भांगरभूंय | प्रतिनिधी
नवी दिल्ली, खबरां संस्था ः 1 मे सावन एटीएमांतल्यान पयशे काडपा खातीर चड शुल्क भरचें पडटलें. भारतीय रिझर्व्ह बँक (आरबीआय) अधिसुचोवणी जारी करून इंटरचेंज फी वाडपाची घोशणा केल्या. हाचो अर्थ अर्थीक वेव्हारा खातीर एटीएमाचेर आदारून आशिल्ल्या गिरायकांक मुफत वेव्हाराची मर्यादा हुपल्यार अतिरिक्त शुल्क भरचें पडटलें.
एटीएमांतल्यान पयशे काडपा खातीर 19 रुपया…
अधिकृत अधिसुचोवणे प्रमाण, 1 मे सावन गिरायकांक मुफत मर्यादा सोंपतकच एटीएम वरवीं केल्ल्या दरेका अर्थीक वेव्हारा खातीर अतिरिक्त 2 रुपया फारीक करचे पडटले. हें शुल्क वाडीक लागून एटीएमांतल्यान पयशे काडपा खातीर दरेका वेव्हाराचेर 19 रुपया शुल्क भरचे पडटले, जें पयलीं 17 रुपया आशिल्लें.
बॅलन्स तपासपा खातीर 7 रुपया…
बॅलन्स चवकशी सारकिल्या बिगर अर्थीक वेव्हारा खातीर शुल्क 1 रुपया वाडयलां. हाचो अर्थ खात्यांतलो बॅलन्स तपासपा खातीर दरेका वेव्हाराचेर आतां 7 रुपया शुल्क भरचे पडटलें, जे पयलीं 6 रुपया आशिल्लें.
एटीएम ऑपरेटर्सच्या विनवणे उपरांत आरबीआयन घेतलो निर्णय
व्हायट लेबल एटीएम ऑपरेटरांच्या विनवणे उपरांत रिझर्व्ह बँकेन ह्या शुल्कांत सुदारणा करपाचो निर्णय घेतला. वाडत वचपी ऑपरेशनल खर्चाचो तांच्या वेवसायाचेर परिणाम जाता असो युक्तिवाद एटीएम ऑपरेटर्सानी केल्लो.
एटीएम शुल्कांत जाल्ली वाड देशभर लागू जातली. हाचो परिणाम ल्हान बँकांच्या गिरायकांचेर जावंक शकता. एटीएम मुळावी सुविधा आनी संबंदीत सेवां खातीर ह्यो बँको व्हडल्या अर्थीक संस्थांचेर आदारून आसात. हाका लागून वाडपी खर्चाचो परिणाम अशा बँकांचेर चड जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
