भांगरभूंय | प्रतिनिधी
पणजीः गोंयांत राष्ट्रीय सुरक्षा कायदो (एनएसए) लावन पुलिसां कडल्यान सामान्य लोकांची पिडापीड चल्ल्या. पुलीस समान्य लोकांक भितर उडयता आनी गुन्यांवकार मेकळेपणान भोंवतात. एनएसए लागू करप ही राज्यांची अपेयसी कायदो सुवेवस्थेची गवाय दिता, असो आरोप आम आदमी पक्षाचे गोंय संयोजक अमित पालेकार हांणी केलो.
गोंयांत जावपी गुन्यांवकारी घडणुकेचे फाटभूंयेर आपचे अमित पालेकार हांणी पत्रकार परिशदेंत सरकाराची टिका केली. ह्या वेळार आपचे संघटन मंत्री श्रीकृष्ण परब हजर आशिल्ले.
गोंयांत ज्यो गुन्यांवकारी घडणुको जातात. तांचें कनॅक्शन मुख्यमंत्री वा भाजपाच्या फुडार्याक लागता, असो आरोप पालेकार हांणी केलो.
गुन्यांवकार आनी राजकारणाचे नेक्सस भाजपा कडेन मेळ्ळ्यात. जर गुन्यांवकारी भाजपाचो फुडारी, आमदार, मंत्री आसात जाल्याार तांचेर कारवाय करची. मात हांचे आड कागाळ करपी लोकांचेरूच जाता. काल सांताक्रुझ वाठारांत प्रिव्हेंटीव अरेस्टाच्या नांवान कामा सावन घरा येवपी साद्या भुरग्यांक अटक केल्या, असोय आरोप पालेकार हांणी केलो.
आपलो पुत कामा सावन रातचो घरा येतना ताका पोलिसांनी धरलो, अशे सांगपी म्हाका कितलेशेच आवयांचे काल फोन आयिल्ले. ‘तूं लेट कित्याक भोंवता, खंय भोंवता, कितें काम तुजें?’ अशे प्रस्न विचारून तांकां भितर उडयले. मात भाजपाचे एजंट जे काळ्या आरश्याच्या गाडयांनी भोंवतात तांकां पुलीस हे प्रस्न विचारनात, अशी टिका पालेकार हांणी केली.
पणजे सुमार ५० काळ्या हारशांच्यो गाडयो आसात. रातच्यो भंय नासतना भोंवतात. हातूंत कोणूय गुन्यांवगार लिपून भोवपाची शक्यता आसपाक शकता. नाकाबंदी चालू आसतना ह्यो काळ्यो आरश्याच्यो गाडयो फुड्यान वयतात, भोंवतात त्यो पुलीस आडायनात. काल ज्या भुरग्यांक धरल्यात तांची गुन्यांवकारी फाटभूंय पुलिसांनी दाखोवची. नाकाबंदी आनी गुन्यांव नियंत्रणाच्या नांवान सामान्य लोकांची पिडापीड चल्ल्या. मात गुन्यांवगार सुशेगाद भोंवतात, असो आरोप पालेकार हांणी केलो.
खापो गुन्यांवकारांक भितर उडोवन ताका जाग्यार घालपा खातीर एनएसए लागू करतात. मात हांगासर एनएसए सरसकट हाडून, कोणा फाटल्यान लागून तांकां बंदखणींत उडोवपाचो हक्क सरकाराक मेळ्ळा. राज्याची कायदो सुवेवस्था कोसळ्ळ्या. हें एक दुसरें उदाहरण एनएसए लावपा फाटल्यान आसा. हे भशेन कायदे हाडटा तेन्ना सरकाराचें कोणाचेरूच नियंत्रण ना, अशें पालेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
