भांगरभूंय | प्रतिनिधी
-म्हारग गाडयांची गोंयांत नोंदणी करप जातले सवाय
पणजी : गोंयांत आतां 1 कोटी परस म्हारग गाडयांची नोंदणी करप सवाय जातले. 1 कोटी परस चड मोल आशिल्ल्या गाडयां खातीर 15 लाखां परस चड नोंदणी शुल्क फारीक करचें पडचें ना. कितलीय म्हारग गाडी विकती घेतली तरी शुल्का खातीर 15 लाख रूपयाच फारीक करचें पडटलें. म्हारग गाडयांची नोंदणी महाराष्ट्रा परस गोंयांत सवाय जातली.
म्हारग गाडयांचें नोंदणी शुल्क 15 लाखां मेरेन दवरपाचो निर्णय मंत्रीमंडळान घेतला. हेर राज्यांनी म्हारग गाडयांचें नोंदणी शुल्क उणें आशिल्लें. हाका लागून म्हारग गाडयांची नोंदणी गोंयांत जाय नाशिल्ली. गोंया परस शेजारच्या महाराष्ट्रांत नोंदणी शुल्काची रक्कम उणी आशिल्ली. हाका लागून म्हारग गाडयांची नोंदणी महाराष्ट्रांत चड जाताली. नोंदणी शुल्काची मर्यादा 15 लाखां मेरेन केल्ल्यान महाराष्ट्रा परस म्हारग गाडयो गोंयांत नोंद करप आतां सवाय जातलें.
शुल्काचो नवो दर लागू करपा खातीर गोंय सरकार मोटर वाहन शुल्क दुरुस्ती अध्यादेश 2023 त जारी करतलो. अध्यादेश जारी करून ह्या निर्णयाची कार्यवाही जातली.
1 कोटी परस चड मोलाच्या वाहनां खातीर 15 टक्के नोंदणी शुल्क आसा. हाका लागून 4 कोटींच्या गाडयेक 56 लाख रूपया शुल्क भरचें पडटलें. आतां ते 15 लाख भरचें पडटलें. 3 कोटीच्या गाडयेचें पयलीचें शुल्क 42 लाख रुपया जातले. आता 42 लाखां बदला 15 लाख भरचें पडटलें.
महाराष्ट्रान 1 कोटी परस म्हारग गाडयेचें नोंदणी शुल्क 13 टक्के आसा. तरी चडांत चड शुल्काची रकक्म 20 लाखां मेरेन मर्यादीत आसा. आतां महाराष्ट्राचे तुळेंत म्हारग गाडी गोंयांत नोंदणी करप 5 लाखांनी सवाय जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
