एनडीए सरकारा कडल्यान लोकांच्यो व्हड अपेक्षा

भांगरभूंय | प्रतिनिधी

लोकसंख्या वाडतूच आसा. त्या मानान नोकऱ्यांची उपलब्धताय उणी आसा. तातूंतच संगणक युगाक लागून खूबशीं कामां संगणका वरवीं जातात.

प्रधानमंत्री नरेंद्र मोदी हांच्या फुडारपणा खाला एनडीए सरकार सत्तेर आयलें. चडश्या सगल्याच मंत्र्यांनी आपआपलो
कार्यभार हातांत घेतला. आतां लोक वाट पळयतात नव्या सरकाराच्या अपेक्षांची. नव्या सरकाराक भारतीय जनता पक्षाक पूर्ण भोवमत मेळ्ळें ना. आयज एनडीए मदल्या पक्षाच्या तेंक्यार हें सरकार उबें आसा, आनी ते पांच वर्सा वेवस्थीत चलोवन दाखोवप ही व्हड जापसालदारकी प्रधानमंत्री नरेंद्र मोदी हांचेर आसा.
बेरोजगारी उणी करप
देशांत आयज मोटो प्रस्न उबो आसा तो म्हणल्यार बेरोजगारी. खूबशे तरणाटे शिक्षीत आसात, शिक्षीत जायत आसात तांकां नोकर्यो मेळनात. प्युनाचे नोकरे खातीर लेगीत बीई, एमई, एमबीए अशा शिक्षीत तरणाट्यांचे अर्ज येत आसात. लोकसंख्या वाडतूच आसा. त्या मानान नोकऱ्यांची उपलब्धताय उणी आसा. तातूंतच संगणक युगाक लागून खूबशीं कामां संगणका वरवीं जातात. लेबर टायम सर्व्हे प्रमाण जानेवारी ते मार्च ह्या म्हयन्यांत देशांत 15 आनी वयल्या पिराये वेल्या बेकारीचो दर 6.7 टक्के इतलो आशिल्लो. देशांत 20-21 वर्सा 24.3 मिलियन इतले बेकार लोक आसात. देशांतलो हो सगल्यांत मोटो ज्वलंत प्रस्न आसा. ह्या बोरोजगारीत दिसानदीस वाड जायत आसा. दिसान दीस सरकारी नोकऱ्यांचें प्रमाण लेगीत उणे जायत आसा.
म्हारगाय नियंत्रणांत हाडप
देशांत दिसानदीस म्हारगाय वाडतूच आसा. सद्या संवसारांत म्हारगाय वाडत चल्ल्या. युरोप आनी अमेरिकेंत त्या वाडीचें प्रमाण चड आसा. जर्मनींत लेगीत म्हारगाय सुमारा भायर वाडत आसा. हाचेर योग्य प्रमाणांत नियंत्रण हाडप हें सरकारा मुखा वेलें पयलें काम आसा.
अशांत वाठारांनी शांती हाडप
देशांत मणिपूर सारक्या कांय प्रदेशांनी अशांती आसा. फाटले कितलेशेच म्हयने थंयची लोकजीण विस्कळीत जाल्या. ताचेर थंय शांती कशी स्थापन जातली हाचे कडेन लक्ष दिवप गरजेचें आसा. कश्मीरांत कांय सुवातांनी आतंकवादी हल्ले जायत आसात. ताचे कडेन लेगीत लक्ष दिवन हे हल्ले जावचे नात हाची खबरदारी घेवप गरजेचें अासा. पाकिस्तान आनी चीन ह्या राष्ट्रां पसून लेगीत सेगीत सादूर रावप गरजेचें आसा.
शेतकारांचें प्रस्न सोडोवप
शेतकारांच्या म्हालाक योग्य तो दर मेळना. सेगीत अवर्शण वा चड पावस हाका सामकार वच्चें पडटा. चड करून कांदो तशेंच सोयाबीन हाचे बाबतींत योग्य तें धोरण थारावप गरजेचें आसा. जेणे करून शेतकार आनी गिरायक हांचें लुकसाण जावचें ना. देशांत सगल्यांत मोटो कृशी वेवसाय आसा. ताचे कडेन लक्ष दिवप गरजेचें आसा.
मध्यमवर्गियांक करांत सूट दिवप
फाटले कितलेशेच म्हयने मध्यमवर्गियांक करांत चडशी सूट दिल्ली ना. अंदूंच्या अर्थसंकल्पांत हाची कसलीय तरतुदींची वेवस्था केल्यार तें एक व्हड पावल थारतलें.
अग्नीवीर येवजणेची पुनर्समिक्षा करप
लश्करांत सद्या चार वर्सां खातीर अग्नीवीर ही येवजण हालींच सुरू केल्या. भाजपाच्या घटक पक्षा कडल्यान हे येवजणेची पुनर्समिक्षा करपाची मागणी जायत आसा. ते येवजणेंतलो कांय भाग विचारांत घेवन ह्या येवजणेची पुनर्बांधणी करप गरजेची आसा.
सगल्या पक्षांक बरोबर घेवन वचप
भाजपाक लोकसभेंत पूर्ण भोवमान मेळ्ळें ना. घटक पक्षाचेर तांकां निंबून रावचें पडटा. ताका लागून तांकां बरोबर घेवन आनी तांच्या मागण्यांचो सहानभुती पुर्वक विचार करून काम करचें पडटलें.
महिला सबलीकरणाक म्हत्व दिवप
देशांतल्या बायलांक नोकरी, शिक्षण, राजकारण अशा सगल्या मळार म्हत्व दिवप गरजेचें आसा. तांकां संसदेंत 33 टक्के आरक्षण दिवपाचें सरकारान थारायलां. पूण ताची अंमलबजावणी 2029 पसून जातली. ताका लागून अजून लेगीत ह्यो गजाली चालीक लावपा खातीर आनीक पांच वर्सांची गरज आसा. तो मेरेन कांय गजाली करप गरजेच्यो आसात.
एक देश एक वेंचणूक
देशांत विवीध राज्यांनी सेगीत वेंचणुको चालूच आसात. हातूंत वेळ, पयसो व्हड प्रमाणांत खर्च जाता. ते खातीर एक देश एक वेंचणूक ही येवजण प्रत्यक्षांत चालीक हाडची. ताका लागून देशाचो पयसो व्हड प्रमाणांत वाटावतालो.
न्हंय जोड प्रकल्प
देशांत विवीध न्हंयो जोडपाचे प्रकल्प सुरू करप गरजेचें आसा. देशाच्या खूबशा वाठारांनी सदांच अवर्शणाचें संकश्ट कायम आसा. ते नदरेन हो प्रकल्प परतून विचारांत घेवन ताचे अंमलबजावणेक रोखडीच सुरवात करची.
अशीं कांय म्हत्वाचीं कामां सरकारान हातांत घेवचीं. जे प्रमाण पयल्या 100 दिसांत कांय कामां करपाचीं आसात अशें एनडीएन थारायलां. तशींच वयलीं कामां लेगीत हातांत घेवचीं.

शांताराम वाघ
9623452553