भांगरभूंय | प्रतिनिधी
जनगणने खातीर 11,718.24 कोटींक मंजुरी
खबरां संस्था
नवी दिल्ली : देशांत 2027 त पयलेच खेपे जनगणना डिजिटल बद्दतीन जातली. केंद्र सरकारान शुक्रारा मंत्रीमंडळाचे बसकेंत हे खातीर 11,718.24 कोटी रुपयांक मंजुरी दिल्या. ते प्रमाण, एके व्यक्तीचे मेजणेचेर सरकाराचे सुमार 97 रुपया खर्च जातले.
खरें म्हणल्यार, 2011 चे जनगणनेंत भारताची लोकसंख्या सुमार 121 कोटी आशिल्ली. जर हाका आदार मानलो जाल्यार एके व्यक्तीची मेजणी करपाक सुमार 97 रुपया खर्च येतलो. जर अदमासान लोकसंख्या 150 कोटी मानली जाल्यार, दर व्यक्ती खातीर 78 रुपया खर्च जातलो.
केंद्रीय मंत्री अश्विनी वैष्णव हांणी सांगलें, 30 लाख कर्मचारी डिजिटल जनगणना पुराय करतले. ही मेजणी CaaS सॉफ्टवॅरा वरवीं करतले आनी ताची रचना डेटा सुरक्षितता लक्षांत घेवन केल्या. पयल्या पांवड्यार (एप्रील- सप्टेंबर 2026) घरांची वळेरी आनी मेजणी जातली. दुसऱ्या पांवड्याचेर (फेब्रुवारी 2027) लोकसंख्येची मेजणी जातली.
हाचे भायर, मंत्रीमंडळान CoalSETU विंडोक मंजुरी दिल्या. हाचे खाला, विवीध उद्देगीक वापरा खातीर आनी निर्गती खातीर कोळसो लिंकेजीची पावणी, योग्य संपर्क आनी संसाधनाचो बऱ्यांतलो बरो वापर सुनिश्चीत करप हो आसा.
सरकारान 2026 मोसमा खातीर नाल्लाच्या उण्यांत उण्या आदारभूत मोलाक (एमएसपी) मंजुरी दिली. 2026 मोसमा खातीर फेअर एव्हरेज क्वॉलिटी मिलींग नाल्ला खातीर एमएसपी 12,027 रुपया क्विंटल आनी बॉल नाल्ला खातीर 12,500 रुपया दर क्विंटल निश्चीत केल्यात. 2026 मोसमा खातीर एमएसपींत फाटल्या मोसमाचे तुळेंत मिलींग नाल्ला खातीर 445 रुपया दर क्विंटल आनी बॉल नाल्ला खातीर 400 रुपया दर क्विंटलाची वाड केल्या. सरकारान 2014 च्या मार्केटींग मोसमा खातीर मिलींग नाल्ला खातीर आनी बॉल नाल्ला खातीर एमएसपी 5,250 रुपया दर क्विंटल आनी 5,500 रुपया दर क्विंटलान वाडयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
