भांगरभूंय | प्रतिनिधी
पालकांची मागणी : शिक्षण संचालकांक भेटयलें निवेदन
भांगरभूंय । प्रतिनिधी
पणजीः राष्ट्रीय शिक्षणीक धोरण (एनईपी) लागू करचे पयली पालक आनी शिक्षकां मदीं खूबशे प्रस्न आसात. ह्या प्रस्नांचो सोक्षमोक्ष लावपा खातीर तज्ञां वांगडा एनईपी अंमलबजावणी खातीर पॅनल चर्चा घडोवन हाडची, अशी मागणी पालकांनी केल्या.
एप्रीलांत शाळा सुरू करपाच्या निर्णयाचो निशेध करपा खातीर तशेंच पॅनल चर्चेची मागणी मांडपा खातीर गोंयच्या वेगवेगळ्या शाळांतल्या पालकांनी पर्वरे शिक्षण संचालनालया मुखार निर्देशनां केलीं. ह्या वेळार पालकांच्यो सयो आशिल्लें हे विशींचें निवेदन शिक्षण संचालक शैलेश झिंगडे हांकां भेटयलें.
ह्या वेळार उलयतना पालक सेसील रॉड्रिग्स हांणी सांगलें, ह्या धोरणाचे परिणाम जे विद्यार्थ्यांचेर जातले हाचेर पालक-शिक्षक संघटना, शिक्षक संघटणा आनी मुख्याध्यापक संघटणा हांणी मांडिल्लो हुस्को आमकां मांडपाक जाय.
आमकां एनईपी 2020 विशीं कसलीच हरकत ना, पूण तांचे अंमलबजावणे विशीं आमचो हुस्को आसा. पालक तशेंच शिक्षकांनी हे विशीं खूबशे प्रस्न उपस्थीत केल्यात. भुरग्यांची मानसीक आनी शारिरीक भलायकी तशेंच सर्तीच्या काळांत तांचो फुडार, ह्या प्रस्नांचेर आमकां चर्चा करपाक जाय, अशें सेसील हांणी सांगलें.
न्यायालयात चलिल्ल्या प्रकरणांक लागून बसका घेवप शक्य जालें ना. आतां न्यायालयांतलें प्रकरण सोंपले उपरांत एनईपीचेर खोलायेन विश्लेशण केले उपरांत आमच्या हरकतींनी वाड जाल्या. आपल्या भुरग्यांच्या फुडारां संबंदांत खूबशे पालक हुस्क्यांत आसात. ताका लागून पालक, शिक्षक आनी मुख्यध्यापक हांच्या वांगडा एनईपी तज्ञां वांगडा एक पॅनल चर्चा आपोवची. हे पॅनल चर्चेक लागून गोंयांत एनईपीची बरे भशेन अंमलबजवाणी जातली, अशें सेसील हांणी मागलां.
तुमी सीबीएससी आनी आयसीएससी भुरग्यां वांगडा तुळा करतात. पूण ह्यो दोनूय बोर्डाच्यो परिक्षा फेब्रुवारीच्या निमाणे कडेन काबार जातात. दोन सप्तकांचे सुटये उपरांत परिक्षेचो निकाल आयले उपरांतूच तांची शाळा सुरू जाता, अशें रजांव कळंगूटेची पालक जील रॉड्रिग्स हिणें दिल्या.
ज्या भुरग्यांनी णववेची परिक्षा दिल्या तांचो निकाल 29 एप्रीलाक येतलो. ताका तुमी थेट धावेक धाडलो आनी उपरांत तो नापास जालो जाल्यार ताचेर ताण येतलो. एनईपी आमकां जाय ताचेर आमी ठाम आसात. पूण ताचे अंमलबजावणीक वेळ जाय. उलयले म्हूण जालें अशें जावंक फावान, अशे जील हांणी म्हणलें.
मजगतीं, ह्या आंदोलनाचेर उलयतना शिक्षण संचालक शैलेश झिंगडे हांणी सांगलें, तांणी चर्चे खातीर दारां सदांच उक्तीं दवरल्यांत. तांचो एक फुडारी येवन आपल्याक मेळ्ळो आनी सांगलें, एक चर्चा घडोवन हाडपा खातीर तांकां शिक्षण संचालकान आस्वासन दिल्लें. पूण हे विशींची आपल्याक कसलीच कल्पना ना. जें कितें उलोवप जालां तातूंत आपूण नाशिल्लो. पूण चर्चा करपा खातीर आपूण तशेंच सचीव सगळ्यांक येवकार दितात, अशें झिंगडे हांणी म्हणले.
‘आंदोलना खातीर अधिसुचीत सुवातो आसात’
शिक्षण संचालनालयांत कोणूच आंदोलन करपाक शकना. ही बेकायदेशीर गजाल. आंदोलन करपा खातीर आझाद मैदानां सारकिल्ल्यो अधिसुचीत सुवातो आसात. हें सरकारी कार्यालय आशिल्ल्यान निवेदन दिवपाक आमी येवकार दितात, अशें शैलेश झिंगडे हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
