भांगरभूंय | प्रतिनिधी
वॉशिंग्टन, खबरां संस्था ः अमेरिका एच-1बी व्हिसा खातीर एक लाख डॉलर (सुमार 88 लाख रुपया) अर्ज शुल्क घेतले. राष्ट्राध्यक्ष डोनाल्ड ट्रम्प हांणी शेनवारा व्हायट हावसांत ह्या आदेशाचेर सय केली. हाचे आदीं एच-1बी व्हिसा खातीर अर्ज शुल्क एक लाख ते 6 लाख रुपया मेरेन आशिल्लें.
ते भायर “ट्रम्प गोल्ड कार्ड”, “ट्रम्प प्लॅटिनम कार्ड”, आनी “कॉर्पोरेट गोल्ड कार्ड” अशीं खाशेलपणांय सुरू केल्यांत. ट्रम्प गोल्ड कार्डा वरवीं व्यक्तींक अमेरिकेंत अमर्यादीत राबितो मेळटा. अमर्यादीत राबितो नागरीकांक पासपोर्ट आनी मतदानाचो अधिकार दिता, तेच बरोबर अमेरिकन नागरिकाचे हेर सगळे फायदेय मेळटात.
एच-1बी म्हणल्यार कितें?
० हो एक नॉन-इमिग्रंट व्हिसा.
० ह्या व्हिसा वरवीं परदेशी वेवसायिकांची खाशेली तंत्रीक कुशळटाय जाय आशिल्ल्या पदांचेर नेमणूक करुंक मेळटा.
० आयटी, आर्किटेक्चर , भलायकी ह्या सारक्या वेवसायांतल्या लोकांक तो जारी करतात.
० अमेरिका दर वर्सा 65 हजार लोकांक एच-1बी व्हिसा दिता.
० ताचो काळ 3 वर्सांचो आसता.
० गरज पडल्यार ती 3 वर्सांनी वाडोवंक मेळटा.
एच-1बी व्हिसा बदलाचो भारतीयांचेर परिणाम
फाटल्या वर्सा भारताक एच-1बी व्हिसा सगळ्यांत चड मेळ्ळे, जे मंजूर व्हिसाच्या 71% आशिल्ले. चीन 11.7 टक्क्यांनी दुसरें सुवातेर आशिल्लो.
भारतीय आयटी/टेक कंपनीं दर वर्सा हजारांनी कर्मचाऱ्यांक एच-1बी कबलातीचेर अमेरिकेंत धाडटात. पूण इतल्या चड शुल्कान लोकांक अमेरिकेंत धाडप आतां कंपनींक उणो फायदो जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
