भांगरभूंय | प्रतिनिधी
हांगा सादीं सुदी कामां करपाक लोक मेळनात. देखून चडशा हॉटेलांनी वेटर आसनात, स्वयंसेवा करची पडटा. पॅट्रोल पंपांचेर इंधन घालपाक मनीस नासतात. स्वयंसेवा करची पडटा
नेदरलॅण्ड हो युरोप खंडातलो एक देश, पुराय युरोपांत एकूण 44 देश आसात. या देशांतल्या लोकांक डच म्हणटात आनी तांचे भाशेकूय डच म्हण्टात. जगाचे फाटीर डच अधिकृत भास आसलेले 6 देश आसात.
नेदरलॅण्डाचे उत्तरेक आनी अस्तंमतेक अटलांटीक दर्या आसा. उदेंतेक जर्मनी आनी दक्षीणेक बेल्जीयम हीं राष्ट्रां आसात. हो देश गिरेस्त आसा आनी संवसारातल्या श्रीमंत राष्ट्रां मदीं ताचो 10 वो नंबर लागता. जगांत वट्ट 196 देश आसात.
नेदरलॅण्डांत 3 गजाली कोणाच्याय नदरेंत भरपा सारक्यो आसात. त्यो म्हणचे 1. उदकांचे कालवे 2. पवन चक्क्यो आनी 3. फूल. ह्या देशांत वचत थंय ल्हान- व्हड उदकाचे कालवे आसात, हजारांच्या संख्येनी पवन चक्क्यो आसात आनी शेंकड्यांनी मळांचेर फुलांचे रोपे आसात. हांगाची ट्युलीप हीं फुलां जाल्यार जगभर निर्गत जातात. नेदरलॅण्डांत वर्साक चार मौसम. ते म्हळ्यार शिंयाळो, स्प्रींग, गीम आनी ऑटम. पावस हांगा बाराय म्हयने झडटा. पूण पिरपिरो. दिसांतत्यान पंदरा मिण्टा शेंनता. शिंयाळ्यात दीस ल्हान आनी राती व्हड आसतात जाल्यार गिमाळ्यांत दीस व्हड आनी राती ल्हान आसतात.
हांगा सादीं सुदी कामां करपाक लोक मेळनात. देखून चडशा हॉटेलांनी वेटर आसनात, स्वयंसेवा करची पडटा. पॅट्रोल पंपांचेर इंधन घालपाक मनीस नासतात. स्वयंसेवा करची पडटा आनी बशींनी कंडक्टर नासतात. थंय कार्ड स्वायप करचें पडटा.
नेदरलॅण्डांत सायकलींची संस्कृताय खूब आदीं सावन रुजल्या. हांगा चडशे लोक सायकलींनीच भोंवतात. हांगाचो राजा आनी प्रधानमंत्री सायकलींचो वापर करताना करतना दिश्टी पडटात. ह्या देशांत मनशां इतल्योच सायकली आसात, अशें म्हणल्यार ती अतिताय जावचीना. सायकलीं खातीर हांगा खेरीत रस्ते आसात आनी तांचो रंग तांबडो आसा. हांगा चडट्यो- देंवत्यो नात. जमीन सपाट आसा. भुरगे, तरणाटे, जाण्टे आनी दादले तशीं बायलां हांगा उमेदीन सायकली चलयतना दिश्टी पडटात.
हांगाच्या क्लिनीकांनी ज्या पेशंटाचो नंबर येता ताका दोतोर खासा प्रतिक्षा कक्षात वचून हात दिवन भितर घेवन येता! 10- 15 मिण्टा ताचे कडेन उलयता आसतनाच आपणाल्या लॅपटॉपार ताची हिस्ट्री टायप करता. हीच गजाल प्रत्येक पेशंटाच्या बाबतीन आसता.
आमकां भारतीयांक ह्या देशांत सगलेंच म्हारग दिसप सभावीक आसा. यूरो हें हांगाचें चलन. एक युरो म्हणल्यार आमच्या भारतांतले 91 रुपया. हांगाच्या येरादारीचें मोल जगांत दुसऱ्या नंबराचें म्हारग आसा. एखाद्या हॉटेलांन सादो नाश्ता केल्यार 2 युरो म्हळ्यार 180 रुपया आनी सादें जेवण घेतल्यार 10 युरो म्हळ्यार 900 रुपया मेजचे पडटात. दोतोराची फी 30 युरो वयर म्हत्यार 3000 रुपया जाता आनी केंस मारपाक म्हालो 21 यूरो हत्यार 2000 रुपया घेता !
हांगा म्हारगाय खूब आनी जोडूय खूब. हांगा उण्यात उणो पगार आसा एका वराक 15 युरो म्हणल्यार 1200 रुपया! सप्तकांत कामाचे दीस पांच. शेनवार आनी आयतार सुटी. हे दोन दीस शिक्षणीक संस्था लेगीत बंद आसतात. हांगा निवृत्ती पिराय 67 वर्सा आसा. पेंशन पगाराचे सादारण 80 प्रतिशत मेळटा आनी आयकर सादारण 40 प्रतिशत भरचो पडटा.
पुराय नेदरलॅण्ड देश निवळ- नितळ आसा. हांगा कसलेच तरेचें प्रदुशण ना, हांगा रस्ताद सुणीं वा हेडगीं गोरवां दिसनात. भिकारी नात. लोकांक सुणीं- माजरां पोसपाची आवड. जण एका वाड्यार सुण्यांक सैमीक कर्मा करपा खातीर सुवात राखुन दवरिल्ली आसा. गोरवांक चरपा खातीर व्हडले – व्हडले मळे राखून दवरिल्ले आसात.
डच लोक सकाळी 7/8 वरांचेर नाश्ता घेतात. आनी दनपरां साडेबारा- देड म्हणल्यार जेवन मेकळे जातात. उपरांत तिळसना 6 / 6.30 मजगतीं रातचें जेवण जेवतात आनी बेगीनूच हत्यार 8/8.30 वरांचेर न्हिदूंक वतात. चीज, ब्रेड, मास, नुस्तें आनी बटाटो हें तांचें मुखेल अन्त. हेरींग हें लोकप्रीय नुस्तें. तें नेदरलॅण्डाचें राष्ट्रीय नुस्तें. हांगा लोक च्यावे परस कॉफी चड पियेतात.
डच लोकांची लग्न थाटामाटाची वा खर्चिक नासतात. तीं सादी आसतात. लग्ना खातीर उण्यात उणी पिराय 18 वर्सां आसा. लग्नां सोयरिके वरवीं जायनात. तीं मोगान जातात. लग्न सुवाळ्याक व्हंकल धवो गावन न्हेसता आनी तिच्या माथ्यार फुलांचो मुकूट आसता. लग्न सुवाळ्यांत हांगा आमंत्रीतांक हेरींग नुस्ती खांवक दिवपाची आनी खाशेलो मसालेदार सोरो पिवंक दिवपाची चाल आसा. ह्या सोऱ्याक ‘व्हंकलेचीं दुकां’ म्हण्टात.
प्रदीप लवंदे
9923292022
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
