भांगरभूंय | प्रतिनिधी
पश्य, मे, पार्थ, रूपाणि, शतशः, अथ, सहस्त्रशः,
नानाविधानि, दिव्यानि, नानावर्णाकृतीनि, च।।5।।
अर्थ : हे पार्थ! आता तूं म्हजे वेगवेळ्या प्रकारांचे, वर्णांचे आनी वेगवेळ्या आकृतींचीं रूपां पळय
न, तु, माम्, शक्यसे, द्रष्टुम्, अनेन, एव, स्वचक्षुषा,
दिव्यम्, ददामि, ते, चक्षुः, पश्य, मे, योगम्, ऐश्वरम्।।8।।
अर्थ : तुज हें प्राकृत दोळे म्हजीं हीं रूपां पळोवपाक समर्थ ना म्हूण हांव तुका ही अलौकिक शक्ती दितां, जे वरवी तुका म्हजीं रूपां पळोवंक सोंपें जातलें.
हिंदू धर्माचो एक महान ग्रंथ म्हणल्यार श्री भगवत गीता. त्या ग्रंतांतले दोन श्लोक अध्याय 11 श्लोक 5 आनी 8 आयच्या घडयेक ते कशे एकदम सार्थ थारतात तें पळोवया.
ह्या दिसांनी आमच्या कानार मेटाव्हर्स हो शब्द जायते फाटीं पडला. कितें काय हें मेटाव्हर्स? ह्या लेखांतल्यान हांव ह्या प्रश्नाची जाप दिवपाचो यत्न करता. चलात तर पळोवया हें मेटॉवर्स जग कशें आसता तें. जर हांवें म्हणलें की हें जग सोडून अशेंच एक समांतर डिजिटल जग जंय लोक रावतात अशें आयच्या काळांत अस्तित्वांत आसा म्हूण तर अतिशोयक्ती जावची ना. हें डिजिटल जग खऱ्या जगा कडेन एकदम साम्य दवरता आनी तें आपलें जाळें पसरायत आसा. मेटाव्हर्स आज खबरांपत्रांत, टीव्ही चेर , समाज माध्यमांत, सभेंत सगळ्यांक पावला. तो दीस पयस ना जेन्ना आमी आमच्या जाणटेल्यांक मेटॅव्हर्साचेर मेळपाक शकतले.
फेसबूक कंपनीन आपलें नांव बदलून “मेटा” केलां, मायक्रोसॉफ्ट ही कंपनी “Mesh” ह्या मेटॅव्हर्स कंपनी कडेन हात मेळोवपाक पळयता तशेंच बोइंग आनी एरबस ह्यो विमान करपी उद्देग आपलीं फुडारांत येवपी विमानां मेटावर्सांत उडोवपाक पळयता. बार्बाडोस हो देश आपलीं आस्थापना मेटावर्सांत सुरू करपी पयलो. ख्रिसटि हिणें सगळ्यांत म्हारग अशें एक डिजिटल कलाविष्कार मेटाव्हर्स जगांत विकलो. लोक मेटॅव्हर्साचेर घरां, जागे आनी दुकानां विकती घेवपाक लागल्यात.
1992 ह्या वर्सा प्रदर्शित SNOW CRASH ह्या पुस्तकांत लेखक नील स्टेप्सन हांणी पयलें खेपे उल्लेख केल्लो. ह्या पुस्तकांत लेखकान एक डिजिटल विश्व जंय लोक एका मेकां कडेन उलयतात. पुणून आपल्या डिजिटल रूपांत जाका लेखक अवतार अशें म्हणटात. 26 जानेवारी 2022 ह्या दिसा भारतीय गायक दलेर मेहंदी हांणी एक प्रजासत्ताक दिन कार्यावळ ’Gamitronics’ ह्या मेटावरसाचेर सादर करून अशें करपी पयलो भारतीय म्हूण नांव मेळयलें.
जशे झूम आनी गूगल मीट माध्यमाचेर संवाद साधतात तेन्ना तुमी एका मेकां कडेन उलयतात.. पूण तुमी एकेच कडेन आसनात. मेटावर्सांत अशें नासता, हांगां लोक त्या जगांत एकठांय येतात आनी त्या डिजिटल विश्वाचो एक भाग जातात.
