भांगरभूंय | प्रतिनिधी
नरेंद्र मोदी हांच्या फुडारपणा खाला भाजपा प्रणीत एनडीए सरकार स्थापन करता. 2014 आनी 2019 त भाजपान स्वबळार
सत्ता मेळयिल्ली. 2014 त संघटणांचें सुसंघटीत कार्य आनी 2019 त मोदी ल्हाराच्या नेटार भाजपान सरकार स्थापन केल्लें. त्या वेळार वांगडी पक्ष भाजपा खातीर नांवांक जाय आशिल्ले. निर्णय घेवपा खातीर वांगडी पक्षांक कितले विचारताले ते पक्षश्रेश्ठीच जाणात. मात, अंदूंचे वेंचणुकेंत भाजपा 240 सुवातांचेर आडकली आनी वांगडी पक्षांची सामकीच गरज पडली. आतां सरकार स्थापन जाता तें भाजपाचें म्हणचें परस खऱ्या अर्थान एनडीएचें म्हणचें पडटलें. भाजपाचो फुडार एनडीएच्या वांगडी पक्षांच्या हातांत आसा.
प्रधानमंत्री म्हूण सेगीत तिसरे फावटी सोपूत घेवपा खातीर नरेंद्र मोदी सज्ज आसात. ‘अब की बार मोदी सरकार’ म्हणीत फाटले दोन खेपे भाजपान सत्ता गाजयली. आतां ‘अब की बार एनडीए सरकार’ म्हणीत सत्ता स्थापन करपाची तयारी चालू आसा. भाजपान फाटल्या 10 वर्सांत खूबश्या मळार बरें काम करतना गरज आसा थंय आक्रमक भुमिका घेतली. जम्मू कश्मीरांतलें कलम 370 वेवस्थीत आंखणी करून काडलें. 3 नवे कायदेय चालीक लायले. मात, आतां आक्रमक भुमिका घेवपाची आसत जाल्यार वांगडी पक्षांची मर्जी सांबाळची पडटली. आमी सांगता तो शब्द निमाणो, ही वृत्ती सोडून, हाचेर कितें करुया? अशें विचारपी मवाळ भुमिका घेवची पडटली. सत्ता राखतले जाल्यार कांय गजाली चालीक लायतले जाल्यार कांय प्रमाणांत मवाळ भुमिका घेवचीच पडटली.
नितीश कुमार आनी चंद्राबाबू नायडू हांकां नव्या राजकी समिकरणान खुबूच वजन आयलां. इंडी आघाडी कडल्यान अचकीत संबंद तोडून नितीश कुमार एनडीएंत पाविल्लो. एनडीएचो घटक पक्ष म्हूण वेंचणुकेंत देंवतना ताणें बरें पैकीं येस जोडलां. ह्या येसाच्या नेटार तें आतां नव्या सरकारांतल्या मंत्र्यांक, सुप्रिमोंक आपल्याक जाय तसो कामाक लावंक शकता. युती पक्ष म्हूण जिखून येवप आनी जिखले उपरांत तेंको दितना नेम – अटी घालप, हो प्रकार खूब आदीं सावन चल्ला. हे वेंचणुके वेळारूय तशेंच जालां. तेंको दिवपाक वांगडी पक्षांनी कांय अटी घाल्यात. तांच्यो सगल्योच अटी मान्य करप कोणाकूच शक्य ना. तातूंतले तातूंत भाजपान संयम राखला ही व्हड गजाल. युती धर्म पाळटना तेवूय अटी सदळ करपाक शकता.
अंदूंची लोकसभा वेंचणूक भाजपा आड इंडी आघाडी अशी नाशिल्लीच. एनडीए आड इंडी आघाडी अशी आशिल्ली. एनडीएंत बीजेपी आनी 36 पक्ष आशिल्ले. जाल्यार इंडी आघाडींत काँग्रेसी बरोबरच आनीक 36 पक्ष आशिल्ले. म्हणल्यार देशांतल्या 37 पक्षांची 37 पक्षां आड सत्ते खातीर सरळ झूज आशिल्लें. ह्या झुजांत एनडीए सरस थारलो. आतां जें सरकार स्थापन जाता तें एनडीएचें. भाजपा हो ह्या एनडीएचो मुखेल घटक. बाकीच्या सगल्या पक्षांक सांबाळून फुडें वचपाची सर्कस ह्या पक्षाक करची पडटली.
