भांगरभूंय | प्रतिनिधी
शाळां लागसार रावन कांय गुन्यांवकार घुंवळे वखदां विकतात, अशी खबर कांय म्हयन्यां पयलीं आयिल्ली तेन्ना खवदळ जाल्लो. शाळांच्या वाठारांत सीसीटीव्ही बसयतले, पुलीस दवरतले अशें जाहीर जाल्लें. मात, घडये ताका तेन्ना म्हूर्त मेळूंक ना आसतलो. काल विद्यार्थ्यांचे सुरक्षे खातीर खर पावलां उबारिल्ल्याचें सरकारान सांगलें. रावण- सत्तरींतल्या एके ल्हान चलयेक उबारुन व्हरपाचो यत्न जाल्लो, ताचेर काल सभाघरांत चर्चा जाली. खरें म्हणल्यार, ही सुरक्षा वेवस्था बेगोबेग जावंक जाय. दनपरां शाळा सुट्टा तेन्ना थंय गाडयो, पालकांची गर्दी जाल्ली आसता. ताका लागून गुन्यांवकारांचें फावता. गर्देंत कोणूय भुरग्याक स्कुटरीचेर घेवन गेलो आनी तें गेलें जाल्यार कोणाक दुबाव पसून येवपाचो ना. तेन्ना शाळा सुटपाच्या आनी सुरू जावपाच्याय वेळार थंय पुलिसांनीच न्हय, तर शाळेचो शिपाय, शिक्षकांनी रावपाक जाय. अप्पर केजी, लोअर केजी, मुळाव्या शाळां खातीर हें सामकें गरजेचें.
लोकांक सगलें कितें सरकाराच्या माथ्यार दिवपाची संवय आसता. कितें जालेंय जाल्यार ते सरकारी यंत्रणांकूच दोश दितात. समाजाचीय हे बाबतींत जापसालदारकी आसता, हें तांणी विसरूंक फावना. कोण कोणा बरोबर भोंवता, खंयच्या घरांत कितें चल्लां हाची बारीकसारीक म्हायती आसपी समाजाक शाळेंत सकाळीं, दनपरां कोण – कोण येतात, कोण दुबावीत, खंयचे काॅलेजी मुखार कोण येवन उबे रावतात, शाळांनी येवपी पालकांचो भुरगो खंयचो…. हाची म्हायती नासता, अशें म्हणप धाडसाचें थारतलें. तेन्ना समाज जागृत रावलो आनी तांणी पुलिसांक मजत केली वा समाजान केल्ले कागाळे आड पुलिसांनी रोखडींच पावलां उखल्लीं जाल्यार गुन्यांवांचें प्रमाण बरेंच उणें जावं येता. भुरग्यांचें अपहरण हें तशे दुर्मीळ प्रकार. पूण आडवाटेक आशिल्ल्या गांवांनी, खास करून शिमे वयल्या गांवांनी ते खूब भिरांकूळ थारूं येतात. शाळांच्या वाठारांनी ड्रग्स विकपाचे वा ड्रग्स मिस्तुराद करून खाणाचें जिनस विकपाचे प्रकार घडटात अश्यो खबरो अदींमदीं येतात. ह्या गुन्यांवकारांचेरूय पाळत दवरप गरजेचें. तांकां सैल सोडले जाल्यार फुडाराची पिळगी इबाडली. हांगाय समाज जागृत पारेकाराची भुमिका करपाक शकता. आनीक एक गजाल म्हणल्यार हायस्कूल, हायर सेकंडरींत वचपी भुरग्यांनी आपूण थंय शिकपाकूच वता, हाचेंय भान दवरपाक जाय. हायस्कूल सुट्टकच घाळपणा केलीं जाल्यार तीं धोक्याचीं थारूं येतात, हाचीय जाणीव तांणी दवरची.
शाळां प्रमाण हायर सेकंडरी, काॅलेजीं भायर काय बेकार तरणाटे कारण नासतना उबे राविल्ले दिसतात. पुलिसांनी तांकांय हटकुपाक जाय. फाटीं शिक्षण संस्थे कडेन कसलोच संबंद नाशिल्ले कोण दुबावीत रितीन अर्दवर- वरभर उबे राविल्ले दिसले जाल्यार तांचेर कारवाय करपाची शिटकावणी पुलिसांनी दिल्ली. पूण उपरांत कांय जावंक ना. शाळांनी, हायर सेकंडरींनी, काॅलेजींत कसलोय गुन्यांव घडलो, केस्तांवां जालीं जाल्यार संस्थेचें नांव पिड्ड्यार जातलें म्हूण ते लिपोवपाचे प्रकार घडल्यात. हें चुकीचें. दोशींक कायद्यान जी ख्यास्त आसा ती जावप गरजेचें. तेन्ना सरकारान सीसीटीव्ही कॅमेरे, सकाळ, दनपरां पुलीस दवरपाचें थारायलां तें करचें. पूण, ताका येरादारीचें नियंत्रण करपाचें काम दिवचें न्हय. विद्यार्थी ही आमची फुडाराची पिळगी. तिची जतनाय आमकां घेवचीच पडटली.
गोंय अभियांत्रिकी म्हाविद्यालयाच्या विद्यार्थ्यांनी तयार केल्लें ‘ई बीट बुक मॅनेजमेंट सिस्टीम अॅपा’चे उक्तावणूय काल जालां. पुलिसांक थारावीक जाग्यांचेर वचपाक सांगतात. तो खरेंच थंय गेला काय ना, हाची म्हायती ह्या अॅपा वरवीं आतां पुलीस अधिकाऱ्यांक मेळटली. ही गजाल बरी. फक्त पुलिसूच न्हय, तर हेर सरकारी आनी खाजगी कर्मचाऱ्यां खातीरूय हें अॅप आसल्यार कामांत पारदर्शकताय येतली. प्रामाणीक कर्मचारी कोण, तें वळखूंक मेळटलें. ह्या अॅपाचेर संबंदीत वाठाराचे फोटोय अपलोड करपाक मेळटात. म्हणटकच म्हायती एकठांय जाल्यार फुडल्या तपासा खातीर ती पुलिसांक उपेगी पडटली. कारण गुन्यांव घडलो काय पुलिसांक आदली म्हायती बऱ्याक पडटा. तपासूय बेगीन जाता. हें बीट बुक मॅनेजमेंट सिस्टीम अॅप चालीक लावपी गोंय हें देशांतलें पयलें राज्य थारलां. तें आनीक अपडेट करून देशांतल्या हेर राज्यांनीय वापरूं येता!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
