भांगरभूंय | प्रतिनिधी
सगळ्यांत चड चिंतेची गजाल म्हणल्यार कंत्राटी आनी व्याख्यान तत्वाचेर आशिल्ल्या प्रध्यापकांक स- सात म्हयने पगार मेळना, ताका लागून तांची अर्थीक अस्थिरताय वाडत आसा.
राष्ट्रीय शिक्षण धोरण (एनईपी) 2020 चालीक लायल्या उपरांत गोंयांतल्या उच्च शिक्षण क्षेत्रा मुखार जायतीं खर आव्हानां उबीं जाल्यांत. भारतीय शिक्षण वेवस्था चड लवचीक, कुशळटाय तशेंच रोजगार केंद्रीत करपाचो हेत ह्या धोरणाचो आशिल्लो, पूण ताका लागून जायतीं आव्हानांय उबीं जाल्यात, जीं खास करून प्राध्यापक, विद्यार्थी आनी महाविद्यालयांचेर जाल्लीं पळोवंक मेळटात.
उच्च शिक्षणीक मळाचे म्हत्वाचे भागधारक म्हणल्यार प्रध्यापक वर्ग, तांचेर हे बदलते परिस्थितीचो चड परिणाम जातना दिश्टी पडटा. गोंयांत रेग्युलर पदांचेर आशिल्ल्या प्राध्यापकांचो वर्कलोड स्थीर दवरपाक प्राधान्य दिल्लें नदरेक पडलां, पूण ताची तात्पुरत्या आनी कंत्राटी तत्वाचेर नेमणूक जाल्ल्या प्रध्यापक आनी व्याख्यात्यांचेर हांवळ आयल्या. कायम स्वरूपी पदांक नव्या शिक्षणीक धोरणाच्या अंमलबजावणेच्या काळखंडांत मान्यताय मेळनाशिल्ल्यान जायत्या 45 वर्सांची वयोमर्यादा लागीं पाविल्ल्या अणभवी प्रध्यापकांच्या फुडाराचेर प्रस्नचिन्न उबें जालां. एकंदरीत तात्पुरत्या तत्वाचेर आशिल्ल्या प्रध्यापकांक कसलेंच संरक्षण मेळिल्लें दिसना. सगळ्यांत चड चिंतेची गजाल म्हणल्यार कंत्राटी आनी व्याख्यान तत्वाचेर आशिल्ल्या प्रध्यापकांक स- सात म्हयने पगार मेळना, ताका लागून तांची अर्थीक अस्थिरताय वाडत आसा.
अभ्यासक्रमाची संरचना बदलिल्ल्यान साबार आव्हानां उप्राशिल्लीं पळोवंक मेळटात. क्रेडीट सिस्टम, वर्कलोडाक पोशक नाशिल्ल्याचें जाणवता. महाविद्यालयांनी जायत्या विशय गटांतल्यान स्पश्टतायेचो उणाव दिसून आयला. अभ्यास आनी संदर्भ साहित्याची उपलब्धताय लेगीत एक आव्हान थारलां, जाका लागून विद्यार्थ्यांक तशेंच प्राध्यापकांक आडखळ निर्माण जातना दिसता. कौशल्या विकासाचेर आधारीत अभ्यासक्रमाचें डुप्लीकेशन जातना दिश्टी पडटा जाचेर पुनर्विचार करपाची गरज आसा, जाका लागून वेळ आनी साधनांचो इबाड कमी जावं येता.
विद्यार्थ्यांचे परिस्थितींतय बदल जातना दिश्टी पडटा. पयलीं बीए, बीकॉम आनी बीएससी सारकिल्ले पारंपरीक पदवी अभ्यासक्रम खूब लोकप्रीय आशिल्ले, पूण आतां चडशे विद्यार्थी तंत्रीक आनी कुशळटाय आदारीत अभ्यासक्रमां कडेन वळपाक लागल्यात. ताचो परिणाम म्हणल्यार जायत्या महाविद्यालयांनी प्रवेश दर उणो जाल्ल्यान काळांतरान महाविद्यालयांच्या अस्तित्वाचेर प्रस्न निर्माण जावं येतात. सरकारी महाविद्यालयांक धोरणात्मक फायदे मेळपाक लागल्यात जाल्यार खाजगी महाविद्यालयांक साधन सुविदेंचो व्हड उणाव प्रभावित करपाक लागला. पयल्या वर्साच्या विद्यार्थ्यांचे केंद्रीकृत प्रवेश पद्दतीचो ग्रामीण आनी ल्हान महाविद्यालयांच्या प्रवेश दराचेर परिणाम जाल्ल्याचें स्पश्ट दिसून येता.
तात्पुरत्या तत्वाचेर आशिल्ल्या प्रध्यापकांकूय हेर जायत्या आव्हानांक तोंड दिवचें पडटा. तांकां मूळ पगार मेळटा आनी नोकरे संबंदीत कसलीच सुविधा मेळना. मुखारलें शिक्षण, कामाचो ताण, समाजीक तशेंच अर्थीक आव्हानां हाका लागून तांकां मानसीक ताण आनी असुरक्षीततायेक तोंड दिवचें पडटा, जाचो परिणाम तांच्या शिकोवपाच्या वावराचेरूय जाता. हे समस्येक तोंड दिवपा खातीर नवें शिक्षणीक धोरण अमलांत आयल्या उपरांत लेगीत गरजे प्रमाण बदल करपाची गरज आसा. तात्पुरत्या शिक्षकां खातीर कायम पदांची मान्यताय सुनिश्चीत करप, जाका लागून तांकां सुरक्षीत फुडारा कडेन वचूंक मेळटलें. ऑनर्स अभ्यासक्रमां खातीर पात्र प्राध्यापकांची नेमणूक करपाची प्रक्रिया बेगोबेग चालीक लावप. उच्च शिक्षण चड सुलभ आनी वेव्हारीक करपा खातीर पारंपरीक अभ्यासक्रमांत कुशळटायेचेर आदारिल्ले विशय जोडप. खाजगी महाविद्यालयांकय फावो तो अर्थीक आदार दिवप सारकिल्लीं पावलां घेवपाची गरज आसा. केंद्रीय प्रवेश पद्दतींत सुदारणा करची, जाका लागून ल्हान आनी गांवगिऱ्या महाविद्यालयांक प्रवेश प्रक्रियेंत चड संद मेळटली. शिक्षक आनी विद्यार्थ्यांचे मानसीक भलायकेक प्राधान्य दिवन ताण वेवस्थापनाचेर खासा भर दिवपाची गरज आसा.
राष्ट्रीय शिक्षण धोरण (एनईपी) 2020 चालीक लागत सांवन गोंयच्या उच्च शिक्षणीक मळार जायतीं गंभीर आव्हानां मुखार येवपाक लागल्यांत. सरकार, धोरण निर्माते आनी शिक्षणतज्ञ हे प्रस्नांची वेळार दखल घेनात जाल्यार ताचो फकत प्राध्यापकांच्या थिरतायेचेरच म्हय तर विद्यार्थ्यांच्या फुडाराचेरूय परिणाम जावं येता. उच्च शिक्षण चड समावेशक आनी प्रभावी करपा खातीर ठोस पावलां उबारपाची गरज आसा. गोंयांत राष्ट्रीय शिक्षण धोरण (एनईपी) 2020 प्रयोगीक तत्वाचेर अमलांत आशिल्ल्यान ह्या प्रस्नांचो वेळार सुटावो करून नवें शिक्षणीक धोरण प्रभावी करप शक्य आसा.
प्रा. जयेश अ. राऊत
साळ, दिवचल
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
