एनडीएचें ‘बिहार’, महागठबंधनाची ‘हार’

भांगरभूंय | प्रतिनिधी

चडश्या एक्झीट पोलांचो अदमास थारलो खरो

बिहारांतलें आयज मेरेनचें एनडीएचें व्हड जैत

प्रधानमंत्री मोदी हांणी जैताचें स्रय दिलें सुशासनाक

खबरां संस्था

पाटणा : बिहार विधानसभा वेंचणुकेंत सत्तेर आशिल्ल्या राष्ट्रीय लोकशाय आघाडेन (एनडीए) घणघणीत येस मेळयलें. जाल्यार विरोधी पक्षांच्या महागठबंधनाक व्हड हार खावची पडली. मतदान सोंपले उपरांत जाहीर जाल्ल्या एक्झीट पोलांत चडश्या सगल्याच सर्व्हेक्षण संस्थांनी एनडीएक व्हड जैत मेळपाची शक्यताय उक्तायल्ली. एक्झीट पोलाचो अदमास खरो थारला. एनडीए परतून व्हड भोवमतान सरकार स्थापन करतली हें स्पश्ट जालां. एनडीएन 342 तल्यो 202 सुवातो जिखल्यात, जो एक विक्रम आसा. महागठबंधन आघाडेक फक्त 35 सुवातो मेळ्ळ्यो. जाल्यार हेरांक 6 सुवातो फावो जाल्यो. बिहारांत सरकार स्थापन करचे खातीर 122 सुवातांची गरज आसा.

भाजप बिहारांत पयलेच खेपे स्वताचे तांकीचेर सरकार घडोवपाच्या मार्गार आसा. हाचो अर्थ ते नितीश कुमार हांच्या जेडीयू बगर सरकार स्थापन करपाक शकता. भोवमता खातीर भाजपाक फक्त 3 सुवातांची गरज आसा. तज्ञांच्या म्हणण्या प्रमाण ते हो आंकडो अपक्षांक घेवन सहज मेळोवपाक शकतात.

बिहारांत मुख्यमंत्री नितीश कुमार हांच्या फुडारपणा खालच्या एनडीएंत जनता दल- संयुक्त (जेडीयू), भारतीय जनता पक्ष (भाजप), लोक जनशक्ती पक्ष (रामविलास), हिंदुस्तान अवामी मोर्चा (एमयूएम) आनी राष्ट्रीय लोक मोर्चा (आरएलएम) हांचो आस्पाव आसा.

बिहार विधानसभा वेंचणुकेंत सत्तेर आशिल्ल्या राष्ट्रीय लोकशाय आघाडेन आयज मेरेनचें सगल्यांत व्हड जैत मेळयलां. ह्या जैता उपरांत प्रधानमंत्री हांणी पयली प्रतिक्रिया दितना, ट्वीट करून ह्या जैताचें स्रय सुशासनाक दिलां.

सुशासनाचें (बऱ्या कारभाराचें) जैत जालां. उदरगतीचें जैत जालां. जन- कल्याणाचे भावनेचें जैत जालां. समाजीक न्यायाचें जैत जालां, अशें प्रधानमंत्री मोदी हांणी सांगलें. बिहारांतल्या म्हज्या परिवारांनो 2025 च्या विधानसभा वेंचणुकेंत एनडीएक इतिहासीक आनी अद्भूतपूर्व जैताचो आशिर्वाद दिल्ले खातीर आपूण तुमचो खूब खूब उपकारी आसा. हो व्हड जनादेश आमकां लोकांची सेवा करचे खातीर आनी बिहारा खातीर नव्या संकल्पां सयत काम करपाक शक्त दितलो, अशी भावना प्रधानमंत्री मोदी हांणी उक्तायल्या.