भांगरभूंय | प्रतिनिधी
नवी दिल्ली, खबरां संस्था ः देशभरांतल्या ट्रॅव्हल एजंटांनी विद्यार्थ्यांच्या व्हिसाचो गैरवापर करून रशियेंत वचपी भारतीयांक फटोवन निमाणें युक्रेना कडेन चालू आशिल्ल्या झुजांत वांटो घेवपाक जबरदस्ती केल्ल्याची धक्को दिवपी म्हायती सेंट्रल ब्युरो ऑफ इन्व्हेस्टिगेशन (सीबीआय) च्या चवकशेंतल्यान मुखार आयलां. ते खातीर चड फामाद नाशिल्ली खासगी विद्यापिठां, शुल्कांत सवलत, व्हिसाच्या मुजतीत वाड अशे हांयस दाखयलें.
दिल्ली, मुंबय, अंबाला, चंडीगड, मदुराय, तिरुवअनंतपुरम आनी चेन्नय ह्या सात शारांनी सुमार 15 सुवातींनी सोद कारवाय केल्या उपरांत सीबीआयक ही म्हायती मेळ्ळी. ह्या सुवातेर आशिल्ले वेगवेगळे एजंट, रशियेंतले तीन एजंट ह्या सगळ्यांनी मेळून भारतीय तरणाट्यांक, खास करून विद्यार्थ्यांक फटोवपाचें कट रचलें. दिल्लींतल्या एका एजंटान विद्यार्थी व्हिसाचेर 180 जाणांक रशियेंत धाडिल्ल्याचें दिसून आयलें.
रशिया-युक्रेन झुजांत दोन भारतीय तरणाट्यांक मरण आयले उपरांत हो तपास सुरु केलो. मेल्ल्या तरणाट्यां मदलो एकलो गुजरातचो आनी दुसरो तेलंगनाचो आशिल्लो. परराश्ट्र मंत्रालयान शुक्रारा हे संबंदी निवेदन जारी केलां. जायत्या भारतीय नागरिकांक फटोवन रशियन लश्करांत सहाय्यक कर्मचारी म्हणून काम करपाक जबरदस्ती केली. आमी हो प्रस्न रशियन अधिकाऱ्यां कडेन गंभीरतायेन मांडला आनी परराश्ट्र मंत्रालय तांकां बेगीन सोडपाचे यत्न करतात अशें परराश्ट्र मंत्रालयाचे प्रवक्ते रणधीर जयस्वाल हांणी सांगलें. ह्या प्रकरणांत आडखळून उरिल्ल्या तरणाट्यांक फट आस्वासना दिवन फटोवपी एजंट आनी दुबावितां आड खर कारवाय सुरू केल्ल्याचीय म्हायती जयस्वाल हांणी दिली. बिरेस्तारा सीबीआयन व्हड मानवी तस्करी वेपारांचे उक्ताडार केला अशें तांणी सांगलें. जायत्या एजंटां आड मानवी तस्करी वेपारांचे गुन्यांव नोंद केला अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
