एक लाख शेतकारांच्या मनांत घोळटा आत्महत्येचो विचार
भांगरभूंय | प्रतिनिधी
महाराष्ट्रांतल्या कुटुंब सर्वेक्षणांत धक्को दिवपी म्हायती
भांगरभूंय । खबरां संस्था
मराठवाडा (महाराष्ट्र) ः मराठवाडाच्या आठ जिल्ह्यांनी फाटल्या दशकांत म्हळ्यार 2012 ते 2022 ह्या काळांत 8719 शेतकारांनी आत्महत्या केल्या उपरांत रिणां माफी सयत वेगवेगळ्यो येवजण्यो रद्द केल्यात. निवृत्त विभागीय आयुक्त सुनील केंद्रेकर हांच्या फुडारपणा खाला केल्ल्या कुटुंब सर्वेक्षणांत मराठवाड्यांत अजूनय 1,05,754 शेतकार कुटुंबां अत्यंत संवेदनशील विभागांत आसात. तांच्या मनांत आत्महत्या करपाचे विचार येतात. हें तांणीच कबूल केलां. देखून तांकां उदासीनतायेंतल्यान भायर काडपाक बेगोबेग मजत म्हणून दर हेक्टराक 25 हजार रुपया रोख मजत दिवपाची सुचोवणी ह्या सर्वेक्षणांत राज्य सरकाराक केल्या.
औरंगाबाद विभागांतल्या शेतकारांच्या अर्थीक, समाजीक आनी कुटुंबीक सुरक्षा विशींच्या अहवाला प्रमाण, 2012 ते 2022 ह्या काळांत औरंगाबाद विभागांत वट्ट 8 हजार 719 शेतकारांनी आत्महत्या केल्यात. तातूंतले 923 नापीक जमनीक लागून, 1404 रिणांक लागून, 4,731 नापीक जमीन आनी रिणांक लागून, दोन शेतकारांनी आत्महत्या केल्या रिणां फारीक करपा लागून आनी 1,929 हेर कारणांक लागून.
सध्या शेतकारांनी आत्महत्या केल्यार अनुदान दिवपा खातीर सरकारान तीन निकश थारायल्यात ते म्हळ्यार रिणां, नापीक जमीन आनी रीण फारीक करपाक येवपी आडमेळीं. पूण वयलीं कारणां सोडल्यार हेर कारणांक लागूनय शेतकरी आत्महत्या करतात.
औरंगाबाद विभागांतल्या सगळ्या जिल्ह्यांतल्या वट्ट 19 लाख 29 हजार 729 शेतकार कुटुंबांचें अर्थीक, समाजीक आनी कुटुंबीक सुरक्षा संबंदी सर्वेक्षण करपाचे काम सुरु केलां. शेतकी संबंदीत व्यक्ती आनी मानसोपचारतज्ञां कडेन चर्चा केल्या उपरांत 130 प्रस्नांचो एक सर्वेक्षण नमुनो तयार केलो आनी कलेक्टर, शेतकी अधिकारी आनी शेतकार हांचे कडेन चर्चा करून सर्वेक्षण नमुन्याच्या प्रस्नांच्या गंभीरताये प्रमाण प्रस्नांक गुण दिले.
27 जून 2023 च्या निमाणे मेरेन ऑनलायन म्हायती भरपी वट्ट 10 लाख शेतकार कुटुंबांची म्हायती विश्लेशण करून 75 परस चड गुण आशिल्ल्या शेतकार कुटुंबांचो अतिसंवेदनशील कुटुंबांत आस्पाव केलो आनी 50 परस चड गुण आशिल्ल्या कुटुंबांचो संवेदनशील कुटुंबांत आस्पाव केलो. वट्ट 10 लाख शेतकार कुटुंबांतल्यान 1,05,754 शेतकार कुटुंबां चड संवेदनशील आशिल्ल्याचें दिसून आयलें. तांच्या मनांत आत्महत्येची विचार येतात आनी 2,98,501 शेतकार कुटुंबां संवेदनशील आशिल्ल्याचें दिसून आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
