भांगरभूंय | प्रतिनिधी
नवी दिल्ली, खबरां संस्था ः संसदेच्या हिवाळी अधिवेशनाच्या 18व्या दिसा केंद्रीय कायदो मंत्री अर्जुन राम मेघवाल हांणी ‘एक देश, एक वेंचणूक’ खातीर 129वें घटना दुरुस्ती विधेयक लोकसभेंत मांडलें. मेघवाल हांणी केंद्रशासित प्रदेशां कडेन संबंदीत तीन कायद्यांत दुरुस्ती करपाचें विधेयकय मांडलें.
‘एक देश, एक वेंचणूक’ ह्या विधेयकाचेर इलॅक्ट्रॉनीक वोटींग मशीनांतल्यान मतदान जालें. मतपत्रिकांचेर मतदान केले उपरांत लोकसभेचे अध्यक्ष ओम बिर्ला हांणी निकाल सांगलो. 269 खासदारांनी विधेयक मांडपा खातीर मतदान केलें जाल्यार 198 खासदार ताचे आड रावले. ते उपरांत कायदो मंत्री अर्जुन राम मेघवाल हांणी लोकसभेंत हें विधेयक मांडलें. ते उपरांत लोकसभेची कार्यवाही दनपारां तीन वरां मेरेन स्थगीत दवरली
‘एक देश, एक वेंचणूक’ विधेयक म्हणल्यार कितें?
‘एक देश, एक वेंचणूक’ विधेयक प्रमाण लोकसभा आनी विधानसभा वेंचणूक एकाच वेळार जातली. हाचे भायर ह्या वेंचणुकां वांगडाच महापालिका आनी पंचायतीचीय वेंचणूक जातली. हाचे भायर सार्वत्रिक वेंचणुके उपरांत जावपी राज्य विधानसभा वेंचणुकेचोय कार्यकाळ उणो जातलो. सार्वत्रिक वेंचणुके वांगडाच विधानसभा वेंचणूकय जातली. ग्रामपंचायत आनी नगरपालिकांनी एकाच वेळार वेंचणूक घेवपाची तजवीज करपा खातीर विधेयकांत कलम 324 अ आस्पावतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
