अहवाल आनी डीओजेच्या (अमेरिकन न्याय खातें) दस्तावेजांचो व्हड संग्रह. एफबीआय आनी हेर संस्थांनी केल्ले चौकशीच्यो नोंदी, ईमेल संपर्क, आरोप आनी कागाळींचो तपशील, कांय प्रत्यक्ष फोटो आनी हेर पुरावे लेगीत भितर आसात.
जेफ्री एपस्टीनाक 2019 इस्वेंत अल्पवयीन भुरग्यांचें लैंगीक शोशण आनी मनीस वेव्हार ह्या गंभीर आरोपां खाला अटक केल्ली. उपरांत तो बंदखणींत मेल्लो मेळ्ळो — त्या वेळार चवकशी चालू आशिल्ली. ‘एपस्टीन फायली पारदर्शकता कायद्या’ खाला 30 जानेवारी 2026 दिसा फायलींचो व्हडलो वांटो जाहीर केल्लो.
फायलींनी कसली म्हायती आसा?
1. लैंगीक वेपार आनी लैंगीक शोशण
० एफबीआय आनी हेर कायदो संस्थांनी नेण्ट्या चलयांचो लैंगीक शोशणाच्यो कागाळी आयकल्ल्यो.
० कांय चलयांक लैंगीक कामां खातीर वापरपाक पयशे दिल्ले, अशें अहवालांत म्हणलां.
० हे प्रकार न्यूयाॅर्कांतल्या पाम बीचा वयल्या झोरो रँचाचेर घडले, कांय अमेरिकेच्या विर्जिन जुंवीं, लिटल्स सेंट जेम्स जुंव्याचेर आनी पॅरिसांत घडले असो संदर्भ मेळटा. थंय एपस्टीनाचे बंगले, कार्यालयां बी आसात. मात, हातूंत थळाव्या सरकारांचो दोश आसा, अशें कोणें खंयच म्हणूंक ना. हें सगलें गुपचूप चलतालें.
2. नैतीक आनी कायदेशीर आरोपांचो तपशील
० एपस्टीनाचो संपर्क आशिल्ल्या वा ई-मेल संवादांत उल्लेख केल्ल्या लोकांची नोंद फायलींनी आसा.
० हातूंतल्या कांय गजालींचो उल्लेख (बलात्कार, जबरदस्ती वा हेर लैंगीक कृत्यां विशीं) सूत्रांनी केला, पूण…..
० हे फकत आरोप वा संदर्भ. अर्थात, ते पुरावो म्हणून मान्य जावंक नात.
देखीक, एका दस्तावेजांत अमेरिकेचे अध्यक्ष ट्रम्पाचेर ‘बलात्काराचो आरोप’ आसा, पूण कसलेच औपचारीक आरोप दाखल करूंक नात वा ख्यास्त जावंक ना.
3. ईमेल, फोटो आनी हेर संपर्क
० नव्यान उजवाडाक आयिल्ल्या फायलींनी उंचेल्या पांवड्यावेल्या वा प्रभावी लोकांचें नांव सांगपी ईमेलय आसात — तातूंत राजकारणी, वेवसायीक, नामनेचे व्यक्ती हांचो संदर्भ आसूं येता. पूण फकत नांवां येवप म्हणजे गुन्यांवकार थारना — हे अस्पश्ट संदर्भ वा संवाद आसूं येतात.
बलात्कार, खून, गर्भपात आरोपांचें कितें?
बलात्कार: कांय फायलींनी खाजगी आरोप आसात. देखीक, ट्रम्पाचेर बलात्काराचे आरोप, पूण तो अजून न्यायालयांत सिद्ध जावंक ना.
खून: एपस्टीन स्वता बंदखणींत मेलो (आत्महत्या अशें सांगतात, पूण कांय मतभेद आसात), पूण कोणे तरी खून केला हें अधिकृतपणान खंयच सिद्ध जावंक ना.
गर्भपात: गर्भपाता संबंदीत ठोस पुरावे वा दावे हांचो फायलींनी उल्लेख ना. ह्या फायलींनी अजूनय खूब डेटा रेडॅक्टेड (ब्लॅक केला) आसा, देखून जायते भाग अस्पश्ट आसात.
भारता कडेन संबंद?
नव्या फायलींनी जायत्या नामनेच्या राजकारणी, उद्देजक आनी प्रभावी लोकांचे संदर्भ आसात — देखीक, एलान मस्क, प्रिन्स अँड्र्यू, रिचर्ड ब्रॅन्सन. कांय ईमेलांनी प्रिन्स अँड्र्यू आनी व्हर्जिनिया जियुफ्रे हांचोय फोटो आनी तांचो संदर्भ आसा. सोशल मिडियाचेर वा खबरांपत्रांनी कांय भारतीय राजकारण्यांचो उल्लेख वा नांवां आयल्यात, पूण… अधिकृत वा सिद्ध जाय सारकें तथ्य ना.