अशें करपाक तुमी तुमचो एक डिजिटल अवतार करचो पडटा, आज तो करपाक भोव सोंपो. तुमी तुमकां जाय तसो अवतार करूंक शकतात, तोच तुमचो डिजिटल व्यक्तिमत्व जातलो. एकदां तुमी तुमचो अवतार तयार केलो की तुमी मेटावर्सांत वचूंक शकतात. ताचो अणभव घेवपाक तुमकां कॉम्पुटर, लॅपटॉप, मोबाईल घेऊन AR (ऑगमेंटेड रिऍलिटी ) आनी VR (व्हर्चुअल रिऍलिटी ) हीं उपकरणां जाय पडटलीं. VR तुमकां 360 अंश चित्र दाखयता तर AR वापरून तुमी खऱ्या जगाचें 3D स्वरूप अणभवपाक शकतात.
ह्या दिसांनी बेयोंड्लीफे.क्लब हांणीं 10 डॉलर प्रती मनीस घेवन दिनेश आनी जनगानंदिनी हांचो मेटॅव्हरसाचेर लग्नाचो सुवाळो पळोवपाक लोकांक दिलो. तशेंच बोवॉर्ड कॉलेज फ्लोरिडा हांणी नेक्स्ट मीट ह्या मेटॅव्हरसाचेर एक डिजिटल कला प्रदर्शन केल्लें. हाचें वेल्यान मेटॅव्हर्स एक येणावळ वाडोवपी पर्याय म्हूण पळोवपाक जाता. तशेंच शिक्षण क्षेत्रांत हांचो खूप उपेग जावपाक शकता. आमी कोविड काळांत पळायला कशें तरेन ऑनलाईन शिक्षण चालू आशिल्लें तें. मेटॅव्हर्स वापरून आमी वर्ग घेवपाक शकतलें. जायते कार्यक्रम वेगवेळ्या सुवातींनी जातात आनी खूप लोकांक तें पळोवपाक मेळनात, म्हूण जर हें मेटॅव्हरसाचेर जायत तर खूब बरें जातलें. आज भलायकी मळार जाय तशे दोतोर मेळनात, पुणून जर दोतोर आमकां मेटॅव्हरसाचेर मेळत तर आमकां जाय त्या तज्ञा कडेन मेटॅव्हरसाचेर सल्लो घेवपाक मेळटलो.
मेटाव्हर्स हाचे कांय नकारात्मक परिणाम सुद्धा आसात. ह्या वर्सा जानेवारी म्हयन्यात एक गजाल खबरांपत्रांत वाचिल्ली, एके 16 वर्सां पिरायेचे लंडनचे चली VR वापरून मेटॅव्हरसाचेर पावली. थंय तिच्या डिजिटल अवताराचेर बाकीच्या इश्टांनी मेळून हल्लो केलो आनी आगळीक केली. हे कृतीन त्या चलयेर मानसिक आघात जालो. ती सैरभैर जाली. तिच्या पालकांनी थंयच्या न्यायालयांत धांव घेतली. ब्रिटनच्या न्यायालयान हो एक गंभीर गुन्यांव म्हून नोंद करून तिच्या इश्टांक ख्यास्त दिली. न्यायालयान म्हणलें कि चलयेचेर शारीरिक अत्याचार घडये जावना, पूण तो करपाची वृत्ती आनी ताका लागून जाल्लो मानसिक छळ हो ख्यास्त दिवपाक न्यायालयाक बांधील करता. म्हूण जेन्ना जेन्ना आमी मेटॅव्हर्स, फेसबूक इंस्टाग्राम आनी हेर माध्यम वापरतात तेन्ना खूब जतनाय घेवपाक जाय.
जें भगवत गीतेंत श्री कृष्णान सांगला तें आज कलियुगांतले मेटॅव्हर्स जावं येता. जें श्री कृष्णान अर्जुनाक हजार वर्सां पयलीं दाखयल्लें, हाचेर एक सखोल अभ्यास जावपाची गरज आसा. आमचें अध्यात्म आनी विज्ञान दोनूय एकाच वाटेन चलतात हें आमकां आमच्या येता त्या पिळगेक सांगचे पडटलें…
भूषण शिरवयकार
9921347730
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
