भांगरभूंय | प्रतिनिधी
पणजी: एके सादे टॅक्स्ट मॅसेजीवेल्यान डिजिटल दरोडो घालपी आंतरराज्य सायबर टोळयेक गोंय गुन्यांव फांट्यान उक्ताडार हाडल्या. डीटीडीसी पार्सल डिलिव्हरीच्या निमतान गोंयच्या एका मनशाक ८५ हजार रुपयांची तोपी घालपी सुशांत ऋषिकेश भुये (३८) हाका ओडिशांतल्यान अटक केली. हे कारवायेन टॅक्नोलॉजी वरवीं सामान्य लोकांचे जोडीचेर हात मारपी एका व्हड रॅकेटाक उक्तें केलें. हें प्रकरण २७ डिसेंबर २०२५ चें.
गोवा वेल्हाच्या एका कागाळदारान गुन्यांव फांट्या कडेन न्याय दिवपाची मागणी केल्ली. कागाळदाराक तांच्या मोबायलाचेर ’तुमचें डीटीडीसी पार्सल परत धाडपा खातीर ह्या लिंकाचेर क्लिक करात’ असो बनावट मेसेज आयिल्लो. त्या लिंकार क्लिक करतांच कागाळदाराच्या खात्यांतल्यान ८५,२३८ रुपया गेलेे. हे घडणुकेची खोलाय वळखून गुन्यांव फांट्याने भारतीय न्याय संहितेच्या कलम ३१८(४) आनी म्हायती तंत्रज्ञान कायद्याच्या कलम ६६-ड खाला गुन्यांव नोंद करून तपासाक सुरवात केली.
तांत्रिक तपासा मजगतीं गुन्यांवकार ओडिशांत आशिल्ल्याचें स्पश्ट जालें. पुलीस निरीक्षक महेश गडेकार हांच्या नेतृत्वा खाला पुलिसांचो पंगड सरळ ओडिशा गेले. संबलपूर जिल्ह्यांतल्या थेरकोलोई वाठारांतल्यान सुशांत भुये हाका ताब्यात घेतलो. अटक केले उपरांत ताचो मोबायल तपासलो. तेन्ना सगल्यांक अजाप जालें. दुबावी सुशांत हो फकत एकलोच नाशिल्लो. तो ’बल्क एसएमएस’ सुविधेचो वापर करून देशांतल्या हजारांनी लोकांक फटयतालो. ताच्या मोबायलांत फकत पार्सल फसवणुकीचेच न्हय, ’हनी ट्रॅपिंग’, क्रेडीट कार्ड रिवॉर्ड पॉयंट्स, ऑनलायन गेमींग पेआवट आनी अर्दोवेळ नोकरेच्या हांयसाच्यो धाडिल्ल्यो शेकड्यांनी फिशिंग मेसेजी मेळ्ळ्यात. लोकांची मानसिकताय वळखून तांकां वेगवेगळ्या हांयसाचें लिंक धाडून तो जाळ्यांत ओडटाले. ३ जानेवारी २०२६ दिसा ताका अटक केल्ल्यान न्यायालयान ताका चार दिसांची पुलीस बंदखण आयकयली. गुन्यांव फांट्याचे अधीक्षक राहुल गुप्ता आनी उपअधीक्षक राजेश कुमार आनी हांच्या मार्गदर्शना खाला तशेंच निरीक्षक महेश गडेकार हांच्या नेतृत्वा खाला पंगडा ह्या रॅकेटांतल्या हेर वांगड्यांचो सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
