भांगरभूंय | प्रतिनिधी
शिर्डी, खबरां संस्था ः फाटलीं 23 वर्सां साईबाबाच्या शिर्डींत साई सिद्धी चॅरिटेबल ट्रस्टच्या वतीन कैलास कोते आनी सुमित्रा कोते ह्या जोडप्यान एक रुपयांत लग्न हो तोखणायेचो उपक्रम सुरू करून समाजांत एक नवो आदर्श निर्माण केला.
42 जोडप्यांचें एकाच वेळार लग्न…
शिर्डी गांवच्या लोकां वतीन हें सगळे धर्मीक लग्न सुवाळे घडोवन हाडटात. शिर्डीचे आदले पयले नगराध्यक्ष कैलास कोते आनी सुमित्रा कोते हांच्या फुडाकारान आयज मेरेन हे सुवाळे येसस्वी जाल्यात. हालींच 42 जोडप्यांचे एकाच वेळार व्हड दबाज्यात लग्न जाले. हिंदू धर्म बौध्द संस्कृतायेप्रमाण लग्न सुवाळो पुराय जालो. नव्या न्हवऱ्या-व्हंकलेक संवसाराक उपेगी पडपी आयदनां, तशेंच मंगलसूत्र, नवें कपडे दिले.
शिर्डीचे खासदार सदाशिव लोखंडे, महंत काशिकानंदजी महाराज, श्री संत जनार्दन स्वामी महाराज संस्थेचे रमेश गिरी महाराज, आनंद पिंपळगांवकार आनी हेर मानेस्तांच्या हाजिरेंत लग्न सुवाळो जालो.
आमकां धूव ना…
आमकां धूव नाशिल्ल्यान दर वर्सा ह्या लग्न सुवाळ्याच्या निमतान कन्यादान करपाचें भाग्य आमकां मेळटा अशी भावना सुमित्रा कोते हांणी उक्तायली. कैलास कोते हांणी म्हणले, साई बाबांच्या पवित्र सुवातेर फाटलीं 23 वर्सां धर्मीय लग्नां केल्यात अंदूं ताका 24 वर्सां पुराय जाता. ह्या 24 वर्सांत सगळ्या धर्मीक लग्न सुवाळ्यांत 2300 चलयांची लग्नां जाली.
साईबाबाच्या सबका मालिक एक आनी सगळे धर्म समानतायेचो संदेश दिवपाचें काम ह्या लग्न सुवाळ्यांनी केलां. ह्या सुवाळ्यांतल्यान ‘बेटी बचाव बेटी पडाव’ हो समाजीक संदेश दितात अशें कैलास कोते हांणी सांगलें. आनंद वास्तुचे संस्थापक आनंद पिंपळगांवकार हांणी सांगलें, हें खरेंच एक आदर्श दिवपी काम आसून हांतूतल्यान समाजाक बरो संदेश मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
