भांगरभूंय | प्रतिनिधी
मुख्यमंत्री : वैयक्तीक अहवाल सरकाराक बांदील नाशिल्ल्याचें उदकास्रोत मंत्र्या कडल्यान स्पश्ट
भांगरभूंय । प्रतिनिधी
पणजी : राष्ट्रीय दर्या विज्ञान संस्थेन (एनआयओ) जारी केल्ल्या अहवालाचो अभ्यास करुनूच आपूण ताचेर उलयतलों, अशें मुख्यमंत्री डॉ. प्रमोद सावंत हांणी शुक्रारा पत्रकारां कडेन उलयतना सांगलें. जाल्यार अशें वैयक्तीक अहवाल सरकाराक बांदील नासतात. म्हादयचें उदक कर्नाटकान घुंवडायल्यार ताचो गोंयाक मार बसतलो, हेच खातीर आमी ताचे आड सडटात अशें उदकास्रोत मंत्री सुभाष शिरोडकार हांणी सांगलें.
म्हादय तंटो लवादाच्या अंतीम आदेशा प्रमाण म्हादयचें उदक घुंवडायल्यार ताचो पुराय गोंयाचेर व्हडलोसो परिणाम जावचो ना, असो अहवाल एनआयओन हालींच जारी केला. एनआयओचे शास्त्रज्ञ के. अनील कुमार. डी. शंकर आनी के. सुप्रीत हांणी हो अहवाल तयार केला. हो अहवाल भौशीक जाले उपरांत रिव्हॉल्युशनरी गोवन्स पक्षाचे (आरजीपी) अध्यक्ष मनोज परब आनी आमदार विरेश बोरकार हांणी आक्रमक जावन, एनआयओच्या कार्यालया भायर आंदोलन केलें. हे फाटभुंयेर उलयतना एनआयओच्या अहवालाचो अभ्यास केले उपरांतूच आपूण ताचेर उलयतलों अशें मुख्यमंत्री डॉ. सावंत हांणी स्पश्ट केलें.
अशे तरेचे खूबशे अहवाल येतात, पूण सरकार ताका बांदील आसना. कर्नाटकान म्हादय न्हंयेचें उदक घुंवडायल्यार ताचो परिणाम गोंयाचेर जातलो. हेच खातीर सरकार हे संबंदांत सर्वोच्च न्यायालयांतूय लडटा, अशें मंत्री शिरोडकार हांणी सांगलें.
मनोज परब हांची बदामी हांचेर टिका
एनआयओचो अहवाल आयले उपरांत उदकास्रोत खात्याचे मुख्य अभियंता प्रमोद बदामी हांणी ह्या अहवालाचो अभ्यास करून ते विशीं मुख्यमंत्री डॉ. प्रमोद सावंत आनी उदकास्रोत मंत्री सुभाष शिरोडकार हांचे कडेन चर्चा करपाची गरज आशिल्ली, पूण तांणी तशें करूंक ना. हाचोच अर्थ गोंय सरकार ह्या विशया वयल्यान गोंयकारांची दिशाभूल करता, हें स्पश्ट जाता, अशी टिका आरजीपीचे अध्यक्ष मनोज परब हांणी केली. बदामी हे मूळ कर्नाटकांतले. ताका लागून म्हादय प्रकरणांत ते कर्नाटकाचीच बाजू घेतात, असोय आरोप तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
