भांगरभूंय | प्रतिनिधी
लोकसंख्या वाडटा, तंत्रगिन्यानाची क्रांती खिणाखणाक जाता. बदलांक एक राश्ट्र एक वेंचणुकेंत आसपावन घेवपाची मुखेल सुचोवणी आसची. केंद्र सरकारान गुन्यांवकारी आनी हेर कायद्यांनी बदल केल्यात. राष्ट्रपतींचे मान्यताये उपरांत हे कायदे रोखडेच चालीक लागतले. जीणेशैली बदलता तशी गुन्यांव करपाची पद्दत बदलता, घटस्फोट, खून, सायबर क्रायमांच्यो पद्दती पळोवन नवे कायदे जाल्यात. भारताच्या सरन्यायाधिशांनी कायद्यांत बदल घडोवन हाडपाचेर विचार उक्तायकच कायदेतज्ञांच्या समितीचे अभ्यासांतल्यान चुको आसल्यार त्यो न्यायालया मुखार मांडपाक येतात. आदले कामगार तशेंच हेर कायदे बदलपाची गरज आसा.
एक राष्ट्र एक वेंचणूक देशांत एकाच वेळार लोकसभा वेंचणूक घेवपा खातीर आसा. देशांतल्या विधानसभा, विधान परिशदांची एकाच वेळार वेंचणूक घेवप शक्य जातलें? पंचायत, जिल्लो पंचायत, नगरपालिका, म्हापालिका वेंचणुको देशांत एकाच खेपे घेवपाक राज्य वेंचणूक आयोगाची यंत्रणा बळिश्ट करपाक जाय.
लोकसभा वेंचणूक हाचेफुडें मे म्हयन्यांत जावची ना हें केंद्रीय संसदिय वेवहार मंत्र्यांनी सांगलां, ते ओगीच उलोवचे नात. एक राश्ट्र एक वेंचणूक हाडपा पासत प्रक्रियेची सुरवात जाल्या हें तांकां खबर आसा, प्रक्रियेंत ते वांटेकार पयलींचे केंद्रीय कायदोमंत्री ह्या नात्यान आशिल्ले. मतदान करपा खातीर पिराय, पोस्टांतल्यान जावपी मतदान नेमावळींत जाल्ल्या बदलांतल्यान राजकारणांतल्यान एक्झीट घेवपाची पिराय सुदारणेंतल्यान येवची.
अंदूंचे लोकसभा वेंचणुकेंची बारीकसाण घेतल्यार नव्या मुखामळांकय मतदार वेंचून दितात हें होल्मता. खंयचोच मतदारसंघ लोकसभा, विधानसभा आमदार, खासदारांचो वा तांच्या घराब्याचें दायज न्हय हें राजकारण्यांनी मतींत दवरचें. पंतप्रधानाचींय मतां उणी जाल्यांत, ज्येश्ठ राजकारणीय उणे जातात हो सैमीक बदल. वेंचणूक एक्झीट पोल वेंचणुकेच्या निकालाच्या समा आयले ना, पूण भाजपाक जैत मेळटलें हें लागीं लागीं सगल्या एक्झीट पोलांतले मत सत जालें. ताच्याफाटल्यान व्हड अर्थकारण, राजकारण आसचें कित्याक न्हय? फुडारांत एक्झीट पोल वेंचणूक कायद्याचे चवकटींतल्यान जावपाची शक्यताय आसा. एक्झीट पोल करपी एजन्सी लोकसंख्येच्या मतांचो विचार आयकून केल्लो आसता. वेंचणुकेच्या स महिन्या आदींसावन भाजपा जैता कडेन वता हें एक्झीट पोल सांगताले तेन्ना आपसूक वातावरण तयार जातालें. निमणे कडेन वेंचणूक आयोगाक एक्झीट पोल कळीत करपाचेर बंदी घालची पडली.
एक राश्ट्र एक वेंचणूके पासत केंद्र सरकारान वातावरणाची निर्मणी केल्या. 33 टक्के अस्तुरी राखीवता लोकसभा ते विधानसभे मेरेन चालीक लावपाचे नदरेन कायद्यांत बदल जाल्यात. ते खातीर तयारी करपा पासत वर्सभर वतलें, मजगतीं पंचायत आनी नगरपालिका, म्हापालिका विधेयक दुरुस्त्यो हाडून 50 टक्के अस्तुरी राखीवतेचें पर्व हाडपाक हरकत नासची. देशाचे मतदार संख्येंत अस्तुरी 48 टक्के आसा. वीस वर्सांचे जागृतींतल्यान अस्तुरे खातीर नवें पर्व आयलां. तातूंत शिक्षणीक बदलांचो म्हत्वाचो वांटो आसा. तंत्रगिन्यानांतल्यान जाल्ल्या बदलांचो अभ्यास केल्यार तरणाट्यांक बेगीन गिरेस्त जावपाचो हावेस आसा, ते आव्हानांक वेंग मारतात. चुको जाल्यारय त्यो सुदारून भायर सरतात, संवसारीक बदल आपणायतात. तांकां वेंचणुकेंत सुवात मेळोवन दिवपा पासत ज्येश्ठांनी फाटीं सरून मार्गदर्शक म्हणून सरप गरजेचें. एकादरो ज्येश्ठ वेंचणुकेंत वेंचून येवचो ना अशें न्हय पूण ताचे भलायकेचें कितें? भलायकेची जतनाय घेवपाक सरकाराची तजवीज आसता. याद उरप ना, घडणुकेचो विसर पडप आनी तातूंतल्यान ताचेर चेंपण येवप, पडप, रखडत उरप, ताचो सरकाराच्या कारभाराचेर परिणाम जावप ही सहज जावपी क्रिया.
राजकी पक्षांची पक्ष पातळेचेर जावपी वेंचणूक, निधी एकठांय करप, वेंचणूक आंगणांतल्यान भायर सरपाची पिराय 70 ते 75 मेरेन दवरप (भलायकेचेर निंबून), राजकारण हो वेवसाय न्हय हें कळीत करपापासत राजकारण्यांच्या वेवसायाची म्हायती प्रतिज्ञापत्रांत दिवप तशेंच लोकांकडल्यान आयिल्ल्यो सुचोवण्यो आसपावन एक राश्ट्र एक वेंचणूक विधेयकाक मान्यताय मेळोवप ही केंद्र सरकाराची मोख आसा. शिक्षणाची मर्याद लोकप्रतिनिधीक घालून दिवपाक जाय, निमाणे लोकप्रतिनिधीचें व्हड कामकाज अचूक कायदो करपाचें.
व्हडा प्रमाणांत जावपी पक्षांतरां आडावपाचेर भासाभासेंतल्यान लोकप्रतिनिधी कायद्यांत बदल घडोवंकच जाय.
कागदावयल्या मतपत्रिकेंतल्यान मतदान यंत्रा मेरेन पाविल्ली वेंचणूक रिमोट मतदानामेरेन पावोवपा खातीर बेगीन यत्न जावचे. एक्झीट घेवपाचो वावर वेंचणुकेंतल्यान देवस्थान समित्यां मेरेन वचूंक शकता. कालचो गरीब आयज गिरेस्त जाता, शिक्षणय कामगारां मेरेन शिक्षण हक्क कायद्यांतल्यान पावलां.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
