भांगरभूंय | प्रतिनिधी
मुख्यमंत्री डॉ. सावंत हांचें स्पश्टीकरण
सर्वोच्च न्यायालयांतले सुनावणेचेर परिणाम जावचो ना
सरकारान तांकां अहवाल करपाक सांगूंक नासलें
भांगरभूंय । प्रतिनिधी
पणजी : ‘एनआयओ’च्या शास्त्रज्ञांक गोंय सरकारान म्हादय संबंदांत अहवाल तयार करपाक सांगूंक नासलें. ताका लागून त्या अहवालाचो सरकाराचो कुस्कुटाचोय संबंद ना. ह्या अहवालाचो सर्वोच्च न्यायालयांतले सुनावणेचेर कसलोच परिणाम जावचो ना, अशें मुख्यमंत्री डॉ. प्रमोद सावंत हांणी शेनवारा पत्रकारां कडेन उलयतना स्पश्ट केलें.
म्हादय उदक तंटो लवादाच्या अंतीम आदेशा प्रमाण, म्हादय न्हंयेचें उदक घुंवडायलें जाल्यार ताचो पुराय गोंयाचेर व्हसलोसो परिणाम जावचो ना, असो अहवाल एनआयओ’च्या के. अनील कुमार, डी. शंकर आनी के. सुप्रीत ह्या शास्त्रज्ञांनी तयार केला. हाचे वयल्यान राजकारण तापलां. रिव्हॉल्युशनरी गोवन्स (आरजीपी), काँग्रेस ह्या विरोधी पक्षां सयत पर्यावरण मोगी राजेंद्र केरकार हांणीय ‘एनआयओ’ आनी गोंय सरकाराचेर टिकेचो शिंवर केला.
हे फाटभुंयेर, मुख्यमंत्री डॉ. सावंत हांणी ह्या अहवालाचो आनी सरकाराचो कसलोच संबंद ना, अशें स्पश्ट केलां. सरकारान ‘एनआयओ’च्या शास्त्रज्ञांक असो कसलोच अहवाल तयार करपाक सांगूंक नासलें. तांणी तो स्वता तयार केला आसत जाल्यार तो तांचो विशय आसा. ह्या अहवालाचो सर्वोच्च न्यायालयांतले म्हादय संबंदांतले सुनावणेचेर कसलोच परिणाम जावचो ना, अशें म्हणलां.
कर्नाटक सरकार फायदो घेवपाक शकता : केरकार
‘एनआयओ’ ही देशांतली प्रतिश्ठीत संस्था आसा. ताका लागून हे संस्थेच्या शास्त्रज्ञांनी तयार केल्ल्या अहवालाचो फायदो कर्नाटक सर्वोच्च न्यायालयांतले सुनावणे वेळार घेवपाक शकता आनी ताचो परिणाम थंयचे सुनावणे वेळार जावपाक शकता, अशें पर्यावरण मोगी राजेंद्र केरकार हांणी पत्रकारां कडेन उलयतना सांगलें. मुख्यमंत्री डॉ. प्रमोद सावंत हांणी ह्या अहवालाचो पुराय अभ्यास करून फुडलीं पावलां उखलप गरजेचें आसा, अशेंय तांणी स्पश्ट केलें.
अहवालाचेर काँग्रेसीचेंय प्रस्नचिन्न
‘एनआयओ’च्या शास्त्रज्ञांनी तयार केल्ल्या अहवालाचेर विरोधी काँग्रेसीन लेगीत प्रस्नचिन्न उपस्थीत केलां. शेनवारा पणजे पत्रकार परिशद घेवन दक्षीण गोंयचे खासदार विरियातो फर्नांडीस हांणी कर्नाटकान म्हादयचें उदक घुंवडायल्यार ताचें गोंयाक कशें लुकसाण जावं येता, हें सादरीकरणा सयत दाखोवन दिलें. हे आदीं आयआयएसी-बंगळुरू आनी आयआयटी-मुंबय हांणी सादर केल्ल्या अहवालांत लेगीत कर्नाटकान म्हादयचें उदक घुंवडायल्यार ताचो परिणाम पुराय गोंया सयत उत्तर कर्नाटकाचेरूय जातलो, अशें म्हणिल्लें. ताका लागून गोंय सरकारान हो अहवाल गंभिरतायेन घेवपाची गरज आसा, अशेंय फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