भाजपान ‘अब की बार चार सौ पार’ म्हणीत वर्सभर वादळी प्रचार केलो. साडेतिनशें भाजपाचे, उरिल्ले एनडीए वांगड्यांचें अशें गणीत आशिल्लें. एनडीएच्या हेर वांगडी पक्षांनी तांचें काम दिस्त केलें. 53 सुवातो जिखून तांची तांक सिद्ध केली. अपेस आयलें तें भाजपाक. बाकीच्या पक्षांनी तांच्या राज्यांनी बरी कामगिरी करतना लोकविस्वास जिखलो. भाजपाक तांणी दवरिल्ल्या 350+ टार्गेटा परस 110 सुवातो उण्यो पडल्यो.
भाजपान आपलो विजयरथ नेटान फुडें व्हरतना बारीक-सारीक घटकांचो लोकांचो विचारूच करूंक ना काय कितें? असो विचार करपाची आतां वेळ आयल्या. सरकार स्थापन जाले उपरांत सगल्या पक्षां बरोबर चर्चा करतना ह्या विशयाचेरूय चर्चा जातलीच.
इंडी आघाडीन, खासा करून तांचो मुखेल पक्ष काँग्रेसीन भाजपाचेर संविधान बदलपाक सोदता म्हूण आरोप केलो. लोकांक तो खरोय दिसलो, ताका कारणूय तशेंच आशिल्लें. भाजपान हाचें पयलीं अशी कठीण कर्तुबां तडीक लायल्यांत. जम्मू कश्मीरांतल्यान कलम 370 तडिपार जायत म्हूण कोणें चिंतिल्लें? तशेंच भाजपान 3 नवे कायदेय चालीक लायले. तेन्ना भाजपाक 400 परस मायज सुवातो मेळ्ळ्यार ते संविधान बदलतले म्हूण गरीब जनता भियेली, ह्या भंयानूच भाजपाक धपको दिलो. हो धपको इतलो जबरदस्त आशिल्लो की भाजपाचे 400 ची मोख पयसूच उरली, 300 चो आंकडोय गाठप कुस्तार जालो. एकवेळ इंडिया आघाडी भाजपाक धपको दिता काय कितें अशी परिस्थितीय निर्माण जाल्ली.
राहूल गांधीची फकांडां करपाचे सोडून लोकांक संविधान बदलचे नात, तुमच्या बऱ्या खातीर कांय गजाली जाग्यार घालतां अशे तरेचो भाजपान प्रचार केल्लो जाल्यार एकवेळ गरीब लोकांक तें समजून येतलें आशिल्लें. मात, हायटेक प्रचार, उत्सवी वातावरण, थारावीक लोकांचेरूच विस्वासून रावप अश्या प्रकाराक लागून भाजपा सामान्य लोकां कडच्यान पयस गेली, अशें म्हणूं येता.
दुसरे वटेन राहूल गांधी देशभर पदयात्रा काडपाचे निमतान चडश्या लोकां मेरेन पावलो. प्रियंका गांधीनूय प्रचाराक नेट धरतना युपींतल्या गांवांनी प्रचार केलो. देशभर मोदी ल्हार, उत्सवी वातावरण आसतना, तशेंच वेगळ्यावेगळ्या प्रकरणांत अडचणींत सांपडुनूय काँग्रेसीन, इंडी आघाडीन बरी कामगिरी करतना भाजपाचो गड हालयलो. लोकसभेंत पयलीं भाजपाचोच आवाज चड दिसतालो, आतां तितल्याच नेटान विरोधकांचोय आवाज दिसतलो. तातूंतच एनडीएंतल्या वांगडी पक्षांची मर्जी राखूंक ना जाल्यार हातांतल्यान सत्ता वचपाचो भंयूय भाजपाक
आसतलोच.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
