एक्स्पोझिशनाच्या कामांत 50 कोटींचो भ्रश्टाचार
भांगरभूंय | प्रतिनिधी
शिवसेनेचो आरोपः राज्यपाल, आर्चबिशपा कडेन कागाळ करपाची शिटकावणी
भांगरभूंय । प्रतिनिधी
पणजीः सेंट फ्रान्सीस झेवियर हांच्या एक्सपोजिशनाच्या कामांत व्हडलो भ्रश्टाचार चालू आसा. ह्या कामांत भाविकांक रावपा खातीर खोंपी बांदल्यात. तातूंत एके खोंपीचो खर्च सुमार 13 लाख आसा. हे सारिकिल्ल्यो गजाली करून भौशीक बांदकाम खातें 50 कोटींच्या भ्रश्टाचारांत घुस्पलां, असो आरोप शिवसेना (उध्दव बाळासाहेब ठाकरे) गोंय प्रमुख जितेश कामत हांणी केला.
पोरणें गोंया एक्स्पोझिशना संबंदांतल्या कामा विशीं शिवसेनेन पणजे पत्रकार परिशद घेतिल्ली. पत्रकारां कडेन उलयतना एक्सपोझिशनाक लागपी सुविधा उबारपा खातीर भौशीक बांदकाम खात्यान काडिल्ले निविदेंत अदमासी खर्च दाखयत आपलो मुद्दो मांडपाचो यत्न केलो. हे निविदेंत लांकडाचे बांदिल्ले खोंपीचेर चुट्टांची मल्लां घालपा खातीर 3105 रुपया दर चौखण मिटर असो खर्च सांगला. जाल्यार मानी पसून तयार केल्लें दायीचें जनेल तयार करपा खातीर 10,695 रुपया दर थारायला. आंब्याच्या लांकडाची फास्की तयार करून ताचेर दाय लावून दार तयार करपा खातीर सुमार 35 हजार रुपया दर निश्चीत केला. बाजारांत आंब्या परस बऱ्या दर्जाचें लांकूड देखीक नाणो आनी पणस हाचें दार 7 हजार ते 8 हजार जाल्यार उच्च दर्जाच्या सायलाचें दार 16 हजार ते 20 हजार रुपयांत मेळटा, असो युक्तिवाद कामत हांणी केला.
निविदेंत 10 खोंपीं बांदपा खातीर 1.29 कोटी रुपया दर निश्चीत केला. जर भागाकार करीत जाल्यार दर खोंपीचें मोल 13 लाखा मेरेन पावता. मुख्यमंत्री गोंयकारांक 15 ते 20 लाखान घरा बांदपाचें आस्वासन दिता आनी दुसरे वटेन तात्पुरती खोंप 13 लाख रुपया मोडून बांदता. हें कसल्यांनी, असो प्रस्न कामत हांणी उपस्थीत केला.
ते भायर जर्मन हॅंगर, माची, माटव हे सारकिल्लीं खूबशीं कामां एक्सपोझिजशना खातीर हातांत घेतले. हाच्या मोजपात गुड्डूलुसांव करून व्हड प्रमाणांत पयशाची लूट जावपाची शक्यताय आसा, असोय दुबाव कामत हांणी उक्तायला.
एक्सपोझिशनाक लागपी 400 कोटीं मदले 150 कोटीं सुविधा उबारपाचेर खर्च करपाचे आसात आनी तातूंत 50 कोटींचो तरी भ्रश्टाचार जाला. जर हें गुड्डूलुसांव मुख्यमंत्री प्रमोद सावंत हांकां खबर नासतना तांच्या दोळ्यां मुखार चलता जाल्यार तांणी लक्ष घालून हे खर्चाचो अदमास सुदारचो. ना जाल्यार शिवसेना राज्यपाल आनी आर्चबिशप हांचे कडेन कागाळ दाखल करतली, अशी शिटकावणी कामत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
