‘एनआयओ’चे तिनूय विज्ञानीक गद्दार

भांगरभूंय | प्रतिनिधी

आरजीपीच्या ‘टुगेदर फॉर म्हादय मूव्हमेंट’चें एनआयओंत आंदोलन

भांगरभूंय । प्रतिनिधी

पणजीः म्हादयचें उदक घुंवडायल्यार ताचो व्हडलोसो परिणाम जावचो ना, असो अहवाल तयार करपाक कोणें सांगलां हाचेर एनआयोचे विज्ञानीक आनी भाजप सरकारान स्पश्टीकरण दिवचें. म्हादयचें प्रकरण सर्वोच्च न्यायालयांत प्रलंबीत आसतना हो अहवाल गोंयची बाजू कमजोर करपी आसा. ह्या तिनूय विज्ञानिकांनी गोंयांत रावून गोंया वांगडा केल्ली ही गद्दारी आसा, असो आरोप टुगेदर फॉर म्हादय मूव्हमेंट हांणी केलो.

म्हादयचें उदक घुंवडायल्यार ताचो व्हडलोसो परिणाम जावचो ना असो अहवाल तयार करपी तीन विज्ञानिकां आड आरजीपीच्या ‘टुगेदर फॉर म्हादय मूव्हमेंट’ हांणी दोनापावल एनआयओ भायर आंदोलन केलें. हे संघटनेच्या वांगड्यांनी एनआयओ आनी तांचे तीन विज्ञानीक तशेंच सरकारा आड घोशणा करून हे गजालीचो निशेध केलो.

म्हादय विशीं डी. शंकर, अनील कुमार आनी सुप्रीत ह्या तीन विज्ञानिकांनी 2024 चो अभ्यास करून अर्थ सायन्स ह्या नामनेच्या जर्नलांत उजवाडाक हाडलो. उपरांत 12 मेक राष्ट्रीय दिसाळ्याचेर हे विशीं बातमी आयले उपरांत हो विशय उजवाडाक आयलो, अशें आरजीपीचे मुखेली मनोज परब हांणी सांगलें.

एनआयओचे मुख्यालय गोंयांत आसा. हे विज्ञानीक गोंयचे भुंयेर रावतात आनी वयल्यान म्हादय जर घुंवडायली जाल्यार ताचो व्हडलोसो परिणाम गोंयाचेर जावचो ना, अशें अहवालात बरयतात. 1989 सावन गोंय-कर्नाटका मदीं हो विशय चालू आसा. देखून अहवाल तयार करपाक तांकां मदींच कसली उमेद आयली, असो प्रस्न परब हांणी उपस्थीत केलो.

हें प्रकरण सर्वोच्च न्यायालयांत चलता, हे खातीर हो अहवाल उजवाडाक हाडून बाजू कर्नाटकाच्या फावराद मांडपाक मुख्यमंत्री डॉ. प्रमोद सावंत, प्रधानमंत्री नरेंद्र मोदी, अमीत शाह, उदका स्रोत मंत्र्यान सांगले काय कर्नाटकाच्या काँग्रेस सरकारान सांगलें, हें आमकां कळपाक जाय. म्हादय विशयाचेर गृह समितीच्यो कितल्योश्योच बसका जाल्यो, विधानसभा सत्रां जालीं, पूण हे मजगतीं हो अहवाल गोंयचे मातयेचेर तयार जाता. हाचेर मुख्यमंत्र्या कडल्यान कसलेंच विधान येवंक ना, असो आरोप परब हांणी केलो.

ह्या तिनूय विज्ञानिकांनी गोंयचे भुंयेर रावून, म्हादयचें उदक पियेवन तांणी गोंयकारां कडेन, गोंयचे मातये कडेन गद्दारी केल्या. हे तिनूय बिगर गोंयकार विज्ञानीक. तांकां हे भुंयेचो मोग ना. डी. शंकर हो बंगळुरू कर्नाटकाचो. ताणें गोंयची बाजू दुबळी करपाक लोकांची दिशाभूल करपाक आपलो अहवाल आपली मायभूंय कर्नाटका वटेन केलो. भाजपाच्या डबल इंजिनान हें कारस्थान रचलां, हाची आमकां 100 टक्के खात्री आसा, असो आरोप परब हांणी केलो.

सरकार म्हादयचो विशय न्यायालयांत आसा अशें सांगून फायदो घेता. एके वटेन कोटींनी रुपया खर्च करून गोंयच्या वकिलाक सर्वोच्च न्यायालयांत तारीख पे तारीख मेळटा जाल्यार दुसरे वटेन एनआयओ अहवाल उजावाडाक हाडून गोंया कडेन गद्दारी करता, असो आरोप आरजीपीचे आमदार विरेश बोरकार हांणी केलो. 28 एप्रीलाक हो अहवाल तयार जावन मान्य जालो आनी तो उजावाडाक आयलो तेन्ना गोंय सरकाराक जाणीव नासली काय, हो एक प्रस्न आसा. भाजपाचें हें डबल इंजीन सरकार म्हादय घुंवडावन गोंयचें उदक काबार करपाक सोदता हें तांणी अहवाला वयल्यान सिध्द केलां. आमी पत्रकार परिशदेंत हो विशय उजावाडाक हाडिल्लो, पूण मुख्यमंत्र्यान अजून मेरेन हाचेर स्पश्टीकरण दिवंक ना. आमी म्हादय विशयाचेर गांवागावांनी वचून लोकां मदीं जागृताय करतले, अशे विरेश बोरकार हांणी सांगलें.