भांगरभूंय | प्रतिनिधी
चिंतन – 2
केनियाच्या एका गांवांत वांगेरी माथाई नांवाचे एके तरणाटेचें मन अस्वस्थ जालें. ही गजाल 1970 च्या सुमाराची. तिच्या दोळ्यां सामकार गांव उजाड जावपाक लागिल्लो. झाडां कापलीं, जमनीचो कस गेलो, बांयों आटून गेल्यो. बायलांक जोळव हाडपाक मैलाचे मैल वच्चें पडटालें. गरिबी वाडिल्ली. ती एक दीस झाडा पोंदां बशिल्ली. विचार करताली…. आनी एक सादो, निर्मळ विचार तिच्या मनांत उदेंलो. ‘आमी परत झाडां कित्याक लायनात?’
हो विचार तसो खूब कठीण नाशिल्लो आनी आशिल्लोय बी. पूण वांगेरीन तो प्रत्यक्षात साकार केलो. तिणें घरा लागसार सात रोपां लायलीं. कांय बायलो तिचे वांगडा आयल्यो. मागीर गांवांतले लोक. मागीर तालुको, पुराय देश. अशे तरेन जल्माक आयली – द ग्रीन बेल्ट मूव्हमेंट.
ही चळवळ फक्त झाडां लावपा पुरतीच नाशिल्ली. ती स्वाभिमान, रोजगार, उदकाचो हक्क आनी पर्यावरण न्याय हांची पेरणी करपी क्रांती आशिल्ली. 2004 त वांगेरी मथाई हांकां नोबेल शांतता पुरस्कार मेळ्ळो. ती पुरस्काराच्या इतिहासांतली पयली आफ्रिकन बायल थारली. हें सगलें फक्त एका विचारान सुरू जालें. एक सादो, पूण खरो विचार. सद्बुद्धीचो एक ल्हानसो दिवो, जाणें आख्खें जग उजळ्ळें. ज्ञानेश्वर माऊलींचीं उतरां याद जातात –
सद्बुद्धी थेकुटी म्हणो नये।
सद्बुद्धी ल्हान दिसता, पूण तिचे भितर आख्खो संवसार बदलपाची शक्त आसता. हें फक्त वांगेरी माथाईचें उदाहरण न्हय. महात्मा गांधीनूय असोच एक विचार केलो : ‘सत्य आनी अहिंसा ह्यो दोन गजाली म्हजें शस्त्र आसतलें.’ हो विचारूच एका म्हाझुजा बगर भारताक स्वातंत्र्य मेळोवन दिवपी थारलो.
मार्टिन ल्यूथर किंग ज्युनियर हांचो विचार : “I have a dream…” हा विचारुच अमेरिकेंत रंगभेदाच्या विरोधांत लाखांनी लोकांची जागृती करपी थारलो. मदर तेरेसा हांचो विचार : ‘जंय मोगाची गरज आसा, थंय हांव वतलीं.’ ह्या एका विचारांतल्यान हजारांनी दुयेंतींक आनी अनाथांक मायेचो आदार मेळ्ळो.
एक विचार, एक ल्हानसो दिवो, पूण अखंड तेज दिवपी– हीच खरी क्रांती.
आजूय आमच्या मनांत खंयतरी तो शांत आवाज आसा – आयकात ताका. घडये तुमच्या एका विचारांतल्यानूय एखादी नवी क्रांती जल्माक येतली. कारण – एक विचारुच अखेर एक क्रांती घडयता.
– ॲड. देवदत्त दि. परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
