भांगरभूंय | प्रतिनिधी
आयटी 2021 च्या नेमा प्रमाण एस्कची कारवाय
नवी दिल्ली, खबरां संस्था ः एक्स हें सोशल मिडिया प्लॅटफॉर्म. एक्स कंपनीन आयटी 2021 च्या नेमा प्रमाण 5,57,764 भारतीय खात्यांचेर बंदी घाल्या. एक्सान ही कारवाय 26 ऑगस्ट ते 25 सप्टेंबर मेरेन केल्या अशी म्हायती कंपनीन दिली.
मुखेलपणान बंदी घाल्ल्या खात्यांत भुरग्यांच्या लैंगीक अत्याचार आनी अश्लीलताये खातीर (पॉर्न) परवानगी नासतना पातळपी पोस्टाचो आस्पाव आसा. एक्स ह्या मायक्रो ब्लॉगिंग प्लॅटफॉर्मान दशतवादाक उर्बा मेळची न्हय म्हूण 1,675 खात्यांचेर बंदी घाल्या. म्हणल्यार एक्सान 26 ऑगस्ट ते 25 सप्टेंबर ह्या काळांत वट्ट 5,59,439 खात्यांचेर बंदी घाल्या.
नव्या आयटी नेमांक पाळो दिवपा खातीर एक्सान आपल्या म्हयन्याळ्या अहवालांत भारतांतल्या वापरप्यां कडल्यान वट्ट 3,076 कागाळी मेळ्ळ्यात अशें सांगलां. तशेंच वापरप्यांनी 116 खात्याचेर बंदी घालची अशी मागणी केल्ली. सगळी चवकशी केले उपरांत 116 खात्यांतल्यान 10 खात्या वयली बंदी काडली आनी उरिल्ल्या खात्याचेर बंदी दवरल्या.
ह्या काळांत एक्स खात्या संबंदीत प्रस्नां खातीर आमकां 13 विनवण्यो मेळ्ळ्यात. भारतांत मेळिल्ल्या कागाळीं मदीं अत्याचार/छळ (1,076), दुस्वासाची वागणूक (1,063), भुरग्यांचे लैंगीक शोशण (450) आनी संवेदनशील आशय (332) हांचो आस्पाव आशिल्लो अशें कंपनीन सांगलां. तशेंच एक्स कंपनीन 26 जुलय ते 25 ऑगस्ट ह्या काळांत 12,80,107 खात्यांचेर बंदी घाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
