भांगरभूंय | प्रतिनिधी
यत्ता तिसरी सावन विद्यार्थ्यांक शिकयतले भारतीय जवानांची गाथा
नवी दिल्ली, खबरां संस्था: एनसीईआरटी (नॅशनल काउन्सिल ऑफ एज्युकेशनल रिसर्च अँड ट्रेनिंग) हांणी आपल्या अभ्यासक्रमांत ‘ऑपरेशन सिंदूर’ हाचो आसपाव केला. ऑपरेशन सिंदूराचें लश्करी आनी तंत्रीक येस आनी तातुंतल्यान दिल्लो राजकी संदेश विद्यार्थ्यांक शिकयतले. एनसीईआरटीन दोन अभ्यासक्रम काडला… हाचे खाला तिसरी ते बारावेच्या वर्गांतल्या विद्यार्थ्यांक पहलगामांतल्या आतंकवादी हल्ल्या विशीं म्हायती दितले. उपरांत भारतीय सैन्यान केल्ली ऑपरेशन सिंदूर हे मोहिमे विशीं म्हायती दितले. ह्या अभ्यासक्रमा वरवीं फकत हल्लो, युद्ध आनी जाप इतलेंच शिकोवचे ना. जाल्यार भारताची राजकीय भुमिका, शांतता आनी सुरक्षितताये खातीर भारतान उबारिल्लें पावल, शांतते खातीर भारताचो आग्रो हे विशीं सविस्तर म्हायती दिल्या.
विद्यार्थ्यांक कितें शिकयतले?
पहलगामांतल्या आतंकवादी हल्ल्यांत पाकिस्तानान आपलो वांटो ना असो दावो केला. तरी हो हल्लो ताच्या लश्करी अधिकार्यांच्या आनी राजकी फुडारपणाच्या थेट आदेशा प्रमाण जाला अशें ह्या अभ्यासक्रमांत म्हळां. ते उपरांत भारतान ऑपरेशन सिंदूरांतल्यान दुस्मानाक फावो ती जाप दिली. पूण ही फकत लश्करी कारवाय नाशिल्ली. शांतताय आनी आत्मसंरक्षणा खातीर घेतिल्लें तें पावल आशिल्लें. ही मोहीम भारता खातीर मानाची आनी निश्चयाचें प्रतीक.
पहलगामांत आतंकवादी हल्ल्याचो उल्लेख पाकिस्तानान केल्लो कट
२२ एप्रिल २०२५ दिसा जम्मू-काश्मीरांतल्या पहलगामांत आतंकवादी हल्लो जालो. ह्या हल्ल्यांत २६ पर्यटकांक मरण आयलें. ह्या हल्ल्याचो उल्लेख एनसीईआरटीच्या अभ्यासक्रमांत मेळटा. अभ्यासक्रमांत म्हणलां, पाकिस्तान आनी ताच्या नेतृत्वान, लश्करी अधिकार्यांनी हो कट शिजयला आनी पुराय केल्लो. मात, पाकिस्तानान सेगीत भारताचे आरोप भायर मारल्यात.
हे लश्करी मोहिमेक सिंदूर अशेंं नांव दिवपा फाटल्यान, शहिदांच्या बायलांचो सन्मान हे हेतू हाचे फाटलो आसा. शहिदांच्या बायलांनी देशा खातीर केल्ल्या त्यागाचो सन्मान करपा खातीर हे मोहिमेक ऑपरेशन सिंदूर अशें नांव दिल्ल्याचें एनसीईआरटीच्या अभ्यासक्रमांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
