भांगरभूंय | प्रतिनिधी
नवी दिल्ली, खबरां संस्था ः भारताचे शिक्षण वेवस्थेंत बदल घडोवन हाडपाचे दिकेन केंद्र सरकारान म्हत्वाचें पावल उबारलां. सरकार ‘एक देश, एक स्टूडेंट आयडी’ प्रकल्प चालीक लावपाचें आसा. ऑटोमेटेड परमानेंट अॅकेडमिक अकाउंट रजिस्ट्री म्हळ्यार (अपार आयडी) प्रकल्प सरकार सुरू करतले. ते प्रमाण विद्यार्थ्यांक एक वळखपत्र दितले. आधारा सारके 12 अंकाच्या ह्या आयडी कार्डा वरवीं विद्यार्थ्यांक जायते फायदे मेळटले. हो प्रकल्प राष्ट्रीय शिक्षण धोरण 2020 खाला चालीक लायला. शिक्षणीक प्रक्रिया सोपी करप, विद्यार्थ्यांचो डेटा बरे तरेन वेवस्थापन करप आनी विद्यार्थ्यांक चड कार्यक्षम करप, विद्यार्थ्यांक वैयक्तीक आनी पारदर्शक शिकपाचो अणभव दिवप हो ह्या प्रकल्पाचो हेत आसा.
अपार आयडी म्हणल्यार कितें?
अपार म्हणल्यार ऑटोमेटेड परमानेंट अॅकेडमिक अकाउंट रजिस्ट्री. हाका लागून देशभरांतल्या विद्यार्थ्यांक वळखपत्र मेळटलें. तातूंत 12 अंकांचो कोड आसतलो. विद्यार्थ्यांचे सगळे शिक्षणीक क्रेडिट डिजिटल पद्दतीन उरतले. विद्यार्थ्यांक तांचें खातें वेवस्थापन करपाक आनी ऍक्सॅस करपाक मदत मेळटली. तातूंत स्कोअर कार्ड, मार्क शीट, ग्रेड शीट, पदवी, डिप्लोमा, प्रमाणपत्र आसतले.
अपार आयडी कसो तयार जातलो?
विद्यार्थ्यांनी अपार आयडी मेळोवपा खातीर apaar.education.gov.in ह्या संकेतथळाक भेट दिवची. आधार क्रमांका वरवीं अपार आयडी प्रसिद्ध जातली. ती फकत शाळा आनी महाविद्यालया वतीन तयार जातली. पालकांचीय संमती घेतले. कारण ही म्हायती शिक्षणीक विभाग आनी संस्था वांटून घेतले. ते प्रमाण भुरग्यांच्या आधार कार्डाची तपासणी जातली. अपारा संबंदीत रेकॉर्ड डिजीलॉकरांत उपलब्ध आसतले.
अपार आयडीचे फायदे कितें?
अपार आयडी हें शिक्षणीक रेकॉर्ड दवरपाचे एक साधन. हांतूत प्रवेश, शिश्यवृत्ती, सवलती, एका संस्थेंतल्यान दुसरे संस्थेंत क्रेडिट ट्रान्सफर, इंटर्नशिप, प्रमाणपत्रां, नोकरी अर्ज आनी शिक्षणीक नोंदीचें सत्यापन करप शक्य जाता. तुमी येवजणे खातीर, सवलती खातीर, पुरस्कारा खातीर पात्र आसल्यार, तुमी अपार क्रमांक सांगले बरोबर संबंदीत संघटणेक म्हायती मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
