भांगरभूंय | प्रतिनिधी
पणजी : गोंयांत राष्ट्रीय शिक्षण धोरणाची (एनईपी) कार्यवाही सुरू जाल्या. राष्ट्रीय शिक्षण धोरणाचो हेत, ताची कार्यवाही आनी पालकांची जापसालदारी हे विशीं पालक तशेंच वेवस्थापन समिती वांगड्यांक म्हायती दिवपी मार्गदर्शन जातलें. दरेका म्हालांत कार्यावळी जातल्यो. सगल्यांत पयली कार्यावळ केपें म्हालांत 23 फेब्रुवारीक जातली. हे उपरांत सगल्या म्हालांनी कार्यावळी जातल्यो.
गोंय राज्य शिक्षण संशोधन आनी प्रशिक्षण मंडळाच्यो संचालक मेघना शेटगांवकार हांणी ही म्हायती दिली. सध्या फावंडेशन पावंड्या सयत सवी आनी णववे खातीर एनईपीची कार्यवाही सुरू जाल्या. फुडल्या वर्सा सावन हेर यत्तांनी कार्यवाही सुरू जातली. हे विशींचे तयारीचो हो एक भाग आसा.
राष्ट्रीय शिक्षण धोरण म्हणल्यार कितें आनी ताचो लाव विद्यार्थ्यांक कसो जातलो? हे विशीं खूबश्या पालकांक म्हायती ना. विद्यालय वेवस्थापन समितीच्या सगल्या वांगड्यांक लेगीत एनईपी विशीं पुराय म्हायती ना. एनईपी म्हणल्यार कितें? आनी कित्या खातीर लागू केल्या, ती म्हायती सगल्यां मेरेन पावोपाचो हेतू कार्यावळी फाटल्यान आसा, अशी म्हायती मंडळाच्या अधिकाऱ्यांनी दिली.
एनईपी लागू जाल्ल्यान विद्यालयांची वेळ बदल्ल्या. परिक्षेची पद्दत लेगीत बदल्ल्या. एनईपी लागू जाल्ली तेन्ना कांय पालकांनी विरोध करून न्यायालयांत याचिका लेगीत घाली. एनईपीचे कार्यवाही खातीर पालक तशेंच वेवस्थापन समितीच्या वांगड्यां मदले दुबाव पयस जावपाक जाय. गोंय राज्य शिक्षण संशोधन मंडळ (एससीईआरटी), समग्र शिक्षा अभियान, शालान्त मंडळ आनी शिक्षण खात्याचे अधिकारी कार्यावळींनी मार्गदर्शन करतले. विद्यालय वेवस्थापन समिती, वेवस्थापन मंडळ तशेंच पालक शिक्षक संघाच्या वांगड्यांक हाजेरी लावपाक मेळटली. दरेका म्हालांत एके सुवातेर ही मार्गदर्शनपर कार्यशाळा जातली. राष्ट्रीय शिक्षण धोरणाची कार्यवाही योग्य तरेन सुरू आसा. ही प्रक्रिया पुराय जाले उपरांत हेर सगल्या यत्तां खातीर एनईपी लागू करप शक्य जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
