भांगरभूंय | प्रतिनिधी
च्या आनी तिचेर आशिल्लो बेसुमार मोग, सकाळचो घडयाळीचो आलार्म वाजता. जांबय दीत पयलें पावल रांदचेकुडींत पडटा. सकाळ फुडें पयलो नग गॅसार शिजता तो च्या म्हणूं येता. गॅसार दवरिल्लो तोप आनी तातूंत फुलां फुलयत सळसळपी च्या. हळू हळू फूंक मारीत चमच्यान खिरयतना पडिल्ल्यो सुरकुत्यो, तातूंतलो सपासप सुटपी झुरको आनी तो खमंग. च्या जेन्ना गाळण्यान गाळीत कपांत ओतता तो ओग पळोवन मनांत एक वेगळीच टवटवी येता. तोंडांत च्या चो घोंट घेताच जीव तरतरीत जाता आनी दीसभराच्या कांय जाणांक कपान जाल्यार कांय जाणांक सूर्र सूर्र करीत ताटलेंत भासाभास करीत च्या पिवपाची संवय. आमी कितलेय ताकतिकेन हुनहनीत च्या पितना जरी जिबेक जळजळ जरी सुटली तरीय च्या वयलो मोग उणो जायना. किदेंय जावं च्या पितकच वेगळीच स्फूर्त जाणवता हें तितलेंच खरें.
दिसाची सुरवात च्या बगर जायना. च्या, चाय, टी, छा आदीं. च्याक भिन्न नांवां आनी तयार करपाची विवीध पद्दत आसली तरी हें पेय सगल्यांचेंच आवडीचें. फांत्यापारार जावं वा दनपारच्या कडार जावं. शिंयाच्या कडाक्याक वा गरमेच्या रखरखत्या वतांत च्या चो घोंट रुच घेत पिवपी असंख्य चहिते पळोवंक मेळटले. सोयरो – धायरो आयल्यार फोर्त च्या दिवन तांकां येवकारतात. पोटभर हांसत एकमेकांच्यो हालचाली विचारीत गजाली रंगता. थकल्यार च्या चो घोंट नव्यान तरतरी हाडटा. चर्चा सत्राक बशिल्ल्या दर एकल्याच्या प्रस्नाचेर समाधान सोदपाक च्या चो घोंट उर्जा वाडयता. इश्टांचो पंगड च्या आनी भजीं असो पारंगत मेळ यादिचें मालें विणटां. पडट्या पावसार च्या चो सांगात कांय यादी ओल्यो करीत वतात. जाल्यार खबरांपत्र वाचतना च्या चो घोंट जगभरच्या खबरांनी जागृत करता. पुस्तक वाचतना च्या आनी शब्दांचो मेळ जमता. केन्ना – केन्ना तर हातांत च्या चे कप घेत विचारमग्न, सणां-परबांक रातपाळी मारची आसल्यार च्या. नाटकाची रातभर चलपी येसाय आसूं वा रातभर केल्ली जात्रेची भोंवडी च्या बगर अशक्य. च्या बगर जिवीत अपुरे. जेन्ना च्या चो सोस मारता त्या वेळार च्या जायच, आनी तो वेळ जर सरलो जाल्यार तकली उसळपाक लागता. हें दुखणें फक्त एक च्या चो उपासकूच समजूंक शकता.
हालीं तर इंनटनॅटार पळोवन वेगळे वेगळे च्या चे प्रयोग आमी करून ताचो आस्वाद घेवपाक लागल्यात. हालीं कांय जाण आपले भलायके विशीं सामके सावचीत आशिल्ल्यान काळजी घेत वावुरतात. अदीक काळजी घेत वजन कमी करपाक वा इम्युनिटी वाडोवपाक खाशेली च्या पितात. च्या चे अनेक प्रकार आसात. जशें हर्बल च्या, बीन साकरेचो च्या, काळी च्या, दुदाची च्या, मसाला च्या, अमृतसरचो बदाम पिस्ता च्या, देहरादूनचो बुरंश च्या, पटणा शीर च्या, आसामांतलो आसामी च्या, दार्जिलींग चो च्या, निलगिरीच्या पर्वत रंगावेलो निलगिरी च्या, कसल्याय सणां-परबांक जो परंपरीक पद्दतीन तयार करतात तो कश्मीर संस्कृतीतलो कहवा कश्मीरी च्या. मातयेच्या आयदनांत तयार केल्लो हालीं तर तंदूर च्या चड फामाद. भारतात तशे संवसारातल्या हेर कांय देशांनी च्या चें म्हत्व आसा. आमकां जशी लज्जतदार च्या आवडटा तशेंच हेर देशांनी लेगीत च्या क तितलोच मान. श्रीलंकेंत सीलोन च्या, चीन देशांत बीजिंग लोक फुलांची च्या पितात, शांगहाई लोक पाचवी च्या तर दक्षीण चीन फ्युच्येन प्रांतातले लोक काळी च्या चे शौकीन.
देश – विदेश , गरीब – श्रीमंत, जात – पातीचो कसलोच भेदभाव नाशिल्लो हो च्या घराघरांनी शिजता. कोणेय कितेंय म्हणलें तरी घोंटभर च्या पिले बगर मनाक थाकाय येना. तशेंच नव्यान सुरवात करपाक झेत मेळना. च्या चे परिणाम वायट तशे बरे. लागिल्ली च्या ची संवय सोंपेपणान सुटना. जेन्ना – जेन्ना कोणेय च्या चेर नियत्रंण दवरपाचें व्रत घेता तेन्ना तांची काकुळट दिसताच आनी जाणें हें व्रत मोडीत घोंटभरूच पिता आनी रोखडीच संवय मोडप कठीन म्हणटा तांची मात तोखणाय दिसता. सुस्त बसून जेन्ना मनसोक्त च्या पिता तेन्ना म्हाका ह्या च्या चो अनशन करप्यांक सांगचें दिसता की ‘तुम क्या जानो घोंटभर ‘च्या’ ची किंमत’.
अतिशा सुर्लीकार
72628 49923
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
