भांगरभूंय | प्रतिनिधी
विज्ञान- तंत्रज्ञानाक लागून आतां कामां करतना व्हडलीशी दगदग जायना. सगल्यांनीच साबार तरांचीं अॅप्स (अॅमेझोन, जी पे, पेटीएम) शिकून घेवपाक जाय. सोशल मिडियाचो वापरुप करपाक जाय. खास करून ज्येश्ठ नागरिकांनी! मात हें करतना अर्थीक वेव्हारा कडेन संंबंदीत आशिल्ल्या अॅप्सां बाबतींत चड सादूर रावंक जाय. कारण आमच्या भारतांत ‘एक से बढकर एक’ म्हणटात तशे ठकसेन आसात. मोबायल फोन क्रमांक सगल्याच कागदां वांगडा बँक खात्याकूय जोडिल्ल्यान फटवणुकीचे प्रकार खूब वाडल्यात. हें नंबर नांव- पत्त्या सयत गुन्यांवकारांक मेळटात कशे? कांय कोण पयशे बी घेवन तांकां ते विकतात? एटीएमूच न्हय तर सगलेच सायबर गुन्यांव हिस्पा भायर वाडल्यात आनी तपास यंत्रणांक ताका आळाबंद हाडप शक्य जावंक ना, हें मान्य करचेंच पडटलें. एटीएम कार्ड वापरूंक फक्त पीन नंबर लागता. तातूंत आनीक कितें तांत्रिक बदल करपाक मेळटात जाल्यात पळोवंक जाय.
हालींच वास्को, पोरण्यां गोंयां, दिवचले हालींच एटीएम फटवणूक जाल्या. कार्ड स्किमींग, कार्ड स्वॅपिंग, रिमोट एक्सेस, लॅबानीस लूप अश्या साबार पद्दतीचो वापर करून ह्या ठकसेनांनी आपल्याच देशांतल्या नागरिकांक फटयल्यात. गोंयांत जाला तो प्रकार लॅबानीस लूप पद्दतीचो. हातूंत कार्ड घालपाचो स्लाॅट कितें तरी लावन नादुरुस्त करतात. कार्ड भितर घालतकच चलना. मागीर शेजरा उबो आशिल्लो ठकसेन तुमकां मजत करता. तुमचो पीन नंबर विचारता…. कार्ड चलना म्हणटा आनी तुमकां परत दिता. पूण तुमचें न्हय, तर तसलेंच दुसरें. तुमी तें तपासचे पयलींच बोल्सांत घालतात. मागीर तो दुसरे कडेन वचून तुमच्या खऱ्या कार्डा वयल्यान पयशे काडीत रावता! ह्या प्रकारांक ज्येश्ठ नागरीक, अशिक्षीत लोक चड फटवतात. हाचेर पयलो उपाय म्हणल्यार संबंदीत बँकेन थंय सुरक्षा रक्षक नेमपाक जाय. निदान येवन वचून ताचें थंय लक्ष जाय. एटीएमांत येवन कोण कितें करता, तें सीसीटीव्ही कॅमेरो चालू आसल्यार दिसताच. पूण भायल्या राज्यांतले आशिल्ल्यान हे गुन्यांवकार काम जालें काय पळ काडटात.
एटीएमाची तपासणी कशी करप हाची म्हायती दरेका नागरिकाक दिवप बँकेचें काम. फक्त बारीक अक्षरांतलो इंग्लीश, हिंदी कळोवणी तक्टो दसोवन कांय साध्य जावचें ना. कार्ड स्लाॅट, की पॅड, चार्जिंग पोर्टाक कितें जोडिल्लें आसा वा तो निखळिल्ले सारको दिसता जाल्यार बँक अधिकाऱ्यांक कळोवपाक जाय. स्वताचो पीन नंबर कोणाक सांगूं नाकात. एटीएम कार्डा परस क्यूआर कोड आशिल्लीं अॅपां चड वापरूंक जाय. बँकेन एटीएमाची सद्दां तपासणी करुंक फावो. लागीं आसल्यार दिसाक दोन फावटी तरी. रक्कम भायर येनासतना वजा जाल्यार बँकेक वा मोबायल फोना वयल्या लिंक, अॅपा वरवीं कोणेंय फटयल्यार रोखडेच बँक, पुलिसांक कळोवंक जाय. गेल्ली रक्कम परत मेळूं शकता. अॅप कंपनी, बँको सुरक्षा उपाय घेतात, तरीय सायबर गुन्यांव वाडत आसात. भोवतेक सगल्या बँकांचें एटीएम आसात. पासबुक अपडेट करपाची यंत्रां आसात. खास करून पासबुक यंत्र बरेच फावट नादुरुस्त आसता. सगल्याच गिरायकांक हो अणभव आयला आसतलो. एटीएम यंत्रांच्योय कागाळी आसात.
गोंयांतले एटीएम भानगडींत दोगांक धरल्यात. तिसरो पळून गेला. सगले हरियाणाचे. हे चोर रेंट ए बायक घेवन येताले आनी चोरी करताले. ताचे पयलीं तांणी थंय कोण येतात, कितें करतात, ताची पळोवणी केल्याच आसतली. तांणी दिल्ली, राजस्थान, पंजाब, हरियाणा, कर्नाटक, झारखंडांतूय चोरयो केल्यात खंय. सायबर चोरयां आडची ख्यास्त आनीक कडक करपाचो वेळ आयला. पूण लोकांनी पयलीं चड सादूर जावंक जाय. हें चड गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
