भांगरभूंय | प्रतिनिधी
पणजी ः राज्यांतल्या खाजगी कंपनीच्या अध्यक्षाची बनावट व्हॉट्सअॅप प्रोफायल तयार करून कंपनीक 93 लाख 21 हजार 414 रुपयांची तोपी घाल्ल्याची घडणूक उजवाडाक आयल्या. ह्या प्रकरणांत सायबर पुलिसांनी नहीम खान (19, हरियाणा) हाका अटक केल्या. पुलिसांनी ताच्या बँक खात्यांतले 71 लाख गोठयल्यात. पुलीस उपनिरिक्षक शेर्विन डिकोस्टा हांणी ही कारवाय केली. ह्या प्रकरणाचो फुडलो तपास पुलीस निरिक्षक दीपक पेडणेकार करतात.
मेळिल्ले म्हायती प्रमाण, नहीम खानान बनावट व्हॉट्सअॅप प्रोफायल तयार करून कंपनीचे चेअरमन आशिल्ल्याचें सांगलें. ह्या फेक प्रोफायला वरवीं ताणें व्हॉट्सअॅपाचेर कंपनीच्या उपमहावेवस्थापकाक मेसेज धाडलो. ताणें आपूण एके बसकेंत आसा आपल्या बँक खात्यांत पयशे धाडपाची मागणी केली. हे खातीर ताणें आपलोच बँक खातें क्रमांक दिल्लो. ते प्रमाण उपमहावेवस्थापकान आरोपी कडल्यान धाडिल्ल्या वेगवेगळ्या बँक खात्यांत 93.21 लाख रुपया हस्तांतरीत केले. ही घडणूक 3 ते 5 डिसेंबर 2024 ह्या काळांत घडली.
ताची फटवणूक जाल्या हें कळटकच उपमहावेवस्थापकान सायबर पुलिसांत कागाळ दाखल केली. हाचे उपरांत सायबर पुलिसांनी आरोपीच्या बँक खात्याची चवकशी केली. डिजिटल ट्रॅकिंग केले उपरांत आरोपीच्या एका बँक खात्यांत 34.60 लाख रुपया आशिल्ल्याचें दिसून आयलें. हाचे उपरांत पुलिसांक आरोपी हरियाणाच्या फरीदाबादांत आसा हें कळ्ळें. मागीर पुलिसांनी ताका फरीदाबादच्यान अटक केली.
सायबर पुलिसांनी 69 संकेतस्थळां बंद केली
मजगतीं, सायबर पुलिसांनी जानेवारी म्हयन्यांत 69 बनावट वेबसायटी, 9 बनावट सोशल मिडिया खातीं आनी 121 बनावट मोबायल नंबर बंद केल्यात. ऑक्टोबर 2024 सावन पुलिसांनी वट्ट 155 वेबसायटी, 28 सोशल मिडिया बनावट खातीं आनी 466 बनावट मोबायल क्रमांक बंद केल्यात. देखून 138 मोबायल ब्लॉक केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
