भांगरभूंय | प्रतिनिधी
भारतांत ‘एचएमपीव्ही’चीं स प्रकरणां
नवी दिल्ली, खबरां संस्था: कर्नाटक, तमिळनाडू, अस्तंत बंगाल आनी गुजरातांत ‘ह्युमन मेटान्युमोव्हायरस’ (एचएमपीव्ही) विषाणूची लागण जाल्ले ६ दुयेंती सांपडल्यात. तरी हो विषाणू भारता सयत संवसारभर आदीं सावनूच अस्तित्वांत आशिल्ल्याचें केंद्रीय भलायकी मंत्रालयान सोमारा स्पश्ट केलें. भारतीय वैजकी संशोधन परिशदेक (आयसीएमआर) एकात्मीक रोग निरीक्षण मोहिमे खाला (आयडीएसपी) उपलब्ध म्हायती प्रमाण, शीतज्वर सारकिल्लें दुयेंस वा खर स्वासाच्या विकारांत वाड जावंक नाशिल्ल्याचें कळटकच परिस्थितीचेर लक्ष दवरून आशिल्ल्याचें भलायकी मंत्रालयान स्पश्ट केलें.
संवसारीक भलायकी संघटने कडल्यान चीनांतले स्थिती विशीं वेळावेळार म्हायती मेळटा. स्वासाच्या दुयेंसां मदीं जावपी वाड आनी हाका तोंड दिवपाचीं यंत्रणां सुसज्ज दवरिल्ल्याचें मंत्रालयान म्हणलां.
मजगतीं, दोन दुयेंती मेळ्ळे उपरांत कर्नाटक सरकारानूय हुस्को करपाचें कारण नाशिल्ल्याचें म्हणलां. ह्या दुयेतींक आंतरराष्ट्रीय प्रवासाचो इतिहास ना. तशेंच ‘एचएमपीव्ही’चे हे देशांतलें पयलेंच प्रकरण. ह्यान पयलींय कांय टक्के लोकांक ह्या विशाणुची लागण जाल्ली, अशें भलायकी मंत्री दिनेश गुंडू राव हांणी सांगलें.
देशांत स दुयेंती
चीन सयत हेर देशांनी व्हडा प्रमाणांत मेळिल्ल्या ‘ह्युमन मेटान्युमोव्हायरस’ (एचएमपीव्ही) ह्या व्हायरसाचे स दुयेंती भारतांतूय मेळ्ळे. हातूंत कर्नाटक आनी तमिळनाडूक दरेकी दोन, गुजरातांत एक आनी अस्तंत बंगालाक एक दुयेंती सांपडला. हो व्हायरस जाल्ल्या बाळकांचेर सध्या उपचार सुरू आसात. बंगळुरूंतल्या बाळकांची सध्या स्थिती बरी आसा. चेन्नई सांपडिल्ल्या बाळकांचेर सध्या उपचार सुरू आसात.
गुजराताचे भलायकी मंत्री ऋषिकेश पटेल हांणी लोकांक भियेवचें न्हय असो उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
