भांगरभूंय | प्रतिनिधी
भलायकी खात्यान शिक्षण संस्थांनी रॅड रिबन क्लबाच्या आदारान एड्सा विशीं जागृताय, उपक्रम चालीक लावपाचो बरो निर्णय घेतला. ही जागृताय जावपाकूच जाय. आतां काळ बदल्ला. पयलीं लिंगीक शिक्षण म्हणलें काय ‘धांवात रे, आमची संस्कृती बुडयली रे’, अशी आरड आयकूंक येताली. कोणाच्यो भावना दुखपाक नाका, म्हूण सरकारान हें शिक्षण शाळांनी दिवप अजून सुरू करूंक ना. तें सुरू केल्यार भुरगीं वायट मार्गाक लागतलीं, अशें लाखांनी भारतीयांक अजून प्रामाणीकपणान दिसता. पूण मोबायल फोनान आयज सगलेंच दाखोवपाक सुरवात केल्या. म्हणटकच जुवानपणाच्या हुंबऱ्यार उबी आशिल्ले तरणाटे पिळगेक लिंगीक शिक्षण दिवप ही काळाची गरज थारल्या. खुद्द सरकारानूच एड्स जागृताय आनी लिंगीक शिक्षणाची गरज उक्तायली,
हें बरें जालें.
कसलोय विचार, इत्सा मनांत दाबून दवरली जाल्यार ती संद मेळटकूच भायर सरताच. ती आडावन दवरपी वंय अजून तयार जावंक ना. स्वैराचारूय तसोच. जुवानपणांत पांय निसरपाची भिरांत चड. ताका लागून वयार येवपी तरणाट्यांक स्वैराचाराचो धोको खबर आसपाक जाय. लिंगीकतायेचे उमळशिकेन तांणी बेधडक कसलेंय धाडस करपाक जायना. लिंगीक शिक्षण मेळ्ळें जाल्यार नव्या तरणाट्यांक कितें वायट, कितें बरें, कितें धोक्याचें तें कळटलें. हेर देशांनी बसस्टॅण्ड, हाॅटेलां, रॅस्टोरंण्टांनी कंडोम डिस्पेन्सर आसता. थंय तो मुफत मेळटा. भारतांतूय कांय जाग्यांचेर ही तजवीज आसा. गोंयांतल्या हाॅटेलांनी ती आसची अशें सरकाराक दिसता. ताकाय येवकार दिवंक जाय. कारण बऱ्या, वायटाचो विचार करपाची बुद्द पिरायेचीं 21 वर्सां हुपिल्ल्या तरणाट्यांक आसता.
एड्सा विशीं जागृताय करतना स्वैराचाराचे कितें वायट परिणाम जावपाक शकतात, ताची म्हायती 13, 14 वर्सां पिरायेच्या विद्यार्थ्यांक सगल्यांत पयलीं दिल्यार बरी. कारण पांय निसरपाची पिराय तेन्नाच सुरू जाता. एड्स दुयेंतींक पयलीं अपमानाची वागणूक मेळटाली. मात, आतां लोकांक ते विशीं म्हायती आसा. देखून तांणी तांकां स्विकारल्यात. एचआयव्ही विशाणू आंगांत कसो वता, तो वच्चो न्हय म्हूण कितें खबरदारी घेवपाक जाय, एचआयव्ही जातकूच कितल्या म्हयन्यांनी एड्स जाता, दुयेंतीन, ताचे लागींचे व्यक्तीन कितें जतनाय घेवंक जाय, ते विशींचे गैरसमज…. सगली म्हायती थोड्या लोकांक आसा. ती विद्यार्थ्यांक कळप गरजेचें. फक्त शिक्षणीक संस्थांनीच न्हय, तर हेर कडेनूय ताचेर मार्गदर्शन शिबिरां, व्याख्यानां जावंक जाय. फक्त एचआयव्ही, एड्सूच न्हय, तर सुरक्षीत संबंद, घुंवळे वखदांचें व्यसन… सगलेंच विद्यार्थ्यांक खबर आसचें. तेन्ना सरकारान ही एड्स जागृताय मोहीम बेगीन सुरू केल्यार बरी. गोंयांतल्यो एकान एक शिक्षणीक संस्था हे मोहिमा खाला येवच्यो.
गोंयच्या बायलांक एचआयव्ही जावपाचें प्रमाण वाडटा, अशें दिसून आयलां. गोंयांत एचआयव्ही+ दुयेंतीं 1987 ते मे 2022 मेरेन 17,907 इतले आशिल्ले. तर एड्स दुयेंती 1867. एड्स जावन आतां मेरेन 1260 लोकांक मरण आयलां. 1959 त संवसारांत एड्साक लागून पयलें मरण जाल्लें. आमचो देश एचआयव्हीचे बाबतींत तिसऱ्या क्रमांकाचेर आसा. मिझोरामांत 2.37 टक्के, नागालॅण्डांत 1.44 टक्के, मणीपूरांत 1.15 टक्के एचआयव्ही दुयेंती मेळ्ळ्यात. तेन्ना हो विशय गंभीरतायेन घेवन सरकारान पावलां उखलूंक जाय.
एड्स जागृताय मोहिमे खाला शर्यती, निबंध- भाशणाची सर्त अश्यो कार्यावळी जावच्योच, पूण व्याख्यानां वरवीं म्हायती दिवपाचेर चड भर आसचो. फक्त एड्सूच न्हय, तर घुंवळे वखदांच्या वेसनांचेर विद्यार्थ्यांक मार्गदर्शन जाय. गोंयच्या दर्यादेगां वयलो हो राकेस आतां दोंगराळ वाठारांनीय पावला. शाळां लागसारूय ड्रग्स विकपी दिसतात. ही फुडले पिळगेच्या फुडाराचे नदरेन धोक्याची गजाल. पुलिसांनी हे बाबतींत चड शिटूक रावचें. आनी पालकांनीय! अपघाताचें प्रमाण वाडलां. हातूंत बळी पडटात, ते चडशे तरणाटे. आतां शाळा सुट्टकच मौजमजा, खेळां खातीर दुचाकी, चारचाकी घेवन हेडपाचें प्रमाण वाडलां. बॅडमिंटना सयत क्रिकेट सर्तीय आतां रातच्यो जातात. अपघात, येरादारीचे नेम हांचें शिक्षण विद्यार्थ्यांक दिवचें. गुन्यांवां विशींय म्हायती गरजेची. एकठांय येवन गुन्यांवाचे घडणुकेंत नकळटां वांटेकार जाल्यार कांयच करिनासतनाय कसो त्रासांत पडूं येता, हाची म्हायती आबूज वृत्तीच्या तरणाट्यांक दिवची. बरो मनीस म्हूण जगपाक कितें कितें गरजेचें, ते सगलें तरणाट्यांक शिकोवपाची गरज आसा. अणभवान ज्ञान येता, बुद्द शिकता. पूण तांकां बरें तें सांगप पालकाचें, समाजाचें आनी सरकाराचेंय कर्तव्य.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
