एच एस प्रणय सेमी फायनलींत

भांगरभूंय | प्रतिनिधी

इंडोनेशियाच्या जकार्तांत चालू आशिल्ले इंडोनेशिया ओपनाच्या दादल्यांच्या एकोड्या गटांत भारताच्या एच एस प्रणयान सेमी फायनलींत सुवात मेळयली. प्रणयान क्वॉर्टरफायनलींत जपानाच्या कोडाई नाराओका हाका 18-21 आनी 16-21 अशा सरळ गेमींनी हारयलो.

प्रणय आता डॅनमार्काच्या व्हिक्टर एक्सेलसेन वा चीनी तायपेच्या चाउ टिएन चेन आड खेळटलो.

तशेंच दादल्यांच्या दोट्टी गटांत सात्विक साईराज आनी चिराग शेट्टी हे जोडयेन संवसारीक क्रमवारींत पयले सुवातेर आशिल्ले इंडोनेशियाचे फजर अलफियान आनी मुहम्मद एड्रिएंटो हे जोडयेक 21-13 आनी 21-13 अशा सरळ गेमींनी हारयली.

भारताचे जोडयेन 4-0 अशे आघाडी वरवीं सुरवात केली. पूण, इंडोनेशियाचे जोडयेन लय मेळयली आनी स्कोर 3-5 असो केलो. ते उपरांत तांणी 11-7 अशी आघाडी घेतली. उपरांत सात्विक-चिराग हांणी जबरदस्त पुनरागमन केलें. भारताचे जोडयेन सेगीत आघाडी वाडयली. दुसरे गेमींत लेगीत भारताचे जोडयेन आपलो शेक दवरलो.

मजगतीं, किदाम्बी श्रीकांत क्वॉर्टरफायनलींत हारलो. सामके उमळशीक वाडोवपी क्वॉर्टरफायनलींत संवसारीक क्रमवारींत 10वे सुवातेर आशिल्ल्या चीनाच्या ली शी फेंग कडल्यान 14-21, 21-14 आनी 12-21 अशा फरकान हार घेवची पडली. मॅच वर आनी णव मिनटां मेरेन चल्ली.

दोनूय पंगडां मदीं अजून मेरेन दोनूच मॅची जाल्यात. पयली मॅच श्रीकांतान जिखिल्ली.

श्रीकांतान सुरवातीचे गेमींत 2-0 अशी आघाडी घेतिल्ली. पूण, ते उपरांत सेगीत चुकीचो ताका फटको बसलो. चीनाच्या खेळगड्यान पयले गेमीच्या ब्रेका मेरेन 11-7 अशी आघाडी घेतिल्ली.

फेंग हांणी ते उपरांत आपली आघाडी कायम राखली आनी पयली गेम सहज जिखली. दुसरे गेमींत दोनूय खेळगड्यां मदीं एकेक गुणा खातीर संघर्श पळोवपाक मेळ्ळो. पूण, श्रीकांतान रोखडोच फॉर्म मेळयलो आनी ब्रेका मेरेन 11-6 अशी आघाडी मेळयली आनी आक्रमक खेळी चालू दवरून गेम जिखून मॅचींत 1-1 अशी बरोबरी सादली.

तिसरे गेमींत श्रीकांताक लय कायम राखपाक जमली ना आनी हाचो फायदो चीन खेळगड्यान घेत 11-6 अशी आघाडी घेतली. ब्रेका वेळार फेंग हांणी वैजकी उपचार घेतलो. ते उपरांत दाव्या पांयाक पट्टी बादून कोर्टाचेर देंवलो. पूण, ताचो ताच्या खेळाचेर मातूय फरक पडूंक ना. फेंगान तिसरी गेम 21-12 फरकान जिखून निमाण्या चारांतली सुवात निश्चीत केली.