भारत सरकारान वा ताच्या संबंदीत संस्थांनी हे आरोप न्हयकारल्यात. रेड्डीट वा सोशल पोस्टांनी दिसपी नांवां आनी गुन्यांवांचे थेट दुवे ह्यो दोन वेगळ्यो गजाली — फाटले संदर्भ आनी वैयक्तीक ईमेल संवाद म्हणल्यार गुन्यांवकारी आरोपाचे पुरावे न्हय.
कायदेशीर प्रक्रिया सुरू
कांय देशांनी ह्या फायलीं संबंदी राजकी आनी कायदेशीर प्रक्रियाय सुरू जाल्यात (देखीक- नॉर्वेंतल्या आदल्या प्रधानमंत्रीची चवकशी). नव्या ईमेल दस्तावेजांनी रॅपर आनी वेवसायीक आशिल्ले अशे पोरणे आरोप आनी वाद परतून जिवे केल्यात.
भारत संबंदीत दावे/ चर्चा
मिडिया रिपोर्टांनी आनी सोशल मिडिया पोस्टांनी भारताचो उल्लेख आयला, पूण आरोप सिद्ध जावंक नात.
1. हरदीप सिंग पुरी संदर्भ : टीएमसीच्या महुआ मोयत्रान एपस्टीनान पुरी हांकां एकल्याक व्हिसा प्रक्रिया सोंपी करपाची विनवणी केल्ली असो ईमेल संदर्भ शेअर केला — स्पश्टीकरण आनी अर्थ हाचेर मात वाद आसात.
2. अनुराग कश्यप आनी कांय भारतीय नांवां : कांय वेबसायटींनी कश्यप, व्हडले राजकारणी, सामके व्हडले उद्देगपती वा भारतीय-अमेरिकन लोकांचीं नांवां जोडिल्लीं अशें म्हणटात. पूण हें आरोप अजून सिद्ध जावंक नात.
3. आदले भारतीय अधिकारी यशवर्धन कुमार सिन्हान सोशल मिडियाचेर आपल्या नांवा कडेन संबंदीत आशिल्ल्या दावे न्हयकारल्यात.
4. सोशल मिडियाचेर जायतीं उलोवपां आनी अदमास आयल्यात. सरकार पक्षा कडेन संबंदीत आशिल्ल्याचे उल्लेख आसात — पूण अधिकृत पुराव्यांचो उणाव आशिल्ल्यान ह्या दाव्यांक व्हड जतनायेन पळोवपाची गरज आसा. म्हणल्यार दस्तावेजांत भारतीय फुडाऱ्यांच्या वा नागरिकांच्या नांवांचो फक्त उल्लेख आयलो, म्हणजे हाचो संबंद गुन्यांव वा गैरवेव्हारा कडेन आसा हें सिद्ध जायना.
महत्वाचे मुद्दे
० फायली पुरायपणान प्रकाशीत जावंक नात; जायते भाग संपादीत केल्यात (काळे केल्यात).
० उल्लेख वा नांव येवप हें स्वताच कसलोच गुन्यांवकारी पुरावो सिद्ध करिना — आनी जायत्या जाणांनी व्यक्तींचीं नांवां आसपा विशीं स्पश्टीकरण लेगीत दिलां. अजून तरी आरोप सिद्ध जावंक नात.
भारत सरकाराचें नांव बदनाम जातलें, अशीं सध्या तरी पुराव्याचेर आदारिल्लीं तथ्यां उपलब्ध नात — पूण लोकां मदीं चर्चा आनी आरोपांचे संदर्भ पातळटात. परराश्ट्र मंत्रालयान स्पश्ट केलां की फकत उल्लेख वा ईमेल संदर्भ हे भारत सरकार वा प्रधानमंत्र्यांच्या विरोधांतले पुरावे न्हय. तांकां “निराधार अदमास” म्हणत तांणी न्हयकारलां.
कांय राजकी फुडाऱ्यांनी फायलीं विशीं टीका आनी दावे केल्यात (देखीक, कांय ईमेल संदर्भांनी भारत-अमेरिका धोरणाचेर दबाव येता अशें म्हणप), पूण हीं तथ्यां समाजीक आनी राजकी वादाचे भाग; तांकां अजून खंयच्याच स्वतंत्र, अधिकृत पुराव्यांचो आदार मेळूंक ना.
सद्या उपलब्ध आशिल्ल्यो फायली, कांय ईमेल आनी संवादांनी कांय नांवां आयल्यांत, पूण ते दोशी आसात, असो पुरावो ना. खंयच्याच भारतीय फुडाऱ्याचेर खटलो चलना वा आरोपपत्र दाखल करूंक ना. खंयचीच संबंदीत घडणूक, बसका, वेवसाय वा ईमेल संदर्भ गुन्यांवकारी करणे कडेन थेट जोडिल्लो ना. पूण, ह्यो फायली फक्त भारतूच न्हय. तर संवसारभर चर्चेचो विशय थारल्यात.
– ज्ञानदीप पोतेकार
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
