भांगरभूंय | प्रतिनिधी
नवी दिल्ली, खबरां संस्था: केंद्र सरकारान ‘एक देश एक वेंचणूक’ प्रस्ताव २०२९ पयलींच संसदेत मंजूर करून घेतलो तरी ताची अंमलबजावणी २०३४ त जातली. सरकारान एकाच वेळार वेंचणुकेची येवजण तयार केली. ते प्रमाण २०२९ उपरांत हे दिकेन खर पावलां उबारतले. पयलीं लोक जागृताय करतले. लोकसभा आनी विधानसभा वेंचणूक एकाच वेळार जावपाचो प्रस्ताव लोकसभेंत सरकारान मांडले उपरांत सरकारान हो प्रस्न संयुक्त संसदीय समिती कडेन दिला.
विधेयकाची मान्यताय वाडोवपा खातीर एक खाशेलो कार्यदळ वावुरता. सुत्रांनी दिल्ले म्हायती प्रमाण ‘एक राष्ट्र, एक वेंचणूक’ हो राजकी विशय करचे परस लोकांची चळवळ म्हणून सादर करपाची जापसालदारकी कृशी मंत्री शिवराज सिंह हांचेर सोंपयल्या. तशेंच लोकांक जागृताय करपा खातीर १७ स्लायडींचें पॉवरपॉयंट प्रेझेंटेशनूय तयार केलां. तो सगल्यां मेरेन पावयतले. जागृताय निर्माण करपाची जापसालदारकी राष्ट्रीय स्वयंसेवक संघ, समाजीक संघटना आनी अभिजात वर्ग हांचेर सोंपयतले. उक्ती चर्चा जातली. संस्थां कडल्यान ताच्या आदारान प्रस्तावांकय मान्यताय दितले. भौशीक संघटनांक व्हड प्रमाणांत संयुक्त संसदीय समिती कडेन पत्रां, ईमेल, आनी सुचोवण्यो धाडपाचो आग्रो करतले.
विधानसभा-लोकसभा वेंचणुकेचें समीकरण
आंध्र प्रदेश, ओडिशा, अरुणाचल प्रदेश आनी सिक्कीम विधानसभेची वेंचणूक २०२९ त लोकसभा वेंचणुके वांगडा जातली.
२०२९ ते २०३४ मजगतीं वेंचणूक जावन विधानसभेचो कार्यकाळूय २०३४ त सोंपतलो. खंयचीय विधानसभा २०३४ पयलीं विसर्जीत जाल्यार ताची वेंचणुकय २०३४ मेरेन उरिल्ल्या कार्यकाळा खातीर जातली. २०३४ त लोकसभा आनी सगल्या विधानसभां खातीर एकदांच वेंचणूक जातली.
कृतीदल फुडल्या पांच मुद्द्यांचेर समर्थन मेळयतलें
भौसाक संदेश दितले. ते प्रमाण एकाच वेळार वेंचणूक केल्यार खर्च आनी प्रशासकीय भार कसो उणो जातलो तें लोकांक सांगतले.
हेर देशांतल्यान उदाहरणां दिवन शासन आनी स्थिरताय कशी हाडूं येता तें स्पश्ट करतले.
एकाच वेळार वेंचणूक जाल्यार केंद्र आनी राज्यां मदीं समन्वय कसो निर्माण जातलो तें स्पश्ट करतले.
सेगीत वेंचणुकेंतल्यान सुटका मेळ्ळ्यार मतदारांचो आंकडो वाडूंक शकता.
एकाच वेळार वेंचणूक घडोवन हाडल्यार देशाचे अर्थवेवस्थेक कितलो फायदो जाता हाचेर ते उलयतले.
मतपत्रिका मतदानाचेर सल्लागार समितीच्या आवांठा भायर एकाच वेळार वेंचणूक घेवपाच्या दोन विधेयकांचो नियाळ घेतना शेनवारा संसदेच्या जोड समिती मुखार मतपत्रिका प्रक्रिया सुरू करपाचो प्रस्न उप्रासलो.
हाचेर मंत्रालयान स्पश्ट म्हणलें, मतपत्रिका परत लागू करपाचो सल्लो समितीचे कक्षेंत मोडिन. समितीचें काम फकत घडणुकेच्या (१२९ व्या दुरुस्ती) विधेयक आनी केंद्रशासीत प्रदेश कायदो (दुरुस्ती) हाचो आढावो घेवप आनी ते एकाच वेळार वेंचणूक घेवपाचे नदरेन उपेगी आसात काय? काय बदल गरजेचो आसा? हें पळोवपाचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
