भांगरभूंय | प्रतिनिधी
पणजी : एकेच सुवातेर दसून राविल्ल्या पुलिसांच्यो बदली करपाच्या आदेशाची निमाणे अंमलबजावणी सुरू जाली. शेनवारा गोंयांतल्या सगल्याच पुलीस स्टेशनांनी चडश्या कर्मचाऱ्यांक पदा वयल्यान मुक्त केले. 2024 सावन बदली जावन लेगीत सुमार 579 पुलीस पदमुक्त जावंक नाशिल्ले. हे विशींची सविस्तर बातमी बिरेस्तारा ‘भांगरभूंय’न उजवाडाक हाडिल्ली. खात्यांतल्या वरिश्ठ अधिकाऱ्यांनी अश्या कर्मचाऱ्यांक पदमुक्त करूंक ना जाल्यार विभाग मुखेल्यांचेर कारवाय करपाचे आदेश लेगीत जारी केल्ली. हाका लागून कारवायेच्या भंयान लेगीत खूबश्या कर्मचाऱ्यांक ताकतिकेन मूळ पदा वयल्यान मुक्त केल्यात. अशें आसलें तरीय कांय पुलीस स्टेशनांत अजून लेगीत कांय कर्मचाऱ्यांक पदा वयल्यान मुक्त करूंक ना.
मेळिल्ले म्हायती प्रमाण, पुलीस स्थापना मंडळाचे शिफारशी प्रमाण पुलीस खात्यान फाटल्या पांच वर्सांत खूबश्या कर्मचाऱ्यांच्यो बदल्यो केल्ल्यो. मात तातूंतले सुमार 579 जाण अजून नवे सुवातेर रुजू जावंक नात. तातूंत अधिकाऱ्यां सयत कर्मचाऱ्यांचोय आस्पाव आसा. पुलीस खात्यान खूब वर्सां एकेच सुवातेर काम करपी अधिकारी आनी कर्मचाऱ्यांची वळेरी मागयिल्ली. तातूंत खूब जाण पांच वर्सां सावन अदीक काळ एकेच सुवातेर काम करतात अशें स्पश्ट जाल्लें.
बदली केल्ले कर्मचारी नवे सुवातेर रुजू जावंक नाशिल्ल्यान पुलीस खात्यान 15 आनी 19 सप्टेंबराक वायरलेस संदेश जरी करून कर्मचाऱ्यांक मुक्त करपाचे आदेश दिल्ले. तशें करूंक ना जाल्यार पुलीस स्टेशन, तशेंच विभागाच्या मुखेल्याचेर खात्याअंतर्गत कारवाय कररतले, अशी शिटकावणी दिल्ली.
कांय कर्मचाऱ्यांनी नवे सुवातेर रुजू जायनासतना, परतून तेच सुवातेर बदली करून घेतिल्ल्याचें मुखार आयिल्लें.
कांय कर्मचाऱ्यांनी आपले सोयी प्रमाण बदली करून घेवचे खातीर राजकी वजन वापरिल्ल्याचेंय उक्तें जाल्लें. 2025 त बदली केल्ल्या 506 कर्मचाऱ्यां मदीं 3 पुलीस निरिक्षक, 24 उपनिरिक्षक, 39 सहाय्यक उपनिरिक्षक, 60 हवालदार आनी 380 कॉन्स्टेबलांचो आस्पाव आसा. कांय पुलीस अधिकारी आनी कर्मचारी फाटलीं खूबशीं वर्सां एकेच सुवातेर आसात. तांच्या बदलीचे फक्त आदेश जारी जाले. तांकां नवे सुवातेर रुजू जावप गरजेचें आसा. मात थंय गेले उपरांत संबंदीत अधिकारी परतून मूळ सुवातेर रुजू जावपाक आडखळ निर्माण करपाक शकतात, ह्या भंयान कांय कर्मचारी आदेशाक पाळो दिनात, अशी म्हायती सुत्रांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
