भांगरभूंय | प्रतिनिधी
नवी दिल्ली, खबरां संस्था: आयआयटी मद्रास सेगेत सव्या वर्सां देशांतली सगळ्यांत उत्कृश्ट उच्च शिक्षण संस्था थारली. शिक्षण मंत्रालयान सोमारा ही म्हायती जाहीर केली. देशांतल्या १० हजार ८४५ उच्च शिक्षण संस्थांची क्रमवारी मंत्रालयान जाहीर केल्या. नॅशनल इन्स्टिट्यूट रँकिंग फ्रेमवर्क २०२४ प्रमाण आयआयटी मद्रास पयल्या क्रमांकाचेर आसा. आयआयएससी बेंगळुरूनय सेगीत सवे खेपे दुसरो क्रमांक मेळयलो. पयल्या १० उच्च शिक्षण संस्थांनी ७ आयआयटी आसात. एम्स दिल्ली पयल्या क्रमांकांतल्यान सव्या क्रमांकाचेर देंवली जाल्यार जेएनयू धावे सुवातेर सावन ११ वे सुवातेर पावली. पयल्या १०० संस्थांनी सात संस्थांचो आस्पाव आसा. जेएनयू दिल्ली सगळ्या श्रेणींत पयल्या १० क्रमांकां भितर आयिल्लें पयलेंच विद्यापीठ थारलें. म्हाविद्यालयांच्या वर्गांत दिल्ली विद्यापिठाचें हिंदू महाविद्यालय पयल्या क्रमांकाचेर आसा.
दक्षिणेंतल्या ३६ संस्थां मदीं सात वर्सां पयले सुवातेर आशिल्लें मिरांडा हावज दुसरे सुवातेर आयलें. पयल्या २० म्हाविद्यालयां मदीं १० म्हाविद्यालयां दिल्ली विद्यापिठा खाला आसात. दिल्ली विद्यापिठा खाला येवपी २७ म्हाविद्यालयांचो पयल्या १०० मदीं आस्पाव आसा. हे खेपे एकंदर श्रेणी सोडल्यार हेर १५ विशयांतय श्रेणी आशिल्ली.
मॅनेजमेंटांत आयआयएम अहमदाबाद मुखार
उच्च शिक्षण संस्थांनी जामिया मिलिया १३ वे, दिल्ली विद्यापीठ १५वे सुवातेर आसा. दिल्ली विद्यापीठाची ही पांच वर्सांची बरे श्रेणी. जामिया एका नंबरान सकयल आयलां. टॉप १०० त संस्थां मदीं राजस्थानची बीआयटी- पिलानी (२३), गुजरातची आयआयटी- गांधीनगर (२९), आयआयटी इंदूर, मध्य प्रदेश (३३), झारखंडची आयआयटी-आयएसएम धनबाद (३५) हिमाचल प्रदेशची आयआयटी मंडी (७२), बिहार आयआयटी पाटणा (७३) हांचो आसपाव आसा. टॉप-१०० त महाराष्ट्रांतल्यो ११, उत्तर प्रदेश ८, कर्नाटक- पश्चिम बंगाल दरेकी ६, राजस्थान आनी तेलंगणा दरेकी ४, उत्तराखंड, आसाम आनी ओडिशा दरेकी ३ आनी बिहार आनी मध्य प्रदेश, हिमाचल प्रदेशच्यो दरेकी २ उच्च शिक्षण संस्थांचो आसपाव आसा. हरियाणा, छत्तीसगडचे खंयचेच संस्थेक टॉप- १०० त सुवात मेळूंक ना.
मॅनेजमेंट इन्स्टिट्यूट्सांत आयआयएम अहमदाबाद सेगीत पांचवे खेपो पयल्या क्रमांकाचेर आसा. टॉप-१० वेवस्थापन संस्थां मदीं आयआयटी दिल्ली आनी आयआयटी बॉंबे सारकिल्ल्या इंजिनियरिंग संस्थांचो वांटो आसा. मेडिकल म्हाविद्यालयांतले श्रेणीत स वर्सां सावन दिल्लीची एम्स, चंदिगडची पीजीआय, वेल्लोरची सीएमसी हींं पयल्या, दुसर्या आनी तिसर्या क्रमांकांचेर आसात. दांत वैजकी म्हाविद्यालयांत चेन्नयचें सविता इन्स्टिट्यूट ऑफ मेडिकल अँड टेक्निकल सायन्स तीन वर्सं सावन पयले सुवातेर आसा. डेंटल कॉलेजची रँकींग पांच वर्सां सावन दितात.
आयआयटी मद्रास नंबर-१
आमी जंजीबारांत एक कॅम्पस सुरू केलो. प्रवेश प्रक्रियेंत पयलेच खेपे खेळां कोटा सुरू केलो. इनक्युबेटेड स्टार्टअप माइंडग्रोव्ह कंपनीन सुरक्षीत आयएटीची रचना आनी उत्पादन करपाक सुरवात केली. ती भारताची पयली कमर्शियल सिस्टिम ऑन चिप जावन आसा. २०२३-२४ त ४३५ पेटेंट मेळ्ळे. २०२४ त ३७८ पेटंटचे अर्ज आसात. ५१३ कोटी रुपयांचो निधी उबारला. ८३ टक्क्यां परस चड विद्यार्थ्यांक नोकर्यो मेळ्ळ्यो – प्रो. व्ही. कामकोटी, संचालक, आयआयटी मद्रास
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
