भांगरभूंय | प्रतिनिधी
नवी दिल्ली, खबरां संस्था ः सौर उर्जा आनी शास्वत उदरगतीक चालना दिवपा खातीर प्रधानमंत्री नरेंद्र मोदी हांणी काल (13 फेब्रुवारी) ‘प्रधानमंत्री सूर्य घर-मुफत वीज येवजण’ सुरू केली. हे येवजणे खाला सुमार 1 कोटी घरांक वीज व्हरप आनी म्हयन्याक 300 युनिटा मेरेन फुकट वीज दिवपाची मोख आसा.
प्रधानमंत्री नरेंद्र मोदी हांच्या म्हणण्या प्रमाण हे येवजणे खातीर 75 हजार कोटी रुपयांची गुंतवणूक करतले. शास्वत उदरगत आनी लोकांच्या भल्या खातीर आमी ‘पीएम सूर्य घर मुफत वीज येवजण’ सुरू केल्या. सुमार 1 कोटी घरांक म्हयन्याक 300 युनिट फुकट वीज दिवप हो आमचो हेत आसा अशें मोदी हांणी सांगलें.
ही येवजण सामान्य लोकां मेरेन पावोवपा खातीर शारांतल्या थळाव्या स्वशासन संस्थांनी, पंचायतींनी लोकांक रुफटॉप सोलार सिस्टिम बसोवपाक प्रोत्साहन दिवचें अशें उलो प्रधानमंत्री नरेंद्र मोदी हांणी मारलो.
हे येवजणे वरवीं रोजगार मेळटलो आनी वीज बिलां उणीं जातली. सौर उर्जा आनी शास्वत उदरगतीक चालना दिवया. प्रधानमंत्री सूर्य घर मुफत वीज येवजण आनीक घटमूट करुया. https://pmsuryaghar.gov.in ह्या लिंकाचेर भेट दिवन नोंदणी करची अशें मोदी हांणी आवाहन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
