भांगरभूंय | प्रतिनिधी
गाझियाबाद, खबरां संस्था: सध्या डेटिंग ॲपा वरवीं फटोवपाच्या प्रकरणांत व्हडा प्रमाणांत वाड जाल्या. इश्टागतीच्या नांवान फटोवप, चड करून डेटिंग ॲपा वरवीं हें चलता. उत्तर प्रदेशांतल्या गाझियाबादांत अशीच धक्को दिवपी घडणूक घडल्या. डेटिंग ॲपा वरवीं फटोवपाची घडणूक उक्ती जाल्या. डेटिंग ॲपा वरवीं इश्टागतीच्या निमतान फटोवपी तीन तरणाट्यांक आनी पांच चलयांक पुलिसांनी अटक केल्या.
हो गट तरणाट्यांक तांच्या कॅफेंत आपोवन पयशे घेतालो अशी म्हायती मेळ्ळ्या. गाझियाबादांत पुलिसांनी डेटिंग ॲपा वरवीं फटोवपी ह्या गटाक अटक केल्या. कौशांबी वाठारांतल्या एका बनावट कॅफेंतल्यान हो गट लोकांक फटयतालो. हांगा काम करपी चलयो चल्यांक डेटीच्या नांवान फसोवन ह्या कॅफेंत घेवन येतालीं आनी थंय पावले उपरांत चल्यां कडेन म्हारग वस्तू मागतालीं. इतलेंच न्हय, बिल भरूंक ना जाल्यार भुरग्यांक थंयच आडावन दवरतालीं आनी तों कडल्यान बळयां पयशे घेतालीं.
नेमकें कितें जालें?
२१ ऑक्टोबराक एका मनशाक कॅफेंत आपयलो. चलयेन ऑर्डर केल्ल्या कोल्ड ड्रिंकाचेर सोळा हजार ४०० रुपयांचें बिल जालें. थंड पेयां खातीर इतलें व्हड बील आयिल्ल्यान संबंदीत तरणाट्यान हाका निशेध केलो. तेन्ना कर्मचार्यांनी ताका भायर सरपाक दिवंक ना आनी त्या चल्याक थंयच आडावन ताचे कडल्यान ५० हजार रुपया मागले. पूण हाचे उपरांत त्या मनशान रोखडेंच आपलें लायव्ह लोकेशन आपल्या इश्टा कडेन शॅर केलें आनी मॅसेज करून हे घडणुकेची म्हायती दिली. उपरांत परिस्थितीची गंभीरताय जाणून घेवन त्या मनशान पुलिसां कडेन संपर्क केलो.
उपरांत पुलिसांनी रोखडीच कारवाय करून डेटिंग ॲपा वरवीं फटोवपी त्या चले, चलयांच्या गटाक उक्ताडार हाडलो. ह्या ऑपरेशनांत पांच तरणाट्यो चलयो आनी तीन चले सांपडले. तपासांतल्यान कळ्ळां की तातूंतल्यो चार चलयो दिल्लींतल्यो आशिल्ल्यान तांणी वेगवेगळ्या डेटिंग ॲपांचेर आपले वेगवेगळे प्रोफायल केल्यात. हाचे वरवीं तीं दादल्यांक आकर्शीत करतात आनी तांकां फटोवन तांचे कडल्यान पयशे, म्हारग सामान घेतात. मजगतीं, हे विशीं पुलिसांनी गुन्यांव नोंद केला. फुडली चवकशी पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